أنا شف بالي شوف وضحاً تتل الذود=طفوحٍ نظرهـا والمغاتيـر تتلاهـا
ليا روّحت وألاّ مع الصبح يوم تقـود=تبـي عشبـةٍ متعهّدتهـا بمفـلاهـا
ورى قعدةٍ سودا تتل الحبـال السـود=من الولف خطـرٍ بالقوائـم توطاهـا
لها برثعة خشمٍ خنف والسبال بـزود=ولها سيف لحيٍ زايدٍ عـن حلاياهـا
توارد ملامحها سهيفٍ عريض خدود=تفوق الوصوف وملح ربي تغرشاهـا
عليها انتلاله جل خلاّقهـا المعبـود=ياسبحان ربٍ بأحسن الوصف سواها
كبيرة مقاشر راس ودقاقـة العنقـود=ترافـع مقادمهـا تهـازع مقفـاهـا
وروس الأذاني للأباهر تقول سـدود=وطول ارقبتها ميـزةٍ مـن مزاياهـا
وسيعة نحر ماودك يشوفها المقـرود=ولاشافهـا راع النظـر ماتعـدّاهـا
شديد الوضاح مدعّجه زينها مشهـود=تزيد الشريطيه على ريـح طرياهـا
دواير وبرها في محيط السنام عقـود=عقودٍ من اللولو على الجنب محلاهـا
سنادٍ من الغارب على غاية المقصود=شناحٍ تموح الأرض مع زين ممشاها
قصيرة فقاره عمرها من اللحم مجرود=تحلف إنها حائل وهي فـأول لقاهـا
طويلٍ عريضٍ جنبها مشيها بسنـود=عريضٍ قصيرٍ ذيلهـا ويـن تلقاهـا
تفاهق سنامٍ فوق حجبانهـا مشـدود=عراقيبها عقـلاء تصاغـر بماطاهـا
عليها الحلق من بينهن مطرقٍ ممدود=ولاعمرها رِدت على غيـر مشهاهـا
ولدها ورى المليون يشرا وهو مفرود=وأبوها دفن فقر الأجاويـد وأغناهـا