::: مـنتدى قبيلـة الـدواسـر الـرسمي ::: - سالفة وقصيدة ( عزة النفـــس )

السلام عليكم ورحة الله وبركاته

مساكم الله بالخير جميعاَ

اهني اخواني واخواتي الطلاب والطالبات بمناسبة نهاية العام الدراسي

ونقولكم مقدماَ للي ناجحين واللي راسب خيرها بغيرها وش انت مستعجل عليه لا فيه وظايف ولا شي

وسعو صدوركم وخذو السنه بسنتين ههههههههههه

<<<< الله من زين النصيحه

وكذالك اهني المتزوجين والمتزوجات بمناسبه حلول الاجازه الصيفيه ونقول الف مبروووك وعقبال البكاري

>>>> وعقبال عزاب وعازبات المنتدى

واللي متزوج نقوله عقبال الثانيه والثالثه >>>> ما عندكم احب من هالدعوه

<<<<< اخلص عطينا القصه

يقول الراوي ياساده ياكرام

7
7
7

هذي سالفة يرويها الشاعر سويلم العلي السهلي رحمه الله يقول حنا سنة من السنين وافق عندنا ربيع ونازلين في

هكالجو يحدنا من شرق ضلع مطاول من الجنوب للشمال نازلين بمحل ربيع أرضه طيبة بالحيل , يقول جينا

ونزلنا في طرفها من الجنوب ومعنا غنم وحلال ويوم قعدنا لنا مدة وينزل عنا شمال ناس وعنا غرب ناس ومن

كل عرب نازلين حولنا لكن حنا اللي أطرفهم من جنوب يقول العرب هذولا أكثرهم عندهم حلال ورعيان

ويرحون منا يمين ويسار وإذا جا الليل بعض المرات يسير بعضهم على بعض هالعرب يعزمون بعض والى فيه

ناس توهم نازلين ومن شمال ويوم جا مرة من المرات توافق عزيمة عند القريبين ويعزمونا ونروح لهم أنا وأبوي

وقعدنا عندهم وراعي البيت يرحب وإلى عنده حريم وله عيال ما شاء الله واجد وقاعدين يصبون القهوة في بيت

الشعر ومستانسين ويسولفون وسالفة تدور وقهوة تجي وقهوة تروح الحاصل إن المعازيم راحوا وتفرقوا وطلعت

أنا وأبوي وبطلعتنا والى تمر ذيك البنت بنت لراعي البيت عليها جلال وتسوق الغنم بنت متعافية وجميلة جدا

يقول وأنا اللي أنصاب من هالبنت من أول نظرة يوم شفتها بس معي أبوي ولا اقدر أقول شي ( ايه تعرفون

تبلعون العافية إذا جا معكم احد ) ومرت الأيام ونتوافق على ماردا وعلى السيل والى البنت فعلا غاية في الأدب

والجمال حتى هو كلامة دمث وأخلاقه طيبه هذا كان عفه العرب وسلومهم حتى لو لقى بنت وما عندها أحد

يكلمها كلام عادي ويمزح مزح شريف وعفيف وتلقاه يسولف مع البنت وهي بعيدة عنه , وتمضي الأيام وتخافت

البنت دمه وشافته حليل وصار دايم يفكر فيها ويشوفها وإلى جا الليل صار يهوجس فيها وليت من يزورهم وليت

من يروح بس ما يقدر يروح لكنهم يشوفون بعض دايم ومضت مدة وبدا هالربيع الي هم فيه يضعف شوي ودايم

العرب يتابعون حلالهم ويرحون يمين ويسار وإلى الجبل اللي يحدهم فيه طيور وفيه ملازم ماء فوق وهو ضابط

مكانهم ,

ويوم جا يوم من الأيام عقب مدة بعد ما توافقوا كم مرة ودائما البنت الذكية إلى وافقت مثل هذا حتى لو مهوب

من عربهم ما تبين أنها ما تبيه تمنيه وتعلقه وتخليه معلق بخيط أرهف من الشعرة وتقوله أنت حبيب وطيب وأنا

ما شفت أحسن منك ولا أحسن من أخلاقك ويتعلق هو ويحسب هالحكي أنه صدق وهي تسنع خبزتها ما دام أنها

هنا علشان لا سمح الله ما يصير عليها اعتداء يصير المسأله حب شريف وهي على اللي هي عليه هي تلقاها في

فكرها أما موبدة لها ولد عم وإلا واحد قريب مهوب معقول تبي تعشق واحد من بعيد وتأخذه ولا هوب العلم

عندها العلم عن أهلها .

