لايابعد كل القرايـب والأصحـاب=غيرك فلا له وسط قلبـي مكانـي
لاتنخدع في هرج حاسـد وكـذاب=ناس تشب النـار سـرّ وعلانـي
تسعى بتفريق الولايف بالأسبـاب=من حقدها تمشي بهـدم المبانـي
يفداك طيّبهم رغـم كـل ماطـاب=ويفدونك الغالين قاصـي ودانـي
ويفداك قلبً بأصدق الحب لك ذاب=يذوب في سحر الغـلا والحنانـي
عقبك جميع الناس بعيوني أغراب=في غيبتك ربـي عليهـم حدانـي
في غيبتك طيفك معي حيّ ماغـاب=ماغاب عن ناظر عيونـي ثوانـي
ماقبل حبك ياحبيبي لـي أحبـاب=ولا عقب حبك حـبً أول وثانـي
كل مامضى قصة مراهق ومرتـاب=يكتب على الجدران بعض الأغاني
يرسم قلوب مع تواقيـع وألقـاب=تلفت نظر بعض البنات الحسانـي
بس يدّعي قدام ربعـه والأقـراب=ويقول عند البيض عنتر زمانـي
من جيت بطّل من تخاريفه وتـاب=قام يتغنـى فـي جمالـك لسانـي
ياشيخة الزينات وش جابك وجاب=والله مامثلـك تـكـوّن وكـانـي
لاوالذي نزل تبـارك والأحـزاب=ماغيـر حبـك خمنـي وأبتلانـي
منزلك في عيني تغطيك الأهـداب=وحبك تمركز بين حدب المحانـي
في بحر عينك لي مقـر وترحـاب=القى بها المرفأ وعـذب الأمانـي
نجل العيون اللي بها الموت ينساب=لاطالعتني جـات عشـري ثمانـي
ترفع لها القاب وتخضع لها رقاب=ويطيعها قلـب تبعـك وعصانـي
سلطانة بالحسن والحسـن جـذاب=سلطان حسنك في محيطه خذانـي
صحيح لاقيل الهوى حيل غـلاب=يغلب على الرجال لو هو حصانـي