لي سنة ما قلت بيت ولي سنة ما قلت جابه = خاطري مل القصيد ومن بعض لمثال طايب
صابني بعض الخمول وصابني مثل الكآبه = ما لقيت اللي يشجعني على بدع الغرايب
لين شفت الشيخ ناصر للفخر يشعب اركابه = يتعب الأقدام فالوقفات ويحث الركايب
انتشيت وقمت من نومي وعاودت الكتابه = وانتقيت من المثل ما كان جزل وكان صايب
الله اللي يرفع الرجال ويزيده مهابه = والمراجل من ولي العرش تيسير اوهايب
وشيخنا رجّال عرف ومن مناجيب ونسابه = يبذل المعروف مع لصحاب ويحل النشايب
كاسبٍ حب البعيد وكاسبٍ ود القرابه = البعيد ايشيد به وايضاً تشيد به القرايب
التُقى والدين والعفّه ومضمون اللبابه = من سمات الشيخ حلال المشاكل والطلايب
للوطن فيه اعتزاز ولابته من روس لابه = من عبيده كاسبين المدح فأيام الحرايب
الدهر لاشتد باس وبان ميله وانقلابه = لد عينك في رجاجيلٍ يسوون العجايب
للكرم فيهم طبوع وللوفا فيهم رحابه = يكرمون الضيف يومٍ العرب خوف ونهايب
فعلهم كلٍّ قراه ومجدهم كل درابه = ينقلون الحمل لا كبرت مواجيب النوايب
انجب ارجالٍ تنافس فالمراجل والذرابه = طيبهم من طيب ساس وطيبهم من راس شايب
شايبٍ درب المعالي قد عبر فيه ومشابه = والوفا طبع العقول المستنيره واللبايب
والرجال اللي تعلّم من عطا علمه وادابه = استفادوا من صفاته واكسبوا منه كسايب
من بحر علمه تنوّر من يبي فن الكتابه = من كثر مال القلم في سيرته جاله حطايب
شيخ دين وشيخ علم وشيخ رايٍ يقتدابه = مستشارٍ للمليك وملهمه مجري الهبايب
التواضع مبتغاه وللعرب سهلٍ جنابه = ولا يليق اله الصحيب اللي يرافق كل خايب
مجلسه منصاً لمن حده عنا وقته وصابه = يستريح ابه الغريب اليا شكا هم وغلايب
باب بيته للضيوف مشرّعٍ ما صك بابه = ذي فعول اللي رقوا بامجادهم روس الجذايب
قالها اللي لا تحزّم ما يخوجل في جوابه = والمثايل لا تعصّت ساقها سوق النجايب
طاب لي ما قلت والشاعر ترا فكره دوابه = يم ربعٍ ما دخل في قدرهم زيف وشوايب