تفكرت الى نور الديار رجالها=هم نورها وثغورها وجمالها
هم سترها لا من نصوها هل النضا=لاجن مع فجٍ تسوج حبالها
يثني عليها لاجل خطو الخير=ويكسونها بالذم لجل ارذالها
ان كان هم فيها كسوها بالثنا=والا كسوها بالملام انذالها
ادخل على الله عن ملامة معسر=لا عاد ماله حيلة يحتالها
ما يستحق الذم غير منهو=تقصر يده والمرجله ما نالها
بالناس من حط الصخا له قسمه=خذا السمين وكب عنه هزالها
وبهم من اخذ الراى واقفا رابح=ياما يسدد من دروب خمالها
وبالناس من حط الشجاعه مغنم=نعم بمن يصبر على غربالها
وبالناس من حط النميمه مقسم=خذا الرذيله كلها وحثالها
اما الشجاعه قسمتين شاعن=عليا وسفلا واخبرك باحوالها
القسمة العليا شجاعٍ على العدا=يرخص ذبيل الروح عند قتالها
والقسمة السفلى شجاعٍ على الدنا=شلفى قصيره في نحر نقالها
هذا فلا تحزن عليه الى ذهب=نفسه على الرب الكريم زوالها
هذي تواصيف الرجال أبديتها =اما الديار اخبرك انا بحوالها
قس الديار على الوقار براحه=مستبطن في جودها وخمالها
قس بنفسك لا تقوس بغيرك=ولا يغرك كلمة من قالها
ان كان حكام الديار فهودها=وسودها وكبارها عقالها
فلا تبدلها بمنزل غيره=العز تهيا له وهو يهيالها
وان كان حكام الديار قرودها=ونحوسها وخساسها عقالها
اقول بدلها بمنزل غيرها=ولا تسيع في يدى نزالها
دع ذا وقافيها ثلاث خصايل=خصايلٍ يمدح بها فعالها
الاولة فكت ذويد لصاحب=من الحفيف وصاير عقالها
والثانيه توجيهه في زله=طمرتها واقفى بها من جالها
والثالثه عز لجارٍ نازل=لو هو عياله مكثرين خمالها
هذي تواصيف الامور فهمتها=أما الحريم أعلمك بخصالها
منهن مدلهت الفؤاد مطيعه=وجه سميح دلها ودلالها
ومنهن خضرا جنب عنويه=تحضر لعز رجالها وعيالها
ومنهن حيزا من الدنس محميه=وسط المحاظر يقلطون رجالها
ومنهن مصباح البيوت عفيفه=زين على فعل وصار احلى لها
ومنهن عفرا زينه مشهيه=ماقت ونادا زينها لخمالها
ومنهن مكملة العبات برجلها=تعدي ومرن بالحكي يعدالها
ومنهن عابا عاهة ملوية=مخلوقة من لا وخلقة اللا لها
ومنهن طايرة النظر رغوية=قطعن بشوف اقفايها واقبالها
ومنهن غبرا قدة مشوية=تجمح ولايسترجعون ارجالها
ومنهن دويبة فارة منزل=تخش عند الناس قوت عيالها
اختر على ما لاق لك ياسامع=ومن هو برك للحمل شال اثقالها
والختم صلوا للنبي ياللي حضر=عد النبات وعد وبل خيالها