ولا عز بغير الله باقي=ولو قالوا وقلنا مكثرينا
وطيب الجد يورثك المتاعب=وتسهر له وغيرك نايمينا
ندبت الشعر واسلم لي عنانه=وساعف لي مقاده وانتقينا
أنادي كل فخذ وافتخر به=واذكر في مهجرعة الحنينا
أنادي يال تغلب يا رفاقه=وأنادي يال زايد معلنينا
أنادي بالغييثي والنتيفي=وأنادي وين وقفات مضينا
أنادي في رجب هو والجعيدي=وأنادي بالرجال المانعينا
أنادي في مخاريم الخرايم=وأنادي بالخييلي والقطينا
أنادي بالشرافي والبريكي=وأنادي بالرجال الصامدينا
أنادي يال حقبان امنعوها=من اللي قال في قول هجينا
أنادي وين فرجان الدواسر=وأنادي بالصخابر وين وينا
أنادي يال شكر هم أنادي=وأنادي بالرجال الذاكرينا
أنادي في حراجين وهو امل=مجادعة الرجال إلى حدينا
أنادي يال عمارٍ واسمي=الى قلوا حضور الغايبينا
وأنادي في حسن وابن الزمامي=وبالخضران وين الطايلينا
أنادي بالدموخ وبالهواشل=الى نادوا عليها موجفينا
أنادي باكبرا قوم اكابر=وانادي بالغرير المفلحينا
وقل يا لاد مسعر والحبيبي=وقل يالاد مروية السنينا
وقل يالاد أبو سباع هيا=ويالاد العمور العامرينا
ويالاد المصارير استهمنا=ويالاد المشاوية اشتوينا
وأنادي يال ودعان الودايع=وانادي يال بدران التضينا
وأنادي هم أنادي هم أنادي=بلا تفصيل والساعي حدينا
وأنادي يال دوسرهم أنادي=الا وين الرجال الزايدينا
أنادي عزوتي في كل لهجه=الا ياوين ذباح السمينا
أنادي بين حاضرها وبادي=ولا والله بالواجب ونينا
فعزوتنا قديم الزايديه=علام القوم عنها حايدينا
الا لا رحم ابو من صد عنها=إلى بعنا بسوقه واشترينا
ترى هذا بهذا دون هذا=ابن عمٍ وخالٍ وابن أبينا
وكل بالمواجب له حقوقه=الى عدت حقوق الغانمينا
أنادي من ذكرت ومن نسيته=فعذري منه ريف المردفينا
ولا قصدي تركته عن تعمد=نسي آدم وحنا قد نسينا
مقام واحد بالدوسريه=الى ما صاح صايحها انتشينا
إلى مالت بنا نصبر عليها=والى مالت بمن ينخى رفينا
على قول لجدي يوم قاله=يوصينا وحنا مقتدينا
الا يا ليت عقب الموت من هو=يشوف اللي بنوا عما بنينا
ممات الرجل موت العقب عقبه=إلى خلوا طريقه مفلسينا
وحنا بعدهم نمشي ونوصي=بما يوصي عليه المشفقينا
خيار من خيار من خياره=الى عد الرجال الخيرينا
وكل في مقامه دون حقه=ولا نقبل كلام منظّرينا
شواهدنا منازلنا ونبقى=عليها لو يزول الكوكبينا
وحنا السالكين مخيف فجه=الى خيفت فجوج السالكينا
وحنا الناهجين بخير منهج=الى عدوا كرام الناهجينا
وحنا المطعمين بيوم شده=الى ما قيل وين المطعمينا
وحنا الضاربين الكبش معلم=الى ما قيل وين الضاربينا
وحنا المحتمين الدار هيبه=الى ما قيل وين المحتمينا
وحنا الناطقين بيوم مشهد=الى ما قيل وين الناطقينا
وحنا الواقفين بكل ثغره=الى ما قيل وين الواقفينا
وحنا الزاحفين بيوم زحفه=الى ما قيل وين الزاحفينا
وحنا الكاشفين الكرب حنا=الى ما قيل وين الكاشفينا
وحنا المشعلين النار جذوه=الى ما قيل وين المشعلينا
وحنا المصطلين النار حنا=الى ما قيل وين المصطلينا
وحنا الجابرين الجار كسره=الى ما قيل وين الجابرينا
وحنا من عصر آدم وحنا=مناتبنا خيار الناتبينا
وحنا للنبي اكرم شعاره=الى قالوا شعار المرسلينا
وحنا وان بدا خصم يلاحي=لحينا فوق ما يلحى لحينا
والى منا قدرنا واقتدرنا=عن اللي نطلبه حق عفينا
ولا تذكر عطايانا بزربه=الى ذكرت عطايا الزاربينا
وكثرتنا تجي عند المخاوف=وعند المال حنا الموثرينا
اسود الازد في نص موكد=كما جافي الحديث اللي قرينا
فلا نجزع الى صارت عظايم=ولا نطغى إلى منا ولينا
ولا نسكن على جار بجيره=والى جينا بقينا المقدمينا
