ياضيقة البال عن صدر الشقا عدّي= إالى متى فوق رجم الضيق مقعادي
أي والله أني أحب أضحك ولا ودّي= أضيق في كل حزة واظلم رقادي
يارب أنا طالبك لاينكشف سدّي= ولا تشّمت بعد يارب حسادي
الوقت ضدي ورفقان الرخا ضدي= والحال مستهلكة وش ذنب عدّادي؟
كل مابغيت أنتبه وارتاح واهدّي= حطّت هواجيس بالي للشقا نادي
ثم نادت همومي اللي من سنة جدّي= لين أنعزل عن جميع الناس في وادي
الله يعوّض عليك بخير ياكدي=الطيب بعضه مع بعض البشر غادي
ياناشدٍ كيف حالي أستلم ردي=أنا من الله بخير وضيقتي عادي
والدمعة اللي رسمها الوقت في خدي= ماسالت الا عقب ماهزت عنادي
قل لي وش اللي اسوي والزمن ندي؟= واللي معي للزمن في الجيب ردادي!!
أصد مير البلا مافادني صدي = وانا اجودي واحسب اللي حولي اجوادي
أمد للطيب جسر ومانفع مدّي= واقلّط اعداي من جهلي على زادي
كم واحدٍ من ذنوبي راح متغدّي = في غيبتي ماتورّع عن تنّقادي
وكم واحدٍ ذاخره للضيق مالدّي =وانا من الطيب بديته على اولادي
واللي على فزعة العربان محتدّي = خلوه يشرب على الهقوات برّادي
((بعض الهقاوي تجيب احيان وتودّي= وبعض الهقاوي تمر وصوتها هادي!))
كلّش على الله وانا مانيب متردّي = الا مع اللي عليّه بالردى بادي
وياالله عسى الأمس مايشبهك ياغدّي= يمكن أحقق مناي وغاية مرادي
وياالله عسى ضيقةٍ مرتني تعدّي= ولا يطوّل في رجم الضيق مقعادي