هب يا الازهر بعد زاد ارتفاعه = الدكاتر فيه صاروا عربجيّه !
صرح ديني مير من راسه لقاعه = ما يقوم إلاّ على حسنه وسيّه
آخر الصيحات فتوى للرضاعه = من وسيع المعرفه عزّت عطيّه
قال يوم أنه لبس ثوب الدناعه = وشمّ ذعذاع الرياح الموسميّه
الزميله في عملها وبشجاعه = تنحني للي يزاملها شويّه
ترضعه من صدرها لو ربع ساعه = لين حتى تصبح الخلوه نقيّه !
قام يعرضها مثل عرض البضاعه = خالف وتعرف .. وسوّا له قضيّه
ول يا استاذ الاحاديث المشاعه = قمت تنقز بالسريعه والبطيّه
انت لو عندك عن الدنيا مناعه = ما تلوّا بين ذيك وبين ذيّه
لا تدوّر عندنا سمع ٍ وطاعه = ديننا محفوظ من رب البريّه
علة الشيخ المسمّى في نخاعه = يفتي وقلبه كبر قلب المطيّه
مير يا ليته يعلّق من كراعه = بين برج المملكه والفيصليّه
الفتاوي من مشايخة الصياعه = لاهي من الله ولا هي عن نبيّه