::: مـنتدى قبيلـة الـدواسـر الـرسمي ::: - قم يانديبي فوق هجن(ن) مذاعير .. قصيده رد ثناء على قصيدة الشاعر ناصر بن حمد الخالدي

::: مـنتدى قبيلـة الـدواسـر الـرسمي ::: (http://alduwaser.org/vb/index.php)

- :: قسم إبداعات شعراء المنتدى ومساجلاتهم :: (http://alduwaser.org/vb/forumdisplay.php?f=17)

- - قم يانديبي فوق هجن(ن) مذاعير .. قصيده رد ثناء على قصيدة الشاعر ناصر بن حمد الخالدي (http://alduwaser.org/vb/showthread.php?t=53899)

فارس الدبالين

29-09-2010 11:39 AM

قم يانديبي فوق هجن(ن) مذاعير .. قصيده رد ثناء على قصيدة الشاعر ناصر بن حمد الخالدي

بسم الله الرحمن الرحيم
السلام عليكم .. صباح/ مساء ... الخير

هذي قصيده متواضعه رد ثناء على قصيدة الشاعر الجزل/ناصر بن حمد بن ضاحي الخالدي التي قالها في حفل زواجي ومدح الدواسر وأثناء عليهم وذكر افعالهم
بيض الله وجهه وصح الله لسانه ملايين وعزالله انه كفو ومن قبيلةٍ وافيه اهل علومٍ غانمه واهل مراجل ولايستغرب العلم الطيب من الرجال الطيبين.
هذي بيتين من قصيدته :

من طارف الدمام تليتها عصير=صوب الرجال اهل الوفا والشهامه
ربعٍ لهم عندي معزّه وتقدير=لو انّهم قفّوا بريش النعامه
مادامت لعنتر وابو زيد والزير=وجمع الدواسر مالحقهم ملامه

وقصيدته كامله تجدونها على الرابط التالي بصوته:

http://www.youtube.com/watch?v=JtLJ0YayrKQ

وهذا ردي عليه واتمنى ان يحوز على اعجابكم
اقـول :

قم يانديبي فوق هجنٍ مذاعير=ينبيك من خير النجايب فحامه
هجنٍ ليا من سقتها تسبق الطير=وتصلك قبل الليل يظلم ظلامه
جرد الرقاب اللي سواة الخوازير=وساع النحور وطولها باستقامه
مفتلات عضود حد النواظير=حرايرٍ للقرم غاية مرامه
دق الوجيه وكنهن الشناظير=فيها لطوي البيد عزم وصرامه
ترعا الخزامى والنفل والنواوير=وتارد على عدٍ بعادن حيامه
حيلٍ خفاف وصغر خف ومضامير=عوصٍ تشوش فالوغا والعسامه
روح بها ياجعل دربك تسافير=ويصلك ربي يالشلي بالسلامه
روح من الخرج وتوكل على خير=احدربها وانحر بيوت الكرامه
وفي طارف الدمام وانتو محادير=بيتٍ هلْه فالطيب تاخذ سنامه
اقلط على شيخن دلاله مباهير=شيخٍ شهر من طيب ذكر وقرامه
حمد ولد ضاحي كبير الصقاقير=مزبان من جور المعاسير ضامه
ومدهال طيبن للوجيه المسافير=للضيف جود وللمعادي كعامه
وسلم على ناصر سليل المناعير=معرّب الجدّين طيب وزعامه
من صلب قومٍ فالمعارك بواتير=عيال خالد كاسبين الشهامه
سلم وتلقى منه قدرٍ وتوقير=واوصل كتاب اللي يكنّ اهتمامه
لاهنت ياشوق البنات الغنادير=ياللي على الوقفات مرهي حزامه
شاعر جزل تنقى سمان التفاكير=والمستمع غصبٍ تشد انسجامه
يابوحمد عرفك يشادي دنانير=والطيب شاره والفعايل علامه
اسوق لك بيض النوايا طوابير=ياللي مقامك فوق راس العدامه
عرف النشاما نعشقه دون تبرير=النادرين اهل العقل والفهامه
وانته من اللي تنطح الضد وتجير=من لابةٍ فالهوش تروي حسامه
ويوم الحرايب مثل ورد ومصادير=وكلٍ على فعله يخضب سهامه
ابن عريعر مثل ابانات والنير=حرٍ رقا في هامة المجد هامه
وامن الحسا للشط وصفٍ وتصوير=محدٍ قدر يقرب ألبيض النعامه
شيخٍ بفعله واردٍ جمة البير=محدٍ هقى من سطوته بالسلامه
من خلقة الدنيا وحنّا مداوير=كلٍ جعل طيبه وفعله أمامه
وربعك بني خالد زحول ومغاوير=حطوا لهم في صفحة المجد شامه
ويابوحمد والشعر مافاد تعبير=جعله فداك اللي نشى بالرخامه
من طارف الدمام تليتها عصير=يامرحباً عد وبل الغمامه
جتك المعاني والقوافي مغاتير=واقبل تحيات الشعر في ختامه

وسلامتكم جمـيـــع ..

شافي بن راشد النتيفات

29-09-2010 01:07 PM