بديت بسم منزّل الحق تبيان=اللي خلق بحره و جوّه و برّه
سبحان من سوّى من الطين الإنسان=سبحان من يعلم خفا كل ذرّه
قال الصليبي كلمة شانها شان=ينقى جزيل القاف من فيض درّه
قامت تفتّح لي من الشعر بيبان=كذا بلا ريموت و بدون زرّه
هيّضني اللي بالغنا جرّ الألحان=الله من قلب الروابع تجرّه
قام يتفجّر داخل النفس بركان=فكري دواليب الهواجس تكره
جدّي صليب الصوت من صلب شملان=ننثر دنانير الذهب ما نصرّه
أفرح إلى من جاني البيت مليان=الله يسرّك يا اخو نابت مسرّه
لبيت دعوة من دعاني و لا هان=في موقعٍ ما فيه للاّش جُرّه
سلام يا ربعٍ لها العزّ نيشان=في الطيب ما ترضى بدون المجرّه
مجالس بإسم الدواسر علشان=ناخذ من التاريخ ماضي عبّره
و المنتدى الرسمي لنا فيه عنوان=به كل رجلٍ ناصعاتٍ سيرّه
مدهل قروم جات من كل ميدان=كلٍّ يشارك من ضميره صورّه
خوّة مطاليقٍ على برّ و احسان=لو بارت الدنيا وعَدها تبرّه
فيها نتعامل كلّنا مثل الإخوان=يوم إن كلّ ناشبٍ في ديرّه
آلاد تغلب نسل وايل و عدنان=و من كان في زايد فلله درّه
دواسر يشهد لها القاص و الدان=كواسر عبر التواريخ حرّه
متسلطنه غصبٍ على كل سلطان=و تزبّن المجرم و لا أحد يمرّه
دواسر نذكر على مر الأزمان=لمن احتمى البارود نزداد حرّه
منزالنا متوسّط بين قحطان=و سبيع و عتيبه و يامي و مرّه
محدٍ يمسّ حدودنا كاينٍ كان=من فضل ربّي وامنه مستقرّه
قصيرنا يدعى على قحّم الضان=ناسم عصاه ونهمله في ديرّه
لا جاء نهار الحرب ندرع في الأكفان=صوله و جوله بين كرّه و فرّه
حنا مقابيس الوغى سيف و سنان=منهاجنا القرآّن نتلو سورّه
لا ضاقت فجوج السما فعلنا بان=مثل الرعد جمع المعادي نثرّه
و اليوم كلّ في ذرى ذرب الأيمان=في صفّ ابو متعب للأعيان قرّه
و يالله دخيلك تالي العمر غفران=و أنا بوجهك من حياة المغرّه
من لا جمع دنياه بالدّين خسران=لا من تكسّر ما تجبّر كسرّه
و من دار في المضمار ما عنده حصان=لا يلوم من يقعد عليه يتشرّه
ما فيه طير يطير من دون جنحان=حتّى و لو خاتم سليمان فرّه
و ما كلّ مخطوطٍ نسمّيه ديوان=و ما كلّ من يقرأ القرايه تسرّه
و من لا يصلّي ويش ينفعه الآذان=و من طاع ربّه جنّبه ما يضرّه
صلاة ربي عدّة الإنس و الجان=على نبيٍّ قدّس الله سرِّه