يافؤادي لا وصل علم القوي شد الظلوع = شد بطراف الحنايا والصبر يفرج مصيبه
اجلد بصدري ياقلبي لا تجي طفقٍ جزوع = خفقتك لا لا تراعد لا عوا للهم ذيبه
لا تعدا لا توايق لا تدور لك فزوع = ازبن طويق المحاني بندق الشكوى صويبه
انتظر صبحٍ دروبه ماتجي وادي الدموع = المساري في غداري الروح تجعلها عطيبه
كيف / يمكن / ليت / لو / ياعل / ماتبري وجوع = والتمني درب ضيّق ماوصل ديره رحيبه
ومن ينام السبت فكره ينتظر صبح الربوع = تثقل الساعة يعيش اليوم لحظاتٍ عصيبه
لا يهمك يافؤادي لو تجي همومك جموع = دام تتبع عقل شاعر عاشر اعقولٍ لبيبه
النخل ماقد بخل لو ماهزع يوم الجذوع = وش يفيد اصبح جريد الذنب ماجمت قليبه
والمواقف نعمة الله والظروف اللي تروع = تظهر العزوة من الخزوة نتايجها رهيبه
ذا الزمن حب المظاهر والتفاخر والطلوع = كم رجل ذب المبادي من اجل شيٍ يجيبه
في المصالح عونك اللي لا امرته جاك طوع = لا خلص فرعون يطعن بالظهر نمه وغيبه
مثل من صلى لحاجه بعدها كب الركوع = أيتمسكن لا تمكن اختلف طبعه وطيبه
والدني مهما تطبع تكشف الحاجه طبوع = للجيف ينزل من اعلا ماخشا شيٍ يعيبه
لا كلا عمض عيونه كنه القط الدنوع = نفسي نفسي لا كلا ضرسٍ علا ينسى صحيبه
للخوي اصعب رياله لا ظهر من حب كوع = كنه الروح اللي تظهر جعل ماله للنهيبه
هذا حال الخلق احدن شمعدان احدن شموع = ذا برود إحساس هذا واقد إحساسه لهيبه
والعمر قفرا مطر مابه مقر لا به رجوع = من مهد حتى اللحد شايب ولد يدفع ضريبه
وياشقا اللي في هوا روحه يجي دايم تبوع = ان ركض ولا وقف يلهث و روحه مستصيبه
والسعيد اللي عفيف الروح بالدنيا قنوع = مرجهن قلبه بربه مادرى بأعظم مصيبه