يالله ياللي فوق الأمة تعاليت = ياواحدٍ فوق المخاليق عالي
ياإمنزّل القرآن ياحامي البيت = لاتترك إلعدوان دينك مجالي
نجّيت ذا النون بن متّى بتوقيت = من بطن حوتٍ في ظلام الليالي
وعقب البطا يوسف ليعقوب ردّيت = وأبصر بعد ماكان للشوف خالي
نوّر عليّ القبر لامن تواريت = وسطه وحيدٍ جالسٍ به إلحالي
الربع ردّوا في إعبار وتناهيت = ومازلتنا أسمع صوت قرع النعالي
وأقبل علي اثنين يالله بتثبيت = للقلب لامني سمعت السؤالي
واسعد عيني كان للخمس صلّيت = وصمت ارمضان وصمت بيض الليالي
والفرج محفوظٍ وحجيتنا البيت = والبطن مايدخل به ألا الحلالي
وحفظتنا سمعي وللشوف غضّيت = وزكيتنا مليون وألا ريالي
وبالوالدين احقوقهم ماتوانيت = ربّوك وأفضولك غزير الدلالي
في عقل من لا يكثر الذكر شكّيت = لويلبس اشماغٍ ويلبس إعقالي
لانام خبلٍ تالي الليل ناجيت = من يجمع إعظامٍ ولوهي بوالي
يالله عسى مانيب للنفس زكّيت = وهي خطاياها تفوق الجبالي
إن مارحمني والي العرش ردّيت = من دون عفوه مالعبده مجالي
وصلوا على محمد عدد من لفا البيت = وإعداد ماضمّت إطعوس الرمالي