الشيخ محمد بن مناحي بن حفيظ في لقاء حصري مع موقع الدواسر الرسمي

[معلومات العضو الإداره]

الأخوة أعضاء وروّاد موقع الدواسر الرسمي


وكما عودناكم دائما على طرح كل ماهو جديد ومفيد للجميع ، وضمن سلسلة اللقاءات والزيارات السابقه والمتواصله التي قامت بها ادارة موقع القبيلة الرسمي مع عدد من امراء وأعيان ورواة ومؤرخي قبـيلة الدواسر ، يسعدنا ويشرّفنا في هذا اليوم أن نضع بين أيدكم لقاء أجرته إدارة موقع الدواسر الرسمي مع أحد أمراء قبيلة الدواسر المشهورين .

فهو سليل بيت امارة ومشيخه شهيرة تعدى صيت شهرتها وسمعتها الطيبه نطاق قبيلتها ليصل الى أبعد من ذلك بكثير وليعم كافة ارجاء الجزيرة العربية .

أمير اشتهر بالصلاح والورع وجاهه الكبير وسعيه الدؤوب الى إصلاح ذات البين وفظ المنازعات عند الدواسر وعند غيرهم من أبناء القبائل الأخرى .

نال محبة ابناء قبيلته العزيزة وابناء القبائل الاخرى بأفعاله الطيبه ومواقفه المشرفه وشهامته المشهورة .

من قبيلة عزيزة اشتهرت بفزعاتها الشهيرة ونخوتها الدوسرية وكرمها الزايدي .


قبيلة اشتهرت بألقاب عديده تدل على شجاعتها واقدامها فهم (( أهل الست)) وسجلهم حافل بالقصص والوقعات والشواهد على ذلك فهم أهل الشهامة والحميّه والفزعه ، وعرفوا بمحبتهم لقبيلتهم فنالوا محبة الجميع واحترام جميع القبائل في الجزيرة .

قبيلة انجبت انجبت فرسان وابطال وشيوخ وشعراء خلدوا أسماءهم واسم (الدواسر) في صفحات المجد بأحرف من نور ، سواء بالشجاعه أو بالكرم او بالحميا والفزعه ، فاذا قلنا الشجاعه ذكرنا ابن حفيظ واذا قلنا الكرم ذكرنا كريم سبلا ابن هذال.


اخواني لا نطيل عليكم لقاءنا اليوم مع الأمير محمد بن مناحي بن حفيظ


الأمير محمد بن مناحي بن حفيظ (حفظه الله)




أجرى اللقاء :
الأستاذ هايف مبارك العماني

أجاب على الأسئلة :

الأمير محمد بن مناحي بن حفيظ ، الشاعر والراوي : الشيخ سند بن شجاع بن مناحي بن حفيظ

حضر اللقاء :
الشيخ سالم بن محمد بن مناحي بن حفيظ ، الأستاذ منير بن مبارك آل راكان مستشار الموقع الاعلامي ، الشاعر والمشرف تريحيب المسعري ، عضو المنتدى ناجي بن بن محمد بن كهف الشكري



الأمير محمد بن مناحي بن حفيظ والأستاذ هايف مبارك العماني


س : في البداية يابوسالم نريد الاسم الكامل لك :
ج : اسمي طال عمرك محمد بن مناحي بن سند بن حفيظ الشكره الدوسري

س : متى توليتم الامارة :

ج: توليتها طال عمرك عام 1402هـ


س : من تولى الامارة بعد الأمير محمد بن فرج بن حفيظ رحمه الله؟

ج : تولاها بعده اكبر ابناءه الأمير سند بن محمد بن حفيظ وكان قد اشتهر في الجزيرة وعند القبائل بالرماية وشارك في معركة الدلم وبعض معارك التوحيد مع الملك عبدالعزيز رحمهم الله .



ضيف اللقاء الأمير محمد بن مناحي بن حفيظ


س : من هم أبناء الأمير سند بن محمد بن فرج رحمهم الله؟

ج : ابناءه هم مناحي بن سند وتريحيب بن سند ، وشجاع بن سند ، ومحمد بن سند
ومناحي بن سند .



