قصيدة في ولد عمي شعيّب بن شعّيب بن فارس الدبالين

[معلومات العضو فارس الدبالين]

بسم الله الرحمن الرجيم ،،،، السلام عليكم ورحمة الله وبركاته

اقدم لكم هذه القصيده المتواضعه واتمنى ان تعجبكم وهي لها سالفه

وهي ان ايام غزو الكويت وكما تعرفون مابقى فالكويت احد كلن لجأ

للسعوديه وغيرها المهم ان شعيب بن شعيب بن فارس الدبالين

ماقدر يصبر ولا هناله بال الا لين يجيب ابله من الكويت وهي في

غزو عزّم القرم ابو فارس ورجع للكويت وجاب الابل وساقها من بين الدبابات

والحريق وعدّاها حد السعوديه لين وصلت اديارها والقصه معروفه عند ارجال

الفرجان وغيرهم وقد قال الشاعر هادي بن قحيصان الهوامله قصيده في ابو فارس

متنومس بفعله بعد ماسمعه من واحدن ماهوب دوسري يسولف به في مجلس

وهو حاضر وقصيدة هادي بن قحيصان الهوامله ان شالله اني بجيبها من راعيها

اقول :

جعل برقآ يطرب القلب شوفه والخيال=يصطفق مزنه وتسمر بروقه والرعد
وتمطر المزنه وتسي ديارآ في الشمال=منزلن جعل الحيا ينعشه مطر وبرد
منزلن فيه النشاما مداهيل الرجال=مدهلن للطيب واللي على العليا صعد
مجلسن للضو والعود الازرق والدلال=عادتن لاهل الكرم مالهم عنها مصد
وانت والله يابو فارس من اقروم الرجال=من ارجالن تنطح القوم في وقت الهدد
ياشجاعن بالفعل والمواقف له مجال=يوم كلن دون حد الكويتي قد قعد
وقتها صوت المدافع يجيبن الهبال=والشجاع من الرياجيل ففراشه رقد
سقت روحك ياعريب النسب لجل الحلال=سقتها بين الرياجيل ماتاوي لحد
نحتمي دون المجاهيم زاهية الجلال=يابن عمي ساسنا صالبن مثل الوتد
مانقول الا كلامن تناقلها الرجال=موقفك يشهد عليه الذي فيكم قصد
يوم قال آنا آفدآ اللي لها شد الرحال=يوم داره فالكويت استحلت ماقعد
جعل عمرك ياشعيب طويل ابطيب فال=ياشجاعن طيب فعله يبشر بالسعد

وسلامتكم يالقروم ....

 

 

 

 

[معلومات العضو عبدالله الحافر الغييثي]

عز الله انه كفو ويستاهل الابل ويستاهل هالقصيده وصح لسانك واعتلى شانك ولاهنت يالقرم ولاتبخل علينا بجديدك

 

 

 

 

[معلومات العضو محمد بن سالم الخضراني]

صح لسانك وبيض الله وجهك على القصيده الجزله . والله يبيض وجه شعيب وعزالله انه يستاهل البل تحياتي لك من الاعماق

 

 

 

 

[معلومات العضو نادر الناهشي]

اخوي فارس الدبالين....موقف بطولي يحسب لشعيب

في موقف الناس تركو كل شي ويستاهل ولاهيب غريبه عليه

الله يبيض وجهك ووجهه

 

 

 

 

[معلومات العضو راشد المسعري]

فارس الدبالين

صح لسانك يابطل وبيض الله وجهك ووجه ابن عمك ويستاهل ماقيل فيه

تقبل ودي وتقديري ،،،

 

 

 

 

[معلومات العضو ابو عمر الشمري]

صح السانك يالقرم جزله ويستاهل القصيد الي هذي افعاله

 

 

 

 

[معلومات العضو سهل الدوسري]

صح لسانك وبيض الله وجهك على القصيده الجزله والله يبيض وجه شعيب وعزالله انه يستاهل البل

 

 

 

 

[معلومات العضو محمد بن حمد الشكرة]

عز الله انه كفو ويستاهل الابل
ويستاهل هالقصيده
وصح لسانك واعتلى شانك
ولاهنت يالقرم ولاتبخل علينا بجديدك

 

 

 

 

[معلومات العضو ناصر المفرج]

صح لسانك و بيض الله و جهك

يستاهل المقصود به

لاعدمتك

 

 

 

 

[معلومات العضو فارس الدبالين]

صحت ابدانكم يالقروم كلن بأسمه وبيض الله وجيهكم على مروركم الكريم

ولاعليكم زود ياطوال العمار ,,, وراعي الفعل الطيّب يستاهل المدح سواء

كان قريب والا بعيد ,,, والقبايل وااافيه ووافيتن افعالها ,, لاهنتو يالقروم

تحياتي لكم .....