ابدا قصيدي وعقلي كثرت افكاره=مدري هواجيس؟ مدري ويش اسمٌيها؟
هاذا زمانٍ غرس بالقلب مسماره=والكبد تشكي من الدنيا واهاليها
شفت البلاوي بها والنفس أمٌاره=بالسٌوء والمنكر الي ما يخلٌيها
ما تملك الا الصبر لا جاك طشٌاره=الله هو الي قلوب الناس يهديها
تشوف ورعٍ علا بالصوت مزماره=يسرح ويمرح(زنود الصقر) يشويها
وتشوف رجلٍ دنيٍ حثله اخباره=فيه الخساسه تطبق به معانيها
وتشوف شايب سليم العقل مازاره=كاذب و عايب وعلمه رايحٍ فيها
والبنت تظهر حسين الوصف (والغاره)=(تطلق) اسهامٍ من اعيون البشر فيها
والزوجه الي بهاذا الوقت محتاره=ما همها بيتها والزوج ناسيها
والعجٌز لسانهنٌ ايدور الشٌاره=بالسٌم يقطر (وقبر الموت) يدعيها
وبعض البشر همٌه التفحيط والطٌاره=همه علومٍ تسوٌد وجه راعيها
وبعض البشر في ظهور الناس نقٌاره=تاكل لحم ربعها (نيٍ) وتنعيها !
وتشوف رجلٍ لبس له جنز وسواره=والصوت ناعم وعينه قام يرخيها
أخصٌ بعض البشر واعمٌها تاره=في شعري الي بيوت العزٌ يحويها
واصابعك تختلف بالطول واقداره=يعني بها ناس نعمٍ يا عرب فيها
يقوله الي بفعله رفرف شعاره=وفعوله البيض كل الناس تطريها
شاعر كفو في (وجاره) ما انطفت ناره=ودلاله يلزٌها للنٌار يركيها
يالله يالي حميت محمد بغاره=تشفي عبادك وترحمها وتهديها

وش علم الأجناب جات اتدور الشاره=يابوملهي واشوف الوقت حاديها
الديك له صاحبه والصقر صقاره=والناس توحي بذا الدنيا وما فيها
وش علم منهو يسوق بوسط سياره=يسوق لكن دروبه ما يجاريها
يمشي ولا يلتفت ليمين ويساره=غرته نفسه وربع(ن) له يماشيها
غشيم غرته نفسه والردا داره=والناس صارت تميّز في تماديها
والرابح اللي يصيد الناس راداره=لا مرته طايره غصب(ن) يوطيها
حنا لو العلم داخل وسط طياره=لا مرتك طايره بالغصب نرميها
يا أبوملهي أشوف الناس ثرثاره=والهرج واجد وقصر الفعل حاويها
الشعر مركب وفوقه ناس بحاره=يبحر به اللي جزيلاته يوافيها
والشعر غابه كفاك الله أشراره=يدسم به اللي جزيلاته يسريها
والشعر زرع(ن) تزرع نقطف أثماره=كل(ن) حسب بذرته من يوم يبديها
والشعر بيت(ن) كبير وعالي اجداره=يبقى شموخه وعمدانه نداريها
ينهد ذا البيت دايم فوق زواره=اللي غدت للجزيله من بلاويها
يا أبوملهي أصوغ القول واختاره=للي هزيله من المبدا مباديها
الهزل واهله هزيل وتكثر أعذاره=والله يكافيك ناس(ن) ماندانيها
والشاعر اللي هزيله تطلع أشعاره=ياكبر وجهه ألا من جاك يلقيها
هزله علومه ودرب الطيب ما ساره=كنه سفينه وتطردها موانيها
يا أبو ملهي ضيوف الوقت غداره=تاتي معازيبها من شان تبليها
والضيف لامن لفا نب نحفظ اوقاره=وحنا لضيفاننا نبذل ونعطيها
لكن اذا الضيف ضيع كامل أسراره=وقام يتخبط علومه ثم يخطيها
العلم مني انا بعطيه مسماره=من شان تثبت علوم(ن) له يدربيها
بعطيه درس(ن) يهمه واضبط اعياره=من شان لا تبتلي عربان ياتيها
هذا وانا من رجال(ن) تدبل الغاره=اللي تهز العدا صرخة عزاويها
صبيان زايد نهار الهوش حشاره=بالفعل وقت اللقا محد(ن) يساويها
ماعندنا غمد والشلفات بتاره=اسيوفنا تلتهم والدم نرويها
ماعندنا هرج فاضي يهدم اعماره=وأفعالنا عزنا طالت مبانيها
ما أقول انا الزير ولا مجرم الحاره=ما اغتر في نفس(ن) ابترجع لواليها
قصايدي من جزيل القول مختاره=واللي يبي علمها يرجع لقاريها
ما اقول انا شاعر(ن) او عندي إشعاره=الحكم عند العرب واخص وافيها
يالوايلي ذا زمانك زايد(ن) عاره=أصبر عسى تذوق من دنياك حاليها
صدام أخطا وشب النفط وآباره=لكنه ارتاح يالغالي بتاليها
وان كان نفسك من الأيام منجاره=الله يبدلك نفس(ن) تحتفل فيها

المشاركة الأصلية كتبت بواسطة ابو زيد الغييثي (المشاركة 414316) صدام أخطـا وشـب النفـط وآبـاره=لكنـه ارتـاح يالغـالـي بتاليـهـا الله الله صح الساااانك