ياحبيب الروح فرقاكم صعيبه=وعذابي من فراقك وعذابي
كيف بقوى وحتمل كبر المصيبه=عزتي للقلب من كبر المصابي
هلت دموعي على خدي سكيبه=كن بقصا ضامري مثل الجنابي
جف صاف الدمع ثم اقبل سريبه=يوم ودعت الغضي ترف الشبابي
موقف صعب وساعاته رهيبه=التويت بلبته يوم التوابي
قال تكفا قلت له لبّا قليبه=ماتمنى يانضر عيني يجابي
قال تكفا لاتطول بالمغيبه=لاتناساني مع طول الغيابي
قلت له عهد مواثيقه قطيبه=لاذكرك قدام زادي والشرابي
ماتناسا صاحب وافي صحيبه=لين تنزح ماللوطا سود الهضابي
ولين ينسى الذيب لاجاع الزريبه=ودام سيف العشق عزه بالنصابي
طالة المده ولارد النبيبه=عل يسقى لانتهى وقت أرتبابي
ياحياة الروح فرقاكم غليبه=من سببكم ماكن فيني صوابي
الصواب اللي محد غيرك دريبه=أتظاهر بالسعاده والبلابي
قلبي المجروح يسهرني نحيبه=اشهد ان الجرح من عقبك سطابي
جرحي اللي ماعرف طبه طبيبه=وانت لامن جيت منك الجرح طابي
وهني من لاعرف حب وحبيبه=ماتولع في هوى ريم الروابي
الهنوف اللي عجايبها عجيبه=خصها بالزين من ينشي السحابي
جادلٍ في طلته حشمه وهيبه=هيبه ترهب زعيم الانقلابي
كن رمش عيونها صفة كتيبه=مايقاوم سهمها القاتل ارهابي
والعيون الخرس ويل اللي تصيبه=لجلها تخضع عزيزات الرقابي
والشعر شلال ناعم مكتسيبه=اشقر غطى جبينه بانسيابي
كالحرير يفوح به مسكه وطيبه=لالفحني ريحه منه أنتشابي
والشفايف جمرها من يكتويبه=يدمن الكيه ولوفيها حسابي
ومبسم حب البرد به ينلقيبه=مبسم طعم العسل بشفاه ذابي
والجبين اللي بياضه ينسريبه=مثلها ماقد مشى فوق الترابي
كنها بدراً تلالا نقتديبه=ماحجب نوره تزبار الضبابي
فتنة بين البشر تمشي غريبه=آيةً في الحسن لله المآبي
صوره سبحان منهو معتنيبه=دون صبغ ودون مكياج وثيابي
في جمال كل هالناس تحكيبه=ويش انا بقول يالله الثوابي
واهني واحظ منهو من نصيبه=اشهد ان ربي لدعواه استجابي
طلبتي يالله عسى ربي يجيبه=دام ربي في بحر حبه رمابي
والله اني لا أعشقه حتى مشيبه=لوكبر عندي هوى بالي شبابي

اخواني الاعزاء كلن بأسمه

بيض الله وجيهكم على المرور المتواصل والردود المشرفه

لاعدمنا هالمرور وايضا الردود ..