::: مـنتدى قبيلـة الـدواسـر الـرسمي :::

- :: قسم الـشعر العــام :: (http://alduwaser.org/vb/forumdisplay.php?f=16)

- - ابن بطحيّة وابن بخيتان (http://alduwaser.org/vb/showthread.php?t=29477)

ابن بطحيّة وابن بخيتان

الإخوة أعضاء وزوّار الموقع الأعزّاء السلام عليكم ورحمة الله وبركاته أضع بين أيديكم أبيات لكل من الشاعرين :حسن بن عبدالله بن بطحيّة الوداعين والشاعر عبدالله بن بخيتان بن ضافي المخاريم آمل أن تنال على إعجابكم واستحسانكم

البداية كانت مع الشاعر عبدالله بن بخيتان

الراس مدّه ما قرب من وسادته=والفكر متعكر ولا هيب عادته
ومن اولاً ما فيه شيٍ يعكّره=من أولٍ مضرب مثل في جلادته
يا من نشدتوا عن تقارير علّتي=روحوا لنور العين واخذوا افادته
تراه هو سبت جروحي وطبها=الجرح جرحه والدوا من عيادته
واليا رجعتو وصّلوا يمّي الخبر=وأشوف وش سبّت جفاه وإبادته
للعاشق اللي مات بالهم ينتظر=يرجي السعاده ما تهنّا سعادته
ان كان مقصده التغلّي وخالقه=انه الوحيد اللي بقلبي سيادته
دايم خيالي مع خياله موافقه=ما فارقه حتى بلحظة عبادته
وان كان منكر مامضا من عهودنا=وغطّا على حبّه جفاه وبلادته
قولوا له ان اللي تركنا بنتركه=وحنّا بخيرٍ قبل حزّة ولادته

وهذا رد الشاعر حسن بن بطحية

يا من تماثيله من الشوق عادته=إلين حرّك هاجسه من ركادته
أقول لك لا باس يا شاكي الهوى=كم عاشقٍ فتّانة الجيد صادته
تشكي هوا اللي تلّت القلب عامده=قتيلها في صوح الأقذال قادته
مات الدجيما من سبايب وصوفها=والعنقري باح الكنين بعقادته
وراع الهوى الغلاّب تضهر بوادره=وتبين بالنقّاد نظرة نقادته
لا ترسل المرسول ينبيك بالخبر=بعض العرب يدخلك ديرة قرادته
لكن تصبّر واحتسب وأبعد النظر=لو ان قلبك كيّة الشوق جادته
لا تبدي الشكوى لناسٍ تجاملك=كم واحدٍ يشهد وتبطل شهادته
يا صاحب التقرير يا طيّب النبا=وش لك بحربٍ ما عرفنا هوادته
تناقض الأقوال مبدا ومنتهى=ما تنقبل من قايدٍ له قيادته
بس اعتبرها مثل ما قيل بالمثل=كبوة جوادٍ جات من غير إرادته

وبعد رد ابن بطحية عليه رد عبدالله وقال:

يا مرحبا بالخط واللي مسنده=من عقب ما شرد التماثيل نادته
يمدح وينصح واستمعت لنصيحته=ويشكر على نصحه وشرحه واشادته
يا صاحبي يا اللي معزّتك عاليه=بأشرح العنادي وغادته
صاحبك مرسل له طروشٍ تخبّره=بعلوم محبوبٍ يريد استعادته
وعطاهم حلول اذا رد صاحبه=و وقّع على قوله وحط اعتمادته
فأن كان خلّه عمّر الحب عمّره=وغلى بغا هدّه رضا بانهدادته
من يطرد المقفي ليا راح وانهزم=مثل الذي يبغا الضيا من رمادته
هذي القضيه كلها يا رفيقنا=بابٍ مشرّع ودّنا بانسدادته
ما يختلف مضمون شعري ومقصدي=أحماه من شخصٍ يريد اصطيادته
واللي سواتك يا حسن رجل مجتهد=والمجتهد يشكر بحسب اجتهادته

وهنا رد ابن بطحية على عبدالله وقال:

هبّت هبوب الشعر واسترّ خاطري=والشعر زودي يوم تقطف زيادته
امثال بستان المثايل ووردها=كم واحدٍ منها طمع باستفادته
تصفيقة الكفين تشجيعة الجهل=وقلبٍ نصح عند الملا شف سوادته
لا تنزعج من كلمة النصح دامها=جاتك وقايلها نطق بانفرادته
تدري بقايلها وتعرف طبايعه=والمسأله جهل القصيد وإجادته
ومثلك يجيده ما سلك مسلك الردى=لو كان وضّح خاطرك بانحدادته
والحد ماله بين الاصحاب معتبر=الحد في يوم الحروب و وقادته
واضن مثلك فاهم في مقاصدي=وأنا الذي ما أختار عنك انحيادته
جاريت قافك يافتى الجود مسفهل=لكن راعي النار طيّر جرادته
ياصاحبي شعر يجي دون تجربه=يسهل على كل العقـول انتقادته

وسلامتكم ............

وتقبّلوا تحيات أخوكم متحري الصدق