قم يانديبي هات لي بيض الاوراق=واكتب وانا باملي عليك التعابير
اكتب بيوت من حسنات الاذواق=ابيات شعر مثل نقد الدنانير
في مدح منهو لطيب الفعل عشاق=عماش وربوعه اطوال الاشابير
نرفع له البيضاءعلى روس الافاق=مع ذا وله زود احترام وتقدير
معتق غريمه عند نشفات الارياق=قال اطلعوه ومقصده نية الخير
جزاه عند اللي رفع سبع الاطباق=الواحد اللي يرزق الذيب والطير
يبغى العلوم الطيبه زاك الاعماق=وكسب الثنا طبع الرجال المناعير
قال وفعل في ساعة الضيق ماضاق =مشهور بأفعاله وربعه مشاهير
ربعه على صم الرمك ترخي الاشناق=ميثاقهم يعرف خلاف المظاهير
الياجا نهار فيه عايق ومنعاق=يروون حد المرهفات البواتير
ومنا الثنا والمدح مالاح براق= لمطير واخص العيابين توقير
ربع" لهم في صفحة المجد ميثاق=تاريخهم من عصر ابو زيد والزير
وارجع لمدح اللي على الطيب سباق= عماش اخو فالح زبون المخاسير
اللي لهم صعبات الاشوار تنساق=سوق الجمال الداربه بالبواكير
اللي سعوا للي ورا الباب باطلاق=يرجى الفرج من عند والي المقادير
قال ابشروا لمقيّد السجن بأعتاق=متنازلين ولا لنا مطلب غير
منالهم بيضا كما البدر شعاق=تطلا وجيه متيهين المعاشير
واخص ابن نزهان مني بما لاق=واثني عليه اعداد رمل المعاصير
حاز المراجل مع حسينات الاخلاق=ريف الخوي واللي يجونه مسايير
تم الكلام ونطلب الله بألاوفاق =وارجوا السموحه كان في القول تقصير
تم الكلام اللي من الراس مانباق= من شاعر يصخر معانيه تصخير
وصلاة ربي عد مالتم الاشفاق= على رسول" ظّه الحق تظهير