يا ما حلا سج القدم مع هل الجود = في خايع يشرح صدر كل من جاه
في خايع ما داج به كل نمرود = والنذل دونه يا عرب تقصر خطاه
في قطعة خضرا ومن حولك الذود = والعشب غطا الارض والذود ترعاه
مع نشاما طيبهم ماله حدود = حيث ان راع الطيب تظهره يمناه
شرواك يا المنعور يا صاحب الفود = راع الفخر نسل الرجال المسماه
الجود و النوماس له ترثة جدود = حر على روس الطويلات مرباه
ظافر ليا منه مشا مشيه اسنود = رجل على طيب المبادي عرفناه
نسل الرجال مزبنة كل مضهود = سبع من سلالة اسباع مضراه
قرم رقا العليا وله فعل مشهود = يا الله عسى الرديان واللاش تفداه
الصدق ساسه والفخر فيه موجود = ساس الكرم والعز والمجد والجاه
شاعر محنك صيرمي عد مارود = الشعر يفخر به ومثله وشرواه
الابيات في مثله كما لولو منضود = و ما قل دل وزبدة القول معناه
يا الله يا منان يا خير معبود = الواحد اللي تسجد الناس لرضاه
تحفظ مناحي منبع العز والجود = و با الخير يارب المخاليق تجزاه
أرث لنا ظافر كما السيف مجرود = وقت الشدايد طيب الصيت تلقاه
بعض العرب لا راح بالحيل مفقود = لانه كريم و يعجبنك سجاياه
وبعض العرب لا راح ما عنه منشود = لا راح جعله روحة مقيط و رشاه
و الختم صلوا عد ما حنت رعود = على نبي كلنا نتبع خطاه

بعض العرب لا راح بالحيل مفقـود=لانـه كريـم و يعجبنـك سجايـاه
وبعض العرب لا راح ما عنه منشود=لا راح جعله روحة مقيط و رشـاه