الشيخ سند بن شجاع بن مناحي بن حفيظ

س : ومن هم أبناء الأمير مناحي بن سند رحمه الله ؟

يجيب الأمير سند بن شجاع بن مناحي بن حفيظ :

ج : ابناءه : الكبير سند بن مناحي (رحمه الله) و فيصل مناحي(رحمه الله) وشجاع بن مناحي (رحمه الله)، عجب بن مناحي (حفظه الله) ، محمد بن مناحي ( حفظه الله) .


س : هل شارك والدكم الأمير مناحي بن سند بن حفيظ في معارك التوحيد ؟

ج : نعم شارك والدي رحمه الله في بعض المعارك فشارك في معركة الرغامة الشهيرة ضد قوات الشريف إبان فتح الحجاز ، كما شارك في بعض فتوحات الملك عبدالعزيز الأخيره.


الأمير سند بن شجاع بن مناحي بن حفيظ


يتحدث الأمير سند بن شجاع بن مناحي بن حفيظ :

بعد توحيد المملكة اشتهر الأمير مناحي بن سند حفيظ رحمه الله من بين أمراء قبيلة الدواسر بالجاه وكان يتوجه لعدة قضايا وعدة مشاكل سواء ادارية داخل الدوله او غيرها من ناحية الواسطة في بعض الأمور ، وكان له جاه كبير وتقبل شفاعته واشتهر بها وقام بعمله كامل لين توفي رحمه الله ، ثم انتقلت الامارة بعده لأبنه الكبير سند وبعد وفاته انقلت للأمير محمد بن مناحي بن حفيظ أطال الله عمره .

س : متى توفي الأمير مناحي بن سند رحمه الله ؟

ج : توفي قبل حوالي الاربعين الى خمسين سنة .

س : اشتهر آل حفيظ بمرابط الخيل الأصيلة هل ممكن ان تحدثونا عن بعضها :

ج : كان عندهم مربط خيل يسمى (الربداء ) ، كان عند محمد فرحان وبدّاح بن فرج وتسلست مع أبنائهم ، وكان عند سند بن فرج أخو محمد بن فرج مربط الحمداء اشتهر في نجد وكان ياخذون منها أبناء الامام سعود بن فيصل .

س : متى تأسس مركز البديعه بالخرج الذي ترؤسونه ؟

ج : تأسس عام 1400 وكان أول رئيس له اخوي الأمير سند بن مناحي بن حفيظ رحمه الله . فبعد وفاة الأمير مناحي بن حفيظ تولى اكبر ابناءه الأمير سند بن مناحي الامارة وله من الأخوه فيصل بن مناحي ، وشجاع بن مناحي ، عجب بن مناحي. وبعد استيطانهم الخرج مُنح الأمير سند بن مناحي رحمه الله المركز بناء على كثرة قبيلته واستطاينهم لمدينة الخرج .

س : أين يتواجد أبناء قبيلة الشكره حاليا ؟

ج : الشكره متواجدين في كل مناطق المملكة العربية السعودية ، في طال عمرك وادي الدواسر ، ومدينة الأحمر بالأفلاج وهي محافظة قديمه ويسكنها قبيلة الشكره ، وفيه البديع ويسكنه فخذ كبير من الشكره ، ومنطقة ( اوسيله) بالأفلاج وفي ( برك) يسكنه فخذين من فخوذ الشكره ، وفي منطقة ( الفرشه ) ، وفي (حوطة بني تميم) ، وفي مدينة الخرج اكثر من خمس فخوذ من الشكره وفي الاحساء والدمام وفي بعض مناطق خريص وكثير من المناطق .

س : الكثير من الأخوان يسأل عن علاقتكم بـ آل حفيظ الذين مع قبيلة المزاريع المتواجدين بدولة الامارات العربية المتحدة وهل هم ابناء عمومه لكم أم تشابه أسماء ؟

ج : هذولا طال عمرك من أبناء عمومتنا ، ففي الوقت السابق كانوا متزوجين وحده متوفي زوجها من الجماعه وراحت وولدها صغير معها ابوظبي وجلس هناك ، وكان على صلة مع أعمامه ويروح ويجي لهم ، ولاتزال صلتنا والروابط بيننا وبينهم قائمة وبينا زيارات ولقاءات الى اليوم .



