بان الجمال وشاقني ناعم العود = الله خلق وابدع بزينه وزادي
زين تكامل بالبهاء ماله حدود = عليه ربه يوم سواه جادي
اليعربيه حسنها صار به زود = وصايف فاقت بها بانفرادي
من شافها يحتار من زين هالعود = الله يصونه من عون إحدادي
فالعين عين اللي على الوكر مشدود = شاف الزريق ولاحصل له هدادي
عليه رمش فوق لوجان ممدود = تقول رمش امنفلات الجيادي
واشقر تحدر فوق الامتان مسرود = لمحتها فاخذت رزانة افوادي
النطق حلو والحلا فيه مشهود = واطراف عوده فوقها الزين بادي
لاعيونها والخاطر اعيونها السود = تامر نحقق ماتبي من مرادي
أنا لها بالحال والمال واجهود = كلام فعل نثبته بالوكادي
تستاهل اغليها بلامن واردود = حق لها يوم التجت بي تنادي
نفسي تود إتقول القول مردود = يصعب علي وأنا اعرف الردمادي
مادام درب منزه العرض مسدود = وابلادها يا بعدها من بلادي
فالصمت عز الرجل والصبر محمود = حتى تخلص من الرسن والقيادي
فان كان حب العز مافيه منقود = زرعت حبي والرجا في الحصادي
والآ الهوى الممقوت ماظن به فود = عيب على مثلي بعرضه يفادي

الحب يالعذال صعب علاجه = لاتحسبونه سهل كل هنابه
كم عاشقٍ مثلي بكى في مداجه = وامسى طويل الليل يشكي عذابه
خص إلى عدى و أنا من مزاجه = الماء نشوفه مير صعب شرابه
على حبيبٍ صاب قلبي إخلاجه = شفقٍ على شوفه وحب اللقاء به
أمر بيت الزين من غير حاجه = عساى أشوفه واقف عند بابه
والله لولا الناس واخشى السماجه = لروح له من الراس واجلس جنابه
لاشافني خلي رفع لي حجاجه = سلام رمز من عيوني جوابه
حبه على تشغيل عشرين ماجه = ومنين مافريت رقمه حكابه

الله أكبر يا عشير زاد جرحي = جرح حبٍ مايشافيه المداوي
طولت فرقاك يانورى وفرحي = والظروف القاسية دون المناوي
لا ضواني الليل جاب الليل ترحي = حب زايد بعد ياذبح الهواوي
أنت من ديره و أنا يا زين شرحي = ماصفت ليام تجمعنا دناوي
فالوساوس هدمت والبعد صرحي = وأنت ماتدري عن اللي بالحناوي
يا بديع الوصف حبك زاد طرحي = وامتلك عقلي وخلاني شقاوي
أنتظر منك الكتاب وزود شرحي = لا تخيب فيك مأمول الرجاوي
ماذكرت أيام فيها أيام مرحي = والحديث اللي تبادلنا شفاوي
صانه الله والتلاقي فيه برحى = بس لملاقاك مجبور وهاوي

لي صاحب نفحات حبه قويه = عسى الولي للشمل عجلٍ يلمه
إهتز قلبي يوم نادوا سميه = وفزيت فز الطفل ساعة لقاء أمه
لاشك بلا إسمه يطرا عليه = و إلا زريف الطول دونه محمه
بيني وبينه فرجةٍ جرهديه = ما ياصله كوني الونيت المهمه
ونيت جمس حوض يقرب مجيه = اللي إلى بام المثل ذاك طمه
فياليت خلي مايذكر عليه = كان أستريح ولا اتشقا بهمه

قلبي غدا يا سعد كله مع حصه = إحتلته بالجعد وعيون فتانه
ما عاد لحدٍ بقلبي في الهوى خصه = مصدوف حتى خلا من الحب ريحانه
في الحب جالي وجاله يا سعد قصه = أمرٍ مقدر وحكم الله سبحانه
يا حصة من غلاها سميت حصه = والحصه أغلا من الياقوت والدانه
محلا الزميم لمع بخشيمها فصه = ظني وأنا مانظرته والولي صانه
دهنوش يابو محمد صوبهم نصه = وغير السهب مالنا في يمته خانه