يابوي في صدري هواجيس وهمـوم=واللـي بـرك للحمـل لازم يشيلـه
قد لي شهر ما ذاقت عيونـي النـوم=ياكود غفوة ذيـب فـي كـل لليلـه
ادور الراحه عسـى خيـر مقسـوم=وشلون صارت راحتـي مستحيلـه
يابوي وانت اسمك مقـدر ومحشـوم=وان تاهت اقدامـي تـراك الدليلـه
تعبـت وانـا قبّـل جبـاه وخشـوم=واجامـل اللـي مانفعنـي حصيلـه
صارت حياة الناس من يفرق السوم=واللي ما معه فلـوس ياعزتـي لـه
قلّوا هـل النامـوس ذبّاحـة الكـوم=وكثـروا مـزودة الهـروج القليلـه
وزادوا هل النمّـات طـرادة اللـوم=هذا تحكي فيه وهـذاك تحكـي لـه
وشفنا شيوخ الاسم من غير مرسـوم=اهل البشوت اللـي كممهـا طويلـه
لو انهـا بالسيـف ومناطـح القـوم=ومداحـم الفرسـان يـوم الدبيـلـه
في ذمتي ان تشوف شجعان ورخوم=وتشوف بعض الناس يومـي شليلـه
لكنهـا شيخـة دنانـيـر وخـتـوم=وشيخ الدراهم فـوق شيـخ القبيلـه
وانا اعرف ان الناس معطى ومحروم=واللـي كتبـه الله لعبـده يجيـلـه
لكن مهمـا عـاش لابـد لـه يـوم=يحـط وسـط الحفـره المستطيلـه
وانا لانـي ظالـم ولانـي بمظلـوم=لكـن علـي حمـول بقعـا ثقيـلـه
آجابـه الدنيـا ولانــي بمـلـزوم=اطرد ورى بـرقٍ سـرى فالمخيلـه
والله ماغبط الا كريـمٍ لـه عـزوم=المـال عنـده والنشـامـا تجيـلـه
وفي مجلسه ذا داخل وذا يبي يقـوم=وكـلٍ عقـب كرامتـه يدّعـي لـه
هذي هي الغايـه لكـن والله علـوم=ما كل غايـه يوجـد لهـا وسيلـه
والله ما يشحنّي راع الكبـر والـزوم=وراع الجميل اللـي يمـنّ بجميلـه
الطيب يتعـب كـل قـرمٍ وشغمـوم=ومايكسبـه راع اليميـن البخيـلـه
ورفيقـي اللـي مانفعنـي ولا يـوم=اخير مـن رفقتـه شـوف الحليلـه
ورفيقي اللـي فالشدايـد معـي دوم=نـذرٍِ علـي انـي مـادور بديـلـه

المشاركة الأصلية كتبت بواسطة المهلب (المشاركة 296104) أبيات في غآآآآآآآآية الروعة والجزاله .......وشكرا لك أختي على النقل .