لا تكالـب زمانـي ارتـكـي للحـمـل=مثل ضلـع طويـل شامـخ لـه سفـوح
الهبايـب تلوفـه مــا يـكـل ويـمـل=ثابت فـي مكانـه والجبـل مـا يبـوح

ارفع الراس دايم لو حصل مـا حصـل= لا تزعزع كيانك خـل عنـدك طمـوح
اتبع اللـي يعـزك وتـرك اللـي يـذل = رافقق اللي يـودك بالمشـورة نصـوح
من حكى لك حكى بك مثل قـول المثـل = من ضحك لك ضحك بك لو تشوفه مزوح
المكـر والخيانـة مـن صفـات الثعـل= والحـرار الأصيلـة بالثـريـا تـلـوح
لو صفالك زمانـك مـا يـدوم العسـل= الله اللي يـدوم وغيـر وجهـه يـروح
يالله اغفر ذنوبـي عـن جميـع الزلـل=الخطايـا كثيـره والله اللـي سـمـوح