ياليلة غدرى وفيها القمر غاب=مشى بها الساري وخلى دليله
قلبي شكا ياناس من ضيم الأصحاب=في وسط جوفي مثل جمر المليله
ماغمضت عيني ولانومها طاب=وبيني وبين النوم جفوه طويله
ياضيقة بالنفس والقلب مرتاب=والحظ جافاني وروحي عليله
يابوحمد دونت أنا اليوم بكتاب=كل ماطرى لي في زماني ومثيله
وضعي ترى في كل الأحوال منصاب=وهمي عجزت أني لحالي أشيله
يقطعك يادنيا بها زود الأتعاب=في رفقة اللي خان وأنكر زميله
نعز ناس وآخر الوقت ننصاب=منهم ونجمع للندامه حصيله
يقطعك يادنيا بها ظلم الأقراب=فيها ردي الحظ يومي بذيله
ترى الردي عده مع شلة أذناب=يبحث خفا وعيوب ناس جليله
وراعي النميمه دوم تلقاه كذاب=هرجه كثير ولا تصدق قليله
تلقاه يسعى للردى دوم طلاب=وفي مجلسه دايم علومه رذيله
الله يادنيا بها عد وأحساب=دارت وراحت بين يوم وليله
يابوحمد خذها مع ذكر الأسباب=هذا كلامي أسمعه لو قليله