وجودي على بدوٍ رعوا حومة النقيان=رعوا في جديد العشب لازاف زملوقه
وجودي على شوف المعاشير والحيران=تباري مظاهير على القفر مسيوقه
نصوا مرتعٍ فيه الخزامى مع المكنان=ينز الندى به مابعد يبست عروقه
وبنوا بيوتٍ واستقلت كما الحيطان=تراها حياة الروح والنفس ملحوقه
وشب المناره متعب البن في الرسلان=وتلافوا عليه اللي يحبون منطوقه
حمس طبخةٍ تقعد خوا الدايخ العمسان=ولاهيب لانيه ولاهيب محروقه
نكبها بنجرٍ كلما ضرب زاد اجنان= الا من ضجر كن صوته يجيه من فوقه
حكمها على غاية اهل الكيف والظفران=بها زعفران وهيل واشكال مرفوقه
واخذها خفيف النفس في دلة الرسلان=بها رشمة في حقوها فوق مدقوقه
بعد ساعةٍ قامت تواردهم الذيدان=ورتع كل ذودٍ عقب مشيه وطاروقه
رعت كل عشبٍ خايعٍ ماتبي رعيان=مع كل شقة عشبها تومي عنوقه
كساها الشحم عقب الهزل لين جات اسمان=ورعت خايعٍ تقطف زماليق غرنوقه
فحلها مع طرافها والوجيه زيان=كما الطار محني والزبد يظرب شدوقه
وزانت طبايعها وساروحها طربان=الا صاح لاكنها من الجو مصفوقه
والا ياوجودي وجد من فارق البدوان=طواه الهيام وثومة القلب محروقه
وانا مابراني كود من عودها ريان= كما غصن موزٍ تدبح براسه عذوقه
دقيق المعنق كنها قايد الغزلان=الا من مشت كنها من الحقو منتوقه
عليه اشقرنٍ لامن تثعا على الامتان=كما مدلهم في الدجا توضي ابروقه
كما ذيل شقرا هاربٍ باول الفرسان=لها عادة تسبق ولا هيب مسبوقه
وناجيت في دربه الا راح للجيران=وتهايق علي وشملت البيت مفتوقه
جرحني وراح ومكسبي منه الحرمان=جداي الونين ودمعة العين مدفوقه

المشاركة الأصلية كتبت بواسطة نايف الخييلي (المشاركة 146371) يــا ســــلام قصيـــده رائــعه وجـــزله لشـــاعر كبير لاهـــنت يالسنافي على القصيــده وبيض الله وجــهك

المشاركة الأصلية كتبت بواسطة ابو زابن المسعري (المشاركة 146400) قصيده في غاية الروعه صح الله لسان الشاعر ولسانك الله يرحمه ويسكنه الجنه