وكم دار خذيناها بعنوه=نزلناها وحنا الغاصبينا
ولا نسكن زمان الخوف سوره=ولكنا على الصحرا ندينا
بيان ظاهر ما نتقي به=الى ما خيف ضبضابه بدينا
لنا باكثر قبايلها نوادر=الى عدت فروع الناجعينا
فمنا بن محيا والسبيعي=فوارسها لجوك معممينا
ومنا بن قعيط القرَم هايس=وبن راجح معاذ العايذينا
ومنا الشيخ بن منديل راجس=خوي الذيب ريف الممحلينا
ومنا في قروم القوم نقوه=عددهم في القبايل كاثرينا
بدوا بين القبايل في الصداره=مقاديم الرجال الراجحينا
قروم ذكرهم باق ويبقى=الى جوا بالسلاح مدججينا
لنا شيخ البوادي والنوادي=والى قلنا عن المصدر عزينا
فسل عنا الخلاوي يوم غنى=بنجد كيف كنا النادرينا
وسل عنا وسيما العامريه=نهار يرجي الوالد ضنينا
وسل عنا البرازيه مويضي=الى خيف الطلب والطالبينا
وسل عنا اهل عوص النجايب=الى جوا باللطم متلثمينا
حداهم بارح الجوزا بحره=كرام من سفرهم متعبينا
وسلهم يوم انا خوها قوايا=حدتهم شبطها والعقربينا
وسل عنا بصوكات القبايل=إلى جو ورد والا صادرينا
وسل عنا ابن رابح ورافد=وسل مطلق وسل عنا البدينا
وسل عنا بعد عايض وناصر=وابن مصلح وسال ابن جفينا
وسل عنا ابن بهلال واسأل=ابن سلوم واللي نابغينا
وسل عنا ابن مهدي وساكر=وسل عنا سند وابن الردينا
وسل عنا رضى والشيخ هابس=وابن كروز والخافي يبينا
وسل برك وسل واره وراوه=وخب الريم وسل دوسر وتينا
وسل قوز الشريف العلم عنده=وسل سوق الحسا يوم دعينا
وسل عنا طويق في شموخه=وسل عنا كرام قاطنينا
وسل عنا بعد سوق المنامه=وسل عنا جريس يوم دِينا
وسل عنا وابن شهوان شاهد=كلام الضيغمي يا سامعينا
وسل عنا رميزان التميمي=وسل راكان زبن الخايفينا
بدارين اللوى وش قيل عنهم=ولا يصدقك غير الواثقينا
وسل عنا المطرف وابن ماجد=فعول وكدوها القايلينا
وسل عنا كرام القوم واسمع=ولا عنا تسال الاسفلينا
وسل عنا اليمن تلقى خبرنا=وسل عنا الريادي لاسرينا
وسل جازان والافعال تنبي=وسل عنا الجوازي لاجزينا
وسل عنا (بلي) فيما كتب به=تجد صدق الخبر في الغابرينا
وسل عنا مناعير النشامى=وسل عنا الملوك الطاهرينا
وسل عنا سلاطين الكنانه=تجدنا للامانه كافلينا
وسل عنا وبالهدار وقعه=ومن يحمي فلول الزابنينا
وسل عنا جبل شيبان وانشد=فيافيها وديانٍ دوينا
وسل عنا وفي نجران هيعه=وكم للضبعة العرجا رمينا
وسل عنا السليل بالسلايل=وبالافلاج حنا الفالجينا
وسل بالخرج واندب بالقبيله=يجيك اللي بقاعه راقدينا
وسل عنا شروره والمهامه=الى نزوى عمان صاعدينا
وسل عنا وبالاجمال تلقى=مواقفنا بوجه الغاشمينا
وسل شهران شهران العريضه=تجيك اخبار قوم شاهرينا
وسل عنا بيوم البير واسأل=نهار يوم ثادق غايرينا
وسل عنا بوادي الفقي سربه=وسل عنا جلاجل محرمينا
وسل روضة سدير يوم تنخى=وجينا يوم تنخى صايلينا
وسل عنا بواد سدير كله=وبالمحمل لقيل الحاملينا
وسل بالغاط وخشوم العراني=زمان راح يوم اللازمينا
وسل عنا وبالزلفي تجدنا=الى عدوا رجاله ظاهرينا
وسل عنا الدبادب يوم غاروا=علينا كيف كنا ظافرينا
وسل عنا قصيمه والقرايا=وسل عنا المداين والمدينا
وسل عنا الشماس ومن حلل به=وسل وادي الفرع عمالقينا
بدارين المكارم خير لابه=تواتر بالعدول الشاهدينا
وسل عنا وبالمطلاع تخبر=عن البصره يسار الرايحينا
وسل اهل الحظوظ بما ذكرته=الى ما قيل ياهل الواديينا
وسل بين القبايل والحواضر=تخبّرك الرجال الحافظينا
وسل عنا ولا تسأل وجرب=تجدنا ساع تزهم والمينا
نجي كالنار في حال اشتعاله=وفي حالٍ ترانا وادعينا
والى منا غضبنا شر غضبه=ترى البركان منها يحتذينا
والى منا رضينا الخير كله=نكون المطعمين الواهبينا
