السلام عليكم ورحمة الله

أخواني اداره واعضاء وزوار يشرفني اضع هذه المتواضعه بينكم وعسى ان ترتقي الى ذائقتكم

قصيده تشرفت والقيتها في حفل الصخابره في مدينة الرياض

يالله المطلوب يالواحد الفرد الرقيب=بأسمك أبدى بالمعاني واجيب أجزالها
شاعرٍ وأجر طرقي على كيفي وأجيب=البيوت اللي أتطول وجه من قالها
والمثايل يأهل العرف والله ماتطيب=غير في قومٍ تنومس فعول رجالها
وكل شاعر مايعبر على موقف عصيب=لاتصح لسانها ولاتطيب امثالها
استمع مني قصيده وخذها يالنديب=للرجال اللي تهولك بزود افعالها
يوم ابن عواد وقف وله صوتٍ صليب=ورد علومه وحنا لها حنا لها
صاح مما في ضميره من الجرح العطيب=ولجت ذيابٍ تبج الخطر بأحوالها
جاتك رجالٍ تجي من بعيد ومن قريب=تنقل الحمل الثقيل وتحل أشٍكالها
لين فكوا قيد مطلوب من يد الطليب=في خلال أسبوع بأيامها وليالها
خمسه وعشرين مليون والموقف صعيب=خلصوها ربعي اللي تتم اقوالها
والله اني ضعت بين المنادي والمجيب=ذا يمد وذاك يزهم وكلٍ شالها
ذي عوايد لابتي لاعوى ذيبٍ لذيب=ترخص النفس العزيزه وترخص مالها
نوم عيني فعلكم ياملطمة الحريب=ياموطية المعادي بضرب أسلالها
يامزبنة الجلاوي مدلهة الغريب=ياجمال الحمل بأخفافها واثقالها
دورنا كلٍ يعرفه لأبن عم ونسيب=والأمور الكايده لابتي تحتالها
لابتي تآسم عصا الجار وتعز الصحيب=ويآمن اللي من عدوه زبن في جالها
لابتي اللي يفرقون الحبيب من الحبيب=لاأحتمى هوش النشاما وزاد قتالها
نعم في كل القبايل بلا شكٍ وريب=الأوادم تختلف بأختلاف أعمالها
ولانسيت اللي حوى كل مجد وكل طيب=الأمير اللي نقل دقها وأجلالها
اللي ليا منا زهمناه لايمكن يغيب=والمراجل كلها شاربٍ فنجالها
ذاك أبو تركي عريبٍ ومن مجنى عريب=من حرارٍ قمة المرجله منزالها
والفخر والطيب ماهو من الطيب غريب=ولايوقف للصعيبات غير أبطالها
أكتبي ياصفحة المجد وأسمع يالبيب=فعلنا يوم العرب تفتخر بأفعالها
والقوافي كان ما جت على موقف عصيب=لاتصح بيوتها ولاتطيب أمثالها

وسلامتكم