حي الكتاب اللي من الحيد ناصين=حيه عدد رمل بنته السوافي
فيه القوافي الراجحه بالموازين=تفوق في نظمه قصيد الرصافي
كالولو الزاكي غزير المكامين=من لولو التيجان ما هو عذافي
يا مرحبا به و التحية هلاوين=أهلا هلا و أهلين حيها قوافي
حيها عدد ما يثمرن البساتين=و حيها عدد من هو مشى بالمطافي
و عداد ما ركبوا على الهجن غازين=و عد الجراد و عد باين و خافي
ساعة قريته هلّ دمعي من العين=الله يقدرنا لفضله نكافي
قم ياحمد (1) و اركب على أم الجناحين=طيارة تطوي بعيد الفيافي
في لحظة توصلك دار الوداعين(2)=أهل الثنا و الجود و الكل وافي
ملفاك عز الدار و الجار و الدين=اللي شهر ذكره و بالعهد يافي
بوزيد (3) وارث طيب شمّ العرانين=قبيلة بالجود فعلهْ يشافي
عبد العزيز الطود سقم المعادين=و مع فضله المشهور حلم و عفافي(4)
سلم عليه و كل هاك المحبين=سلام أحلى من شراب الصوافي
واخنْ من ريحه زهور الرياحين=سلام مشتاق لك الله مصافي
و قله ترانا بالسعد مسفهلين=بخير و توفيق و عز و عوافي
في ديرة ما مثلها في البلادين=ديرة معطرة السيوف الرهافي
و الله ما رحنا من الوطن(5) جافين=و حسودنا ما هو لغله بشافي
و عدواننا من الناس دايم ذليلين=و حنا بنحر الضد سم زعافي
و لو لا فراق اللي علينا عزيزين=اللي مراجلهم تقافا تقافي(6)
إني لبيع الدار بارخص تثامين=بيع الرضى ما فيه بعض الحسافي
الموجب أمر ما خفي يالفهيمين=اذنابها تقدم و روسه خلافي
الديك في ذا الوقت يطعن برمحين=و الظيغم الضرغام يخشى و يخافي
آخر زمان فيه ما يقزي العين=الحر في ذا الوقت صابه عجافي
ارجي عسى من عقب ذا الشر والشين=أنذالها تخذل و تلبس غدافي
و ختامها بأزكى صلاة المصلين=على النبي الهادي امام الحنافي