يا جز قلبي ويا ونيني من اقصاه=ويا حر كبدي ويا تفطّر حشايا
آهٍ على آهٍ وآهٍ ورى آه=وآهٍ بقلبي تشتعل بي صلايا
لا والله اللي راح فهدٍ واويلاه=لا والله اللي راح سهم المنايا
ياكسر ظهري ياعرب عقب فرقاه=ذا محزمي ذا مسندي ذا رجايا
يا وجد وجدي وجد رجلٍ على ماه=تحاوطوه القوم باقصى النحايا
عابوا رجوله واقطعوا كف يمناه=واخذوا بناته من يدينه سبايا
ويا وجد وجدي وجد حسنٍ على أخاه=وجد يتوجّد به كبير البلايا
يا حافرين القبر وسعّوا زواياه=تراه أبو ماجد جزيل العطايا
ويا للي تشيلونه على الرفق ممشاه=تراه يا ما شال حمل المطايا
وحطوه عاليمّه عسى الخير ملفاه=واحموه م التربان راعي الحمايا
وعليكم بستره ولا يقصر رداه=تراه غاض الطرف ستر الصبايا
ولا من كشفتوا راسه أعلوا محيّاه=تراه قبل اليوم راسه علايا
وصبوا على قبره من الماء ما يرواه=تراه مروي يابسين الشفايا
وادعوا عسى ربي يبيحه ويرضاه=ويجعل صحافه من ذنوبه نقايا
والحين... خلوني أنا شوي وياه=عندي مع أخويه عتاب وحكايا
يا خوي رحت وخاطري جاه ماجاه=وانا الكبير ودايم أنت ورايا
ودايم تقدمّني وذا الليل عزّاه=خليتني عقبك أشيل الرزايا
ودايم وانا وياك شورٍ وملواه=وذا الليل ما ردّيت شورٍ و رايا
واليا ناديتك من يرد المناداه=وإنْ جيت أبشكي من يجاوب شكايا
ويا كيف أسج بخاطري مانتب هناه=ولمين ابيّّح يا بوماجد خفايا
وإليا كتبت القاف وشلون تقراه=وإنْ جيت أوصّي من يحفظ الوصايا
وإنْ شفتنا عيالك يا كبدي واحراه=شفت اللي من زولك غدوا لي بقايا
يا خوي قللي أخوك وش له بدنياه=دنيا دنيّه ما بها إلا الدنايا
جريّت قلبي يا فهد من ركاياه=وأدميت مابين الضلوع الحنايا
أبكيك وليته ينفع الحر مبكاه=مير البلا ما يرد زولك بكايا
تبكيك عيني وخافقي يقطر دماه=ويبكي معي يا خوك كل البرايا
ويبكي معي يا خوك دلال مزهّاه=عودّتها للضيف تأتي ملايا
ويبكي معي يا خوك حيلٍ منقّاه=ضرّيتها كل يوم فيها ضحايا
وتبكي معي اعيون ويدين وشفاه=جنّك ضمايا وصدرنّك روايا
يا من ملكت قلوب ناسٍٍ لها جاه=يا من حباك الله بزين السجايا
فزعوا الدواسر سمعوا الذيب وعواه=من طيب فعلك حوّلوا لك حفايا
كل العرب يا خوك والله والله=كله لأجل عينك تصافّوا سرايا
حملك ثقيلٍ يا بوماجد وشلناه=والله يصبّرني ويجبر عزايا
هذا الفتى مثله قليلٍ بالاشباه=ياليت عيال اللاش دونه فدايا
حاز الفخر والعز من كسب يمناه=وكسب الثنايا مايجي بالنوايا
يا لله عسى الفردوس بيته ومثواه=يا لله يا ربّي تقبّل دعايا