يقول من ينظم جزيل الفرايد=ابيات شعرٍ مثل نظم القلايد
قصيدةٍ يطرب لها من سمعها=قصيدةٍ من فاخرات القصايد
قافٍ بدعته من بحورٍ غزيره=لا خير في شعرٍ بليّا فوايد
و ابدأ بذكر اللي علينا فضايله=فيه استعين و ما على الله كايد
سلام يا حفلٍ تجلّى بنوره=سواة نجمٍ لأظلم الليل قايد
تحيّةٍ من خاطري معتمدها=ازكى من العنبر و ريح النوايد
سلام مني يا شيوخ الدواسر=للي حضر للحفل و اللي بعايد
سلام مني للحرار الندّر=لا ثارت الهيجاء و شبّت وقايد
و اثني سلامي بالتحيه و ازيدها=لكل ابلجٍ يثني نهار الطرايد
افرح الا من شفت ربعي تجمّعوا=ربعٍ لها الناموس بين البدايد
في ملتقى حفل الربيع الأول=ليلٍ نعدّه من ليال المعايد
يا مرحبا و اعداد هب النسايم=عد النّجوم و عد نبت الحصايد
يا مرحبا في حفل خطلان الإيدي=حفل الرجال اهل الفعول الوكايد
حنّا الدواسر من قديمٍ الأوايل=ساس العرب من دون ختم و شهايد
بيضٍ صحايفنا عزازٍ نفوسنا=ما نلتفت لأهل الطمع و الحسايد
دواسرٍ مثل الجبال الرواسي=نرسي الا زادت علينا الضدايد
دواسرٍ مثل السحايب الا امطرت=ما احدٍ يصدّ بروقها و الرعايد
دواسرٍ مثل الاسود الكواسر=اهل الصخا و الجود و اهل العوايد
دواسرٍ ما احدٍ تجاوز حدّنا=دواسرٍ وقت الرخا و الشدايد
دواسرٍ كلٍ يعدّ فعولنا=هذي قديماتٍ و هذي جدايد
دواسرٍ كرمان لا شحّ العطا=دواسرٍ من ساس تغلب و زايد
من عصر ابن كلثوم و اللي قبله=عدوّنا نسقيه طعم النكايد
نمّن قصير الدار و اللي زبنّا=ناسم عصاه و نهمله في الحمايد
قلته و انا من لابةٍ تغلبيّه=لاد العياضي عزوتي و السّنايد
و اليوم حنّا و القبايل كلّها=في ظل حكم اهل العقول الرّشايد
نقدّم الأرواح فدوه للوطن=لعيون ابو متعب وسيع البنايد
يالله عسى عمره سنينٍ طويله=و يحفظه الله من جميع المكايد
ختمت قافي بالصلاة على النّبي=اللي بعَثْه الله بخير العقايد

الشاعر عبدالله الصليبي الحقباني
.
لاهنت على هذه القصيده
.
وصح الله السانك

دواسرٍ مثل الجبال الرواسي=نرسي الا زادت علينا الضدايد
دواسرٍ مثل السحايب الا امطرت=ما احدٍ يصدّ بروقها و الرعايد
دواسرٍ مثل الاسود الكواسر=اهل الصخا و الجود و اهل العوايد
دواسرٍ ما احدٍ تجاوز حدّنا=دواسرٍ وقت الرخا و الشدايد
دواسرٍ كلٍ يعدّ فعولنا=هذي قديماتٍ و هذي جدايد
دواسرٍ كرمان لا شحّ العطى=دواسرٍ من ساس تغلب و زايد