هواجسي نوادرك صفيها=ولامن طلبت اخيارها هاتيها
واياك ثم اياك غير الجزلة=ترى الهزيلة حالف(ن) مابيها
أبغى كلام(ن) ما يمله سامع=قصيدة(ن) يفخر بها ملقيها
ويطرب لها اللي للنوادر عاشق=واهل المعرفة لازم(ن) توحيها
قصيدة(ن) ما وجهت للتاجر=ولا رجيته حاجتي يقضيها
ولانيب أوجهها لراعي منصب=من شان كسب ارضاه في تاليها
وارفع قصيدي واحشمه واعزه=عن مدح ناس(ن) كان فيها.. فيها
نخيت هاجوس القصيد وجاني=وجهزتنا له دلة(ن) مركيها
جلست أنا وياه جلسة عاشق=اللي نديمه مهرة(ن) يغليها
وسريت ليل الشعر لين أصبحنا=وهواجسي عرفت وش حاديها !
ناديتنا لعيال جدي زايد=اللي حوت الامجاد فعل ايديها
أهل الفخر والمجد وأهل الشيخة=لا زعزع الملطوم جا واديها
وناديتنا لاهل المفاخر تغلب=أهل الظفر والعز من ماضيها
وأهل الكرم وأهل الجناب الطيب=واهل الفعول إلى دعا داعيها
دواسر(ن) وافعالنا مكتوبة=في صفحة التاريخ يا قاريها
دواسر(ن) وحدودنا معروفة=والسيف دون حدودها حاميها
دواسر(ن) دار الغناة اديارنا=ياما نواها طامع(ن) يبغيها
يهيم فيها طامع(ن) في خيرها=ولامن لقانا تاب من طاريها
دواسر(ن) وقفاتهم مشهودة=دون الدخيل إلى لفا ناصيها
ياما انطحوا دونه شيوخ ودولة=وقايع(ن) ما شك في راويها
نجلب نفوس العز دون وجيهنا=ونبيعها لامن حضر شاريها
دواسر(ن) للضيف يرخص مالنا=وذبح السمينة عادة(ن) نصخيها
وجيراننا تبطي وهي تذكرنا=بسلومنا اللي ماحدن يعطيها
ناسم عصا الجيران وسم(ن) بيّن=ويصير ضيف الدار هو راعيها
مع هل الطالات ناخذ حقنا=واهل الحقوق احقوقها نديها
ذكرت نقطة من محيط أمجادنا=من شان أذكّر واحد(ن) ناسيها !
ياعزوتي يالابتي يادوسر=في خاطري لي كلمة(ن) بابديها
بعد هدوء العاصفة يا ربعي=نار الفتن بيدينـّا نطفيها
وبعد خذا الشعار كلن قسمه=عندي شهادة حق يا باغيها
لا ثوّر الفتنة قليل الدبرة=اللي يصوّب يمّها ويخطيها
اللي يثوّر في خباه سلاحه=يبي يجيب علوم ويوديها
من بعد عام 2000 جانا فازع=بكراسته واقلامه يبرّيها !
يحكم على هذا.. ويدني هذا=وصار الخصم في المحكمة قاضيها
يرسم على كيفه ويرضي نفسه=نفس(ن) جهل شيطانها مغويها
وطويق ثابت والرياح اتدفه=والفرقدين بعيد... ياناويها !
الزايدي والتغلبي يا هذا=صفحة شرف بارواحنا نفديها
الزايدي والتغلبي من قبلك=صوارم(ن) تاريخها يكفيها
الزايدي والتغلبي حضارة=سادت وقو اعزومها مرسيها
العز جاهم كابر(ن) من كابر=ملاحم(ن) تبطي العدا تطريها
وباقي القبايل حقهم بالوافي=أهل الفعول فعولها تنبيها
محدن يحوش الطيب له بلحاله=أهل المكارم حقها نعطيها
وختامها.. باقول كلمة مخلص=به كلمة(ن) في خاطري مخفيها
إن العماني والعماني هايف=يستاهل البيضا وله نعليها
وإن البليهي أحمد الضيف الله=كلمة نعم له واجب(ن) نسديها
ربع(ن) توحد صفنا ماتثلمه=وافعالهم الايام ما تمحيها
ياما أتعبوا الاقدام شرق وقبلة=والمجد لاهله سكة(ن) تمشيها
والمدح ماهو حصر للي قلته=باقي النشاما طيبها كاسيها
هذي بيوت(ن) قلتها من هاجس=سريت به مع ليلة(ن) ساريها
أبي يقال: الله يبيض وجهه=من سامع(ن) لاقال: من راعيها ؟
خمسين بيت(ن) قالها ابن مسرع=وعلى الرجال الطايلة مهديها
فيا الله عساها في نظرهم جزلة=لأن الهزيلة حالف(ن) مابيها