الحاصل يقول يوم جا يوم من الأيام وأعدي على هكالضلع جبل رفيع وأمشي وأطالع وأشوف يقول ماقدرت

أشوفهم ولا أستكشف المنطقة هذي إلا اذا عديت هالضلع ويوم رقيته وإلاني أشوف الناس يشدون اللي يروح

شمال واللي يروح غرب شادين كلهم وأقرب عن مكان الطيور ويوم طالعت وبرقت زين وإلى والله هذولاهم

يشدون يطون كل شي بيروحون وإلى كل هذيك الأيام يفكر ومعجب فيها من لباقتها وعلومها وأنها ما تسمع كلام

أحد ورايها براسها وياصفها وياصف جمالها يمكن أنه لا محها وشايفها ( المحه ذبحه ) عن قريب أو من ورى

البرقع طيره الهوى المهم انه شايف شي ( ما تخلون المناظر ) ويقول عاد قلت الأبيات هذي

يوم عديت في راس الطويل العسير=دوني الطير خفاق الجناحيـن حـام
بادي فيه اطالع وين قـاد النشيـر=احد قـاد قبلـة واحـد قـاد شـام
آه وا قد قلبي يوم قـض الحجيـر=كن قلبي يقد بحـد بـاري العظـام
كن قلبي يقد بحـد مـوس شطيـر=اثر راع المودة لاشكـى مـا يـلام
المصيبة إلى جا الليل عقب الأخيـر=كل ناظر ينام وناظـري مـا ينـام
كيف ابنسى وليف ما استمع للمشير=ما يطيع الخوال ولا يطيـع العمـام
مع لباقته علومه فيه زيـن غزيـر=قرن ضافي ووسط خافـق ياسـلام
المطوع إلى منـه نظرهـا يحيـر=تفتح ابصار عقله ما يـرد الكـلام
خده اشقح عفر وصفه تقل به ذرير=نور خده يقادي نور بـدر الظـلام
والشفايا حمر تشدى سلوك الحرير=والثنايا تلالا بيـض حـدر اللثـام
اشغل القلب ياالاسلام طيـر يطيـر=باللحن يالله انـك لا تعيـد الحمـام

ويقصد في ( اشتغل القلب ياالاسلام طير يطير ) يا العالم يا المسلمين يا ناس , راحوا وشدوا وابعدوا وصار ينشد

عنهم وإلى ما عندك أحد ومدري من جاب له العلم قال هي ما سألت عني قال ياحليلك الحين تصدق هذاك أول

يوم أنك قريب عندها لكن إذا بعدت وغابت العين عن العين ما عاد يمدي يرحون الناس ويلهون في أشغالهم , قال

بس أنا متعلق فيها وفي حبها وأثرهم راحوا ونسوني وهو يقصد ذيك القصيدة بعد مدة ويقول فيها :

يامل قلـب كـل مـا نامـوا النـاس=من الليل ياخذ ربع ساعـة وياعـي
فإلى وعا جته الهواجيس مـن راس=وقام يتقلـب فـي فراشـه وياعـي
ولـولا ضلوعـي للمعاليـق حبـاس=لافوع فوعـة واحـد مـن قطاعـي
قطيع غرب وغطلس الشوف الادماس=بارض خمال وخارشتهـا السباعـي
ودلى يلـوج وكـل اشافيـه يبـاس=وتاه الطريق وراح فكـره ضياعـي
وجنه سباع مع سنـا الليـل غـلاس=مستفرسـات وممسيـات جيـاعـي
صكن عليه ومزعن عنـه الألبـاس=يشـل دمـه مـع طمـان ورفاعـي
لين اودعن ثربـه برجليـه ينحـاس=عند الضـواري راح مالـه شفاعـي
يا أهل النضا ياللي على كوار جلاس=بتـر الفخـوذ مذلقـات السمـاعـي
شعل مواشعهن مثل شاهـي الكـاس=مـدربـات بالسـهـل والجـراعـي
اليا سربن مع صحصح تقل قرطـاس=مع عرضة الزيزي يجيـه الجلاعـي
ريضوا لعلـه مـا يريضكـم البـاس=عوجوا لي ارقاب النضـا بالوقاعـي
وشيلوا وصاتي للغضي عذب الاجناس=اللي مع المرسـال وصلـه جزاعـي
لا جيتوا المجمول مدقـوق الالعـاس=مدملـج العضديـن زيـن الذراعـي
قولو تراها قطعـت عنهـا الارمـاس=يطوي العـزا وأنـا كـلاي دواعـي
من باعني بعته وأنا قاسـي الباسـ=يحتـى واصـد بناظـري لا يراعـي
لو أن كبدي كنهـا فـوق محمـاس=عزمي قوي مانا خطـات الزعاعـي
ياعين هاتي واطوي الصبر واليـاس=معطيـك مهلـة دامنـا بالوسـاعـي
اطوي عزاك وترسي كـل هوجـاس=ما ظنتي عقـب الفـراق اجتماعـي

تقبلوا احر تحياتي

ابن كعوت المسعري