الأستاذ هايف العماني في حديث مع الأمير محمد بن مناحي بن حفيظ



س : اشتهر جدكم الأمير محمد بن فرج بن حفيظ بحبه للخيل وولعه بها هل ممكن ان تعطونا ببعض قصايده في خيله ؟

ج : صحيح وله العديد من القصائد في حصانه ربدان وفرسه الربداء .

وهذه قصيدة لمحمد بن فرج في فرسه من مربطهم الشهير الربدا :

(ربد)ا ترقرق كما وصف شيهاني = على العلف لاجاك الصبح ندعيها
نشريها الصبح بغالي الاثماني = يوم الردي في جواده زاهد ٍ فيها
مانيبها في نهار العيد حبّاني =أول لاجات العرضه نوريها
نبيها لامن جاء في الجو دخّاني =وكل(ن) نسى عزوته ماعاد يطريها
لينها تصالي بشلفا ً وقعها باني =بأمر الولي دايما ً ربي مقديها
انشد هل الخيل عن صفرا (عظيماني)=شلفا ً وريع وانا بالكف مهديها
يوم (ابن قطنه) بسوء الموت ينحاني =شلفاي من فطحته رويت ظواميها
فحنا شيوخ العرب لاشانهم شاني = وانـّا هل الراية العليا ونبنيها
هل فرسة ٍ من على عصر (ابن بدراني) =ومن ركب منا يوسع في مناحيها
واللي حكى في المجالس ضاق وازراني = والخيل في نجد تبغي من يلاحيها

عظيماني : من فرسان قحطان


وهذه ايضا ً هذه الأبيات في حصانه ربدان :

(ربدان ) يازين الحلا والتواصيف = ياللي ذراعك كل ما اقبل طفوحي
اعطيك من در البكار المصاخيف = اعطيك ذخر البيت واضد روحي
ابغي لامن قربوهن هل الكيف = نكسب عليك من الثنا والمدوحي
ابغيك تبرى للبكار المشاعيف = لامن براق الوسامي يلوحي
لعيون من خده كما بارق الصيف = اللي من الحجار عيت طموحي

وايضا يقول في (ربدان ) :

طرشتنا لصبر الخيعي مطيّه = وابغي اتنبا ويش علمه وطاريه
احب (ربدان ٍ ) يومه غليّه = مزينٍ طبعه وربي مسويه
راسه كما وصف العلق في يديّه = وذيله يرادفني ليا صرت محميه
يارد على الدخّان في كل هيّه = وصبره على الدخّان من صبر راعيه
يانفدى ياللي حط عندّه ضحيّه = غمر شجاع ٍ ماتوني نعاويه

ويقول ايضا في فرسه الربداء :

ربدا كما شاهنة ٍ يوم هباب = تصفق وتصفح في علاوي الفروقي
شبهتنا سبيبها يوم الآداب = شختور صيف ٍ في مخال حقوقي
فاما عليها طايف النشر واسراب = ولا توردنا ناحلات العروقي
مانيب منهو منزله وسط الأجناب = يتبع قصيره غادي ٍ له سلوقي
مع بني عمي هل الدين وكتاب = من ضاق منّا نحبسه بالحقوقي

س : اشتهر الشكره بأهل الست ، فعل ممكن تعطينا قصتها ؟

ج : غزوا سته من الشكره على راس الأمير محمد بن فرج بن حفيظ ومعهم رجل من آل بريك الدواسر كان على ذلول ضعيفه وهزيله وبنته موصية ٍ الأمير على ابوها لأن ذلوله رديّه، وغزوا على ابل لآل روق من قحطان ، ولحقوا صبيان آل روق على على ثلاثين من الخيل ، في حين ان ابن حفيظ وجماعته سته فقط مع البريكي ، فاكتفوا الشكره بالسلامة عن مكسب الابل ورجعوا واقفوا من القوم ، وتفاجؤا الشكره ان ذلول خويهم البريكي ماقدرت تمشي بركت ولا قدرت تتحرك ، فرجعوا الشكره لخويهم ، وقضبوا المحاجي ، ويوم قد خيل القحاطين على مدى الهيج وأطلقوا النار على القوم اللي لاحقينهم وبيّن ضربهم فيهم وقالوا : عودوا وراكم مالكم لزوم عندنا ، وصارت معركة وقتلوا من القوم تسع اشخاص وكسروهم ورجعوا القوم ورائهم . .