لنا حالين واهل العرف تدري=جنانا من جناه الجنتينا
نكيل الصاع كيل فيه نوفي=والى منا عطينا مارجينا
والى ما احتاج زود فيه نرهي=ونضفي له على هذا اثنتينا
ونوفي بالحقوق وبالحقايق=ونعطيها كما انا طالبينا
ولا يوم بخسنا الكيل مره=الى منه بخسها الكايلينا
وحنا حرز ذيدان رواتع=الى جوا بالحديد مقنعينا
بنا تامن مراعيها وتبقى=رواعيها عليها آمنينا
وحنا حرز غرس يوم يغرس=ولولانا جفوه الغارسينا
ياث المستغيث إلى تغوَث=شفى صدي القلوب الى صدينا
يقوله زايدي بال دوسر=بني بدران ريف المهزلينا
حفيد القرم ابو خميس عامر=ضمنها يوم هي بالضامنينا
ولا قلته مجارى أو مفاخر=ولكنا على القصيا قصينا
وانا ما أقول ما يجرح شعوره=ولكنا عن الفتنه نهينا
الى جت بيننا صارت مصيبه=والى جت من سوانا مادرينا
وهدم البيت معروف بساسه=ويبقى ما بقي ساسه متينا
الى جت من سفيه قيل زله=والى جا عاقل فيها ابتلينا
ولا والله يكسب من وراها=سوى تحقيق قول الشامتينا
الى ثارت عجاجتها وقامت=تطير بها عقول العاقلينا
سكوت من على الباطل سماجه=وتدري ما بقومك ساكتينا
قبل هذا سمعنا ثم قلنا=لعل القوم فيها واهمينا
وبعد اليوم ما والله نجامل=ولا ممن تعمدنا استحينا
تقول انك سليل الدوسريه=وتجفانا وحنا ما جفينا
وهي في الازد من جد تسلسل=بها وانشد عليها ذا رعينا
وفيما قلت جدك اخو جدي=وثدي المكرمة به راضعينا
والى صرت ابن دوسر يابن دوسر=فحنا وانت في دوسر نمينا
ودوسر جد زايد بالوكايد=كما جافي صحاح المخبرينانا
لك الله ما نطيعك في مقالك=ولا جينا لجدك وافدينا
على هونك على هونك تمهل=وزن قولك بقول الوازنينا
اشوفك ترمي بقولك وتلحن=ونعرف ويش لحن اللاحنينا
كلامك ذا خلاف اللي تعارف=عليه القوم يابن الطيبينا
ولو تنشد وحاف القهر عنا=عطتك العلم عنوانه مبينا
ثوابتها كما ذيك الرواسي=الى جا بالكلام ملفقينا
فعول في صريح القول تنطق=الى اخفاها الشهود الصامتينا
خذيناها من اللي قد ملكها=وقدناها وحنا القايدينا
دواسرها عيال العود نقوه=الى عدوا عيال الشايبينا
مجر الكبش واحد رغم عده=وحذرا تجعلوها فرقتينا
ولا نبغى حديث فيه يفرح=عدوٍ نايدٍ والا بطينا
ولا نبغى كثير القول منكم=ولا منا ولا جيم وسينا
بديتوها ومن يبدا تحمل=عواقبها فقولوا آسفينا
ولا نرضى يجي فيها طلابه=ولو نسكت عليها آثمينا
والى شفتوا علينا من خطيه=فقولوها لنا يا واعظينا
نصايح ما نبي فيها فضايح=وقومك في طلبها منصتينا
الى ما قيل مجد للدواسر=نزيده ما نجي له ناقصينا
والى منك بليت بيوم كربه=وضاقت بك وشفت الموت حينا
فصح واندب بزايد ثم عاين=تفرج لك كربها الفازعينا
حمول الخيل الى ما قيل زايد=ودوسر جامع القوم اجمعينا
زمول تخوتها وان قلت قومي=إلى جوا فوق قب طايرينا
زمول تخوتها وان ثقل شيله=والى شحت مواردها ارتوينا
زمانٍ وان دعوا بالزايديه=يجون اهل النخاوي هايجينا
ولا عنا حمى دوٍ تعذر=فعايلنا عليها مدللينا
لنا بالشام ميقاف وعزوه=كما باعراقها بالراوتينا
لنا بافريقيا يالقرم عصبه=على خط الخطر متواجدينا
لنا بالشرق قوم يم فارس=على ما ننتوي له واصلينا
رواس في الرواسي مستقله=نجوم في السما للراجمينا
نقول الحق ما نخشى ملامه=ولا يوم على الغايب قفينا
فكم شيخ بنينا سور عزه=الى منه زبنا ما اتقينا
وكم شيخ هدمنا سور عزه=وعود بالترجي يرتجينا
مقال للشريف بما مضى له=بقى يروى على مر السنينا
وهذا بعض ما قمنا بفعله=وكل في فعوله يستبينا
ولا جينا نعدد وش فعلنا=ولكنا ننبه غافلينا
ولو نحصي فعايلنا تجدها=لكثرتها تبذ الكاتبينا
ملاحم قومنا في كل صفحه=من التاريخ رغم المرجفينا