يقول من يدرى كلامه عن اللوم=ما يشتـقيـبه لين يلقى مجاله
لا من بداله لازم ٍ فيه ملزوم=ياخذ من سمانه ويترك هزاله
للعرف باب وكل علم ٍ له سلوم=والطيب وقفه والحميه شكاله
واللي يسد النوب فالواجب يقوم=لا نصي امر ٍ يلزمه قال انا له
وطبع الزمن باحداث الايام مزحوم=في كل حين يدور دور المحاله
على كثير الناس غاراته سهوم=ما بين ميلاته وبين اعتداله
ولا بكلٍ من خطاء النفس معصوم=ولا كل مخلوق ٍ زمانه صفا له
وعزيل من لا له بوسط العرب قوم=يكبر مطيحه لا جذت به احباله
واللي ربوعه ندر ٍ دايم الدوم=يبشر بسعد العين في مابداله
يوم ان ابن عواد ماستر بالنوم=حارب لذيذ النوم مما جراله
امر ٍ من المولى مقدر ومقسوم=حكمه صدر في واحدٍ من عياله
ما لذ له شربٍ ولا لذ مطعوم=يرجي جليل الملك يلطف بحاله
ويوم الله انقذ نفس من عد معدوم=وخلاه عقب الظيق ينساح باله
نادى بني عم ٍ مشاكيل وقروم=كل ابلج ٍ يحري بكسب الجماله
حميةٍ نادى بها خص وعموم=من ثقل ٍ حمل ماقدر باحتماله
وجاوه ربوع ٍ للوفاء تفرق السوم=ومن الدواسر كل شهم ٍ عناله
وقفّ بجنبه وانتخى كل شغموم=واصخا بدفع المال من حر ماله
خطلان الايدي هم حجا كل مظيوم=ومن المفاخر كسبهم كل طاله
وقفاتهم ما توها تعرف اليوم=في ما مضى وقفات جود وصماله
بسلومهم كم فرجوا هم مهموم=وبافعالهم كم صدروا كل قاله
امدح هل الفزعات ذباحة الكوم=اهل الشيم واهل القيم والجزاله
وانا اعرف ما قلت للناس معلوم=قلته وقبلي ناطق الصدق قاله
ويبقى الولا لله والدار محكوم=دار ٍ سعوا بحماية ارضه رجاله
فيه الامن محفوظ والشرع مقيوم=سنة نبي الله وحكم العداله
لا فيه لا ظالم ولا فيه مظلوم=لا تفرقه من بينا لا جهاله
من يتبع درب الهدى فيه محشوم=ومن زل درب الحق ياخذ نكاله
من يوم كنابه الى عهدنا اليوم=ننعم بفظل الله بخير وسهاله
ذا قول من يدرى كلامه عن اللوم=ما يشتـقيـبه لين يلقى مجاله

وعزيل من لا له بوسط العرب قوم=يكبر مطيحه لا جذت بـه احبالـه
واللي ربوعه نـدر ٍ دايـم الـدوم=يبشر بسعد العيـن فـي مابدالـه
يوم ان ابن عواد ماستـر بالنـوم=حارب لذيذ النـوم ممـا جرالـه