يا سعود ابن فراج ابشر عسى خير= رسالتك وصلت بعطر وتحية
سموك بأسم سعود وسقنا التباشير= يا معرب الجدين ما امك همية
ماكر حرار وفيه فرق ن عن الجير = زايد وتغلب عزوتك والحمية
ان كان تطلب نصح من هو لك ايشير= باعطيك من زبدة حياتي هدية
الاوله: طاعة ولي المقادير = الواحد المعبود رب البرية
واتبع هدى الداعي برحمة وتبشير =محمد المرسل من الله نبية
وثاني: الوصايا وف من دون تقصير= واعلم ترى التقصير فيها خطية
ابوك وامك دون البشر حقهم غير= اعطوك مهجتهم فرد الجزية
والثالثة: وصل القرابة بتقدير =الوصل يوصل من حباله ردية
والرابعة :السانك كما الدلو للبير =الرجل منطوقه يبين خفية
احذر من النمة وقول ن بتزوير=كم كلمة ن تورد لحوض المنية
والخامسة :يوصيك خالك بتحذير= اعلم ترى الصاحب ساحب خويه
من رافق اهل الطيب يحشم بتوقير= ومن رافق الانذال شاف الرزية
وخلك صبور للحمل كانك بعير= اصبر ولا تبدي لغيرك شكية
وارقى بصيتك فوق روس المقاصير= يمشى معك مثل الهبوب الندية
هذي وصية واحد ن فيه تقصير = ارسلتها لشخص ابوية سمية
وصلاة ربي عد وبل الشخاتير= على محمد الهادي خير البرية

وصلاة ربي عـد وبـل الشخاتيـر===على محمـد الهـادي خيـر البريـة