يا ونتي ونّة سجينٍ بأبو غريب=من قبل لا يذبح يتمّ اصلخانه
تقفّلت بيبان صدرٍ مواريب=أقبل علي الهمّ من كل خانه
ذقت العذاب و ما صِفت لي مشاريب=أبي الأمانه و طْلَعت لي مخانه
واجهت لي حظٍّ عطيب المضاريب=منين ما لدّيت ثوّر دخانه
قلب العنا ما تتّعظ للتجاريب=كم واحدٍ ينهض برغم ارضخانه
و لولا الرجاء ما كان نصب المحاريب=و الطب ما هو دايمٍ بأقزخانه
و العمر لأقفى ما تفيد التداريب=و الجرح يكبر بالشّماته ثَخانه
أبأنصحك لله تبعد عن الرّيب=و لا يغرّك في الزمان إنفخانه
الصّبر نصرٍ للنفوس المكاريب=و الحرّ لا ضاقت شلع بكْفَخانه

عبدالله الحقباني (أبوصالح)