الشاعر / ناصر بن تميم بن قير آل تميم الدوسري

الشاعر / ناصر بن تميم بن قير آل تميم الدوسري ، ولد عام 1326هـ في مدينة الخماسين بوادي الدواسر ، والشاعر ناصر مقل في قرض الشعر إلا في المناسبات ، وهو لايزال حيا يرزق ، ومنذ (30 عام ) يعتبر من رجال التجارة في المنطقة ، شارك مع الملك عبد العزيز رحمه الله ، في السبلة وفي بعض مغازيه وفتوحاته في جنوب المملكة ، بقيادة الملك فيصل رحمه الله .

ومن قصائده :

مرثية في المرحوم / ماجد بن منصور بن قطيم

ليله لفاني العلم ياشن جرالي = ويا عزتا للصدر مما وزا فيه
من جاني علم حامي التوالي = والقلب كنه ياعرب محرقٍ فيه
فياليت من يفداه باغلى الحلالي = لكن قضا الله مالنا حيلةٍ فيه
فالمال يفدى بع عشير الرجالي = من عقب ماجد مالنا شرعةٍ فيه
كريم سبلا لا امحلن الليالي = وماهوب قنٍ دانعن في عوانيه
لاغورت لصوات عند التوالي = لابو محمد بيناتٍ عزاويه
عسى البقاء في الشيخ ذرب الفعالي = أبو سعيدٍ جعل ربي يساديه
جعله يساعده البخت والعيالي = يومه كريمٍ وافي في معانيه
رزنٍ على العدوان مثل الجبالي = حلحيل ما ينحال يفحم معاديه
فيا بختنا دامه علينا إظلالي = ويالله عسانا ماندور العوض فيه
فنا نذير اللي يدور الكمالي = بنت الردى لاهي تفسد ذراريه
كب الردى لايغترك كثر مالي = الترب لايشفي ولا ينشفا فيه
ماله شبيه كون رمث الحبالي = لا ينتحول به ولا ينرقا فيه
أجزع على أهل الجود وأهل المقالي = اللي ولدهم دايماً ينطمع فيه
فاللي جزع يصيد صيداً جزالي = واللي دنوعٍ ينتظر في تواليه
أدرك سببك بكل مالٍ وحالي = ترا النسب ساسٍ ولا ينزهد فيه

وله عرضة نجدية :

يالله اليوم ياعدال يا والي = يارفيع السماء سهل تواليها
بابدع القاف من صدرى ولا أبالي = والمثايل بعدلها واغنيها
إستمع يا عريب الجد والخالي = في بيوتٍ منقيها ومنشيها
يا جماعة ترا الجمعاء لها حالي = والتفرق يخذل اللي سعا فيه
من بنى في العزا يرتاح في العالي = والهيار الردى يهدم مبانيها
ولاتباطا على حباي لدغالي = من حفر حفرةً لزماً يقع فيها

الأبيات التالية للشاعر / ناصر بن تميم جادت بها قريحته عند مايرى أنه يكرم من لا يستحق التكريم ويترك القريب الذي كان مفروضاً أن يكرم قبل غيرة من منطلق الأقربين أحق بالمعروف .

الله وكبر ذا زمانٍ تغير = يدعى البعيد ويترك اللي لهم حق
فلا كون به عقل وميزٍ تفكير = مما جرا قبله ومما بيلحق
كرامة تخطي القرابات تخسر = لاهيب لا لله ولاهيب في حق
قد قال : مترك في كلامه وذكر = ياضيف لو إن فيك دين وتسبق
فالحق عند أهل المواجيب يذكر = اللي فعايلهم بطيبٍ تصدق
ماهوب عند إضعوف لعزم يعبر = إرخومٍ ولكن بالمراجل تشدق

واحة الشعر الشعبي
ج/3
عبدالله بن حمير بن سابر الدوسري