السلام عليكم ورحمة الله وبركاتة

أخواني الأعضاء والزوار

كيف الحال جميع

هذه قصيده قلتها في فوز حسن بن شايع بن هذال بن وقيان الشكره في مزاين ام رقيبه بفئة المجاهيم وحصوله على المركز الخامس وكما تعلمون اخواني ان مزاين ام رقيبه مزاين عالمي ولايدخله الا منافسون اقوياء وكذلك فوز حسن بن شايع فالمركز الخامس يعتبر نصر وهو أول مره يشارك بالمزاين يعني قدر يثبت وجوده وكما تعلمون ان فئة المجاهيم عليها منافسة قويه جدآ من خارج وداخل المملكه لاأريد ان أطيل وأترككم مع القصيده وعسى ان تحوز رضاكم

يالله يلي خالق أنس(ن) وجاني=يامنزل القرآن والتبياني
أنك تعز الدين ياذا الجلاله=وتدمر المشرك مع النصراني
ألوذ بك يارب وأرجيك عطفك=وأرجي العفو منك مع الغفراني
من بعدها هاضت هجوس المغني=وغنيت من بدعي ومن قيفاني
شاعر ولي في كل مرقاب رايه=وأن مادعيت الشعر وألا دعاني
أصخر بيوت القصيد المقفى=وأكب هزلاها وأجيب السماني
واللي مهيضني لبدع القوافي=طولة أبن عمي عريب المجاني
حسن أبن هذال ياكبر صيته=ياجعل يفداه الردي والهداني
حول على أم رقيبه اليوم وأعلن=أن النصر والفوز لي قد حاني
فالمركز الخامس يذيعون بأسمه=يستاهل الناموس والعرفاني
أول مشاركته وبين وجوده=ويويلكم لاجا الزمان الثاني
يويلكم لآجت سنين(ن) مقبله=كل يخبي منتج الحيراني
ولو كان أبو فهاد فيها حاضر=ماكن خذاها فلان ولا فلاني
لكن أتآكم واحد يطرب لها=يسوق فيها غالي الأثماني
مايشتري ألا المجهم الدوسريه=اللي غلاها بين عوج المحاني
فنس الخشوم أم السبال الظافيه=عريضة الخده حراب الأذاني
جرد الرقاب أم المتون الرفيعه=طويلة الغارب هوى السلطاني
فجح(ن) قوايمها كبيرة مواطي=سنامها مفهوق والشحم باني
وكنها ألا منها مشت أو وقفت=مثل السفن وألا كما الضلعاني
ولاشفتها قدام عيني درهمت=أتعوذ من أبليس والشيطاني
الله يحرسها من عيون حاسد=اللي مايعطي خير لايبلاني
في ضف راعيها تشوف المعزه=طير السعد ومعشي الضيفاني
جده سنام الطيب والطيب جده=تشهد بفعله مجمل العرباني
وعبدالعزيز الفيصلي من شهوده=زعيم نجد موحد الأوطاني
كريم سبلا مدته معروفه=خمسين عام(ن) يشعم النيراني
(ياباني بيته على مفرق الطرق=وياما خذا ضيف الاحمر بالضماني)
يقوله اللي شاف بالعين جوده=قد قالها عبدالله القحطاني
وأنا أقتبست البيت هذا ياساده=دليل في جوده عزيز الشاني
وأن جيت أبا أمدح لابتي في جابتي=أجيب بيتي وافي(ن) ملياني
حنا هل الست الركايب حنا=لا ثور البارود والدخاني
وحنا هل الخمس الركايب حنا=آلاد شكر مزبنين الجاني
وستة رجال مننا ياطيبهم=ردوا عقيد القوم والفرساني
منهم أبن عزرم وخمسه غيره=والكل منهم أعبر من الثاني
كل تعزوى بالملاقى وأحتمى=وطاح0000وأتقى000000
ويوم العريق أفعالنا تشهد لنا=جينا فزع وأنكسروا00000
وفي شعب طلحا لاد شكرآ بينوا=ردوا صخاف الشول مالل00000
ويشهد لنا فيحان سمي بالاحمر=رقنا الدماء وسالت الشعباني
أفعالنا واجد ولا أحصي عدها=أفعالنا تعرف لقاصي وداني
وكل القبايل نعم فيها وافيه=مافيها لاقصور(ن) ولا نقصاني
لكن بماري بفعل ربعي وأفتخر=من طيب راس وخاطر(ن) طرباني
وقبل أختم هذه القصيده ياحسن=بأوضح أسمي في جزيل المعاني
منذر حمد جدي رشود بن حمد=والنعم في جدانك وجداني
حقك علي أجيك وآصل محلك=وأسمعك من بدعي وقيفاني
بيوت ناظمها وأنا متشوبش=ومن صادق أحساسي ومن وجداني
أقولها ولا أبغي جزى من وراها=وألا الجزى لاقلت صح لساني
وعقب صبي(ن) مايتنومس بربعه=هذاك يقعد مقعد الحقراني
تمت وصلى الله على سيد البشر=أعداد ماهل من السماء وداني

وسلامتكم