ناح الحمام وقت يالورق ذا النوح=هيّض غرام اللي عن الولف ناحي
لولا الحيا لاصيح وآحن وانوح=وأعوي وأعوّى واعتني للصياحي
وآحن حنّة حاشيٍ هاج مطروح=بحبل اهجرٍ حيّر حوالي المراحي
وأبكي بكا بكرٍ بكت وأبكت الروح=ومن بكوته كلٍ بكى ما استراحي
واعز وآعزّي عن الروح مجروح=والروح راحت والحشا فيه فاحي
نارٍ شعل واشغل شذا منه منضوح=غرايبٍ من غبةٍ ما تماحي
تفيض من غيظٍ غطا لبّة الروح=من حر حامي ماذكرناه راحي
بدارات دوراتٍ من الفكر مصروح=تفجع لجا جاشٍ خبا منه باحي
هاج المودة هجّ لي باب مفتوح=هجن وهجينٍ رايحاتٍ افياحي
افكرت لي فكرةٍ تفكّرت باللوح=قضي القضا لي وانقضت بالصحاحي
وقتك مضى ما قمت به قال مصلوح=قم واقتسم قسمك وقم بالفلاحي