يالله ياللي كلّنا نسايله = يا عالمٍ بالخافية وجهارها
يا منشي من السّماء مخايله = يا ضامنٍ رزق البشر وأعمارها
ما غيرك أحدٍ نرتجي فضايله = عفوك إلا ثقلت عليّ أوزارها
قال الصليبي بادعٍ مثايله = ينقى من القيفان روس خيارها
لبيت من طرّش علي رسايله = نسل الرجال اللي تشيع أخبارها
لاد الغريري مقعِدين المايله = وقت اللّوازم ما تغيب أدوارها
حفلٍ جمَع شيخان من قبايله = من كل فجٍّ من بعيد ديارها
سلام مني ما مِشت رحايله = سلامٍ أحلى من حليب بكارها
تحيةٍ فيها المشاعر سايله = بالطيب لأهل الطيب يا حضّاّرها
حبٍّ لكم وسط المشاعر شايله = معزةٍ ما ينحصى مقدارها
يا عزوتي وان جت الأمور الهايلة = يا فزعتي لا زعزعت بأقطارها
دواسرٍ ساس الفعول الطايله = خطلان الأيدي مِكرمة خطّارها
دواسرٍ من ساس تغلب وايله = وآلاد زايد لا خذت في ثارها
حريبنا نسقيه من غلايله = ما عاد ينسى شربته وأمرارها
حنّا هل البِل والجياد الصايله = لا ثارت الهيجاء وعجّ غبارها
كم شيخ قومٍ يصطلي ملايله = يبي العمار وطاح في دمارها
يشهد لنا التاريخ في دلايله = لا من تعلّينا ظهور أكوارها
هل واديٍ جعل الحيا مسايله = فيه النّخيل اللي بدون حظارها
قصيرنا نرفاه من خمايله = يقلط على الكرمَه وشبّة نارها
نزبّن المجرم عصور أوايله = ناسم عصاه ونهمله في دارها
وخويّنا ما يشتكي علايله = يبشر بعزِّه لا حَدَتْه أعسارها
قلته وربعي ترتكي ثقايله = لاد العياضي بيّنٍ تذكارها
ويا جعل ما نعتاض في بدايله = القرم أبو متعب زعيم أحرارها
الشّعب منه كل خيرٍ نايله = في برها وجبالها وبحارها
وختامها صلّوا عدد همايله = على النبي عداد هلّ أمطارها

لبيت من طرّش علي رسايله=نسل الرجال اللي تشيع أخبارها
لاد الغريري مقعِدين المايله=وقت اللّوازم ما تغيب أدوارها