هذا وانا من لابـة تخصـم الغيـر=عتيبه الهيـلا علـى العـز هامـه
ماضي وحاضر والشواهد تقاريـر=في دفتر التاريـخ حطـو علامـه

ياشعر دام اني مضريك بالخير = رد الكرامه من سلوم الشهامه
ماعاد فيه اليوم ياشعر تاخير = اقدم على عدٍ وقابل مقامه
صوت الموده مع ضريس النواعير = والشول جايٍ له على الما ابترامه
اتزين الحيه رقاب الاباكير = ويقول عبدالله ويجزل كلامه
اجذب منه مايجذبون الشواعير = جزل البيوت اللي تجمل مقامه
سلام حق للرجال المناعير= من هاجس صادق صدق في سلامه
سلامٍ احلى من حليب المصاغير = تاطا السهل ما عرضت للعدامه
في ضفكم ترتع سهاف المعاشير = ترعى الخطر وانتم حماة الجهامه
من دونها صوت العزاوي محاذير = مثل الرعود اللي تزيح الظلامه
صوت العزاوي عز دون المضاهير = الاد دوسر كاسبين الزعامه
وان حافها الطماع ماحافه الخير = غشيم راي وغارقٍ فالغشامه
يرسون مثل طويق والا كما النير = والا كما ضلع رسا في تهامه
ميراده محقق بقاعة زمهرير = جداه عقب العز عضه بهامه
واللي نجا يردف دعاته بتكبير = يالله بغزوه تاليتها السلامه
وان طوحن بالصوت بيض الغنادير = ودون المعقل صار نطل العمامه
ثم ثار عج الخيل مثل المعاصير = وغطا على روس النشاما غمامه
يروون حد مصقلات بواتير = ويجلون هم اللي تزايد عسامه
شجعان ماهابوا جموع وطوابير = وكلن يدور نجدته في حزامه
يردون حوض مايروده مصادير = الا غلام وسط قلبه قرامه
من فوق قبٍ في رباها سعاطير = لا ارخو لها قامت تخوض الرغامه
ياقوم ياعنتر وياسالم الزير = وياقوم ابو زيد المسمى سلامه
افعال حق ولا روايه اساطير = وشهودها التاريخ واهل الفهامه
خطلان الايدي فالليال المعاسير = ياقاري التاريخ فسر كلامه
ماصكوا البيبان دون الخطاطير = ومقابلين ضيوفهم بابتسامه
تشهد لهم صفر الدلال المباهير = وحيل عليها من الشحم ماترامه
امشرعين ابوابهم للمسايير = للضيف والطرقي ربيع وكرامه
اهل الكرم ماحسبوا للمخاسير = كلام حق ولا عليه ملامه
هذا وانا من لابة تخصم الغير = عتيبه الهيلا على العز هامه
ماضي وحاضر والشواهد تقارير= في دفتر التاريخ حطو علامه
اللي قرا يلقى عظيم التفاسير = واللي جهل ما احد نشد وش علامه
وكل القبايل وافيه بالمعايير = والطيب ماهو حكر والا انقسامه
قلت الحقايق دون زودٍ وتزوير = والحق يلزم للرجال احترامه