بسم الله الرحمن الرحيم

أعضاء المنتدى الكرام
السلام عليكم ورحمة الله وبركاته وبعد:
هذه القصيدةرثاء في الصديق عبد الله بن مهدي الكبرا الذي وافاه الأجل يوم الخميس 10/3/1428هـ رحمه الله رحمة واسعة.

يقطعك ياالجوال عساك للقوم = ‍نقلت لي علم صعيب عليه
أقشر خبر جاني من سنين لليوم = ‍قولة لبو فواز جات المنيه
أخذت لي ساعه وأنا تقول منجوم ‍ = أقول هو إياه والا سميه
مغير أطيح بالارض وشويه أقوم ‍ = أبي المقام وكن عظامي ونيه
ومشيت كنه مسرّح بي جاثوم = أمشي ولاادري وين بأية نحيه
وتواردن فكري هواجيس وهموم = ‍أثقل من العارض وهضبة طميه
منها عيوني كن في نونها هزوم ‍ = لاجيت بمسح ذيك تهمل هذيه
ووقفت واسترجعتنا وقلت مقسوم ‍ = كفي دموعك ياالعيون الشقيه
لو البكا ياعين بيرده يقوم = ‍لقول لك تبكين صبح وعشيه
لكن هذا الأجل والأجل محتوم = ‍مافي يديني ياعيوني سويه
مرحوم ياعبدالله مهدي مرحوم = ‍وعليك من ربي سلام وتحيه
مرحوم ياحر عن الطامن يشوم = عزيز نفس مايجي للرديه
له ناجد يضحك ولو كان مكلوم = ولاهو من اللي ضحكته مصلحيه
لين جناب مادخل نفسه الزوم = ‍وكفه على فعل المراجل جريه
مجمل في الناس ماهوب مذموم ‍ = كل يحبه من بعيد ودنيه
الناس من موته محازين ووجوم ‍ = فقده يهد اللي عزومه قويه
تبكيه شيبان حرب جفنها النوم = ‍موته عليهم حط في القلب كيه
ويبكونه صغار تحرى على الدوم = ‍في كل لحظه يرتجون لمجيه
ويبكونه ربوعه وصدقان وقروم = مامنهم اللي شاف منه الأذيه
وابكيه أنا مخصوص مانيب مليوم = صداقتي واياه ماهي خفيه
ياما تبادلنا بالاسرار وعلوم = ‍وياما تشاكينا وضحكنا سويه
يطري عليه كل ماغابت نجوم = واذكره لاكل تذكر خويه
فياالله يااللي له نحج ونصوم ‍ = ياالواحد الخلاق رب البريه
وسع عليه القبر ياحي قيوم ‍ = وفي جنة الفردوس يصحب نبيه
واجبر عزا منهو من الفقد مهموم = وعسى العوض فواز يصبح حليه

مغير أطيح بالارض وشويه أقوم= ‍أبي المقام وكـن عظامـي ونيـه