لابغينا الشعر نارد على العد القراح = الحبال طوال نارد وتمتلي الدلي
يامدور للحكي لو اطنب بالصياح = هرج مثلك عندنا يارد الفج الخلي
الهروج احيان يازينها وسط المراح = وان تعدت حدها كم وكم شخص بلي
الرجل لاقال واجه ولا ينبح نباح = النباح ال حارس المرح لاوحى الهشلي
واللسان حصان يازين هرجه بالمباح = واللسان احيان ينشب يسبب مشكلي
بنشدك ياراعي الهرج جاوبني صراح = ويش مصلوحك من الهرج بالله رد لي
كان لك فيما تقوله وتهرج به صلاح = فاستمر بهرجتك يالبريد المرسلي
يامسكين الشعر واهبه مجري الرياح = خص به ناس على ناس ماهو يشملي
تحسب انه قول مرصوص وملاعب سباح = صح نومك وذكر الله وصل وهللي
اعلم ان الشعر له ضرب موجع كالرماح = والرماح احيان تجرح ومر تقتلي
لاتحلم حلم ليل والى جاك الصباح = طارت حلوم بها الفكر ساهر مشغلي
لاتمنيك الروابع تبي نيل الوشاح = ثم تقلد لك بداله قلاده تدلي
ذا وخل الشعر لاهله وكثر لنسداح = والحسد راعيه يبشر بنار تصطلي
طيع شوري وبتعد واتبع دروب الفلاح = وترك ارجال الوفاء كان عقلك ممتلي
وان تماديتوا بهرج خلطته بالمزاح = فالرجال تميز الهرج ماهي تجهلي
والعذر لامن بديته تقابل بالسماح = والرجال الطيبه لاعطت ما تزعلي
النصيحه جاتكم وتعظ ماراح راح = وتبع اللي قلتلك والخطيه تنجلي
جاك درس مكتمل شارحينه بارتياح = وافي وكافي ومفهوم وحذر تسالي
اخذ الاصل وصوره عطه من يبغي النجاح = درس مجاني لهم والجزاء عند الولي
والجبال النايفه بالهبايب ماتزاح = لوتهب الدهر كله فلا تتبدلي
مانريد انضيع الوقت ولا البرق لاح = ذي بيوت كافيه قلتها مستعجلي
وان تعودتو يجي شعرنا سم ذحاح = لين تبطي ماتعرضت للعالم ولي