فصيد الأمير محمد بن حفيظ :

عند الضحى بادي ٍ عالي المراقيب = هني من طاب حظه واستراحي
يابندقي جارك الله من الأسابيب = ياللي تسوقين مشخول الملاحي
لحقوا هل الابل ثلاثين تقاطيب = آلاد روق مروية الرماحي
يدعون لنا معهم رفض الجناحي =لحقوا على حزب ورد ملاهيب
في الهيج الأول ثمان من الأصاويب = والضيق غدى لنا طرق ٍ سماحي
عقرت صفرا ً محمست العراقيب = كله لعيناك يازين الصباحي
والله لعينا البريكي بالمواجيب = يوم قصرت بكرته ماله مراحي
حنا هل الست ياوالله التعاجيب = كن الركايب بنا رتع ٍ ضواحي
بـ لاد (شكر) مروية المغاليب = ما نرتع الا بصبيان الفلاحي

س : للأمير محمد بن فرج قصيدة في أخيه بدّاح فماهي مناسبتها ؟

ج: عقرت فرس للأمير محمد بن فرج في احدى المعارك ، فلمّا علم أخوه بدّاح قام بأعطاءه فرس بدلها ، ويقول الأمير محمد بن حفيظ بهذه المناسبة :

حي الرجال وحي من كان سميت=حي الرجال اللـي حميـد نباهـا
(بّداح )في عطا الأصايل تعديت = (ربدا) ولاقبلك حد ٍ قد عطاها
بنت الحصان اللي قديم ٍ على بيت =يعل ياخذ من ظهرها جزاها
لاشفت صفرا ً من الخيل فزيت = وكل (ن) يفز لحاجته لا لقاها
يالربع هـاذي غايتـي لاتمنيـت=ربدا هوى نفسي وغايـة مناهـا
لاصاح صيّاح الضحى ثم تعليت =(ربدا) على الموت الحمر سقتناها
وان جيتنا عنـد المعقـل تثنيـت=مع لابة ماهـو بيسهـج حماهـا
انطح بهم وجـه العـدا ماتتقيـت=ابني بيوت الحرب وانطح شباهـا

س : متى ظهرت فروسية الأمير سند بن محمد بن حفيظ ؟

ج : صارت غارة على ابل القبيلة وكان الأمير محمد بن فرج بن حفيظ ليس حاضرا ً عندها ، وكان سند موجود وصغير بالسن ، وكانت ذاك اليوم هو أول فروسيته وأول مواجهه له ذاك اليوم ، فاستبسل سند وهب مع ربعه لكي يردون الابل ، وحصل له موقف عجيب عندما لحقوا القوم، وهو أن سند استطاع بمخباط واحد وبطلقة واحده استطاع أن يعقر ثلاثة من خيل المعادين ، فكان منظر أرعب الغزاة وظنوا أنهم لن يسلموا من رمي هذا الصغير فهربوا وتركوا كسبهم وماثقل من جيشهم ، وتم النصر بفضل الله وردة الابل ، فلما رجع والده الأمير محمد بن فرج بن حفيظ وأخبروه جماعته بماحصل وبمافعله سند سر كثيراً وكان والده مضمر فيه الفروسية والشجاعه من صغره لأن أعمامه طيبين وأخواله من أطيب الجماعه ، وأنشد الأمير محمد بن فرج هذه الأبيات :

اسمه( سند) وان الله اللي مسميه =اسمه (سند) ومسند ٍ كل عايل
مخباط ( سند) ٍ يوم ربي مقديه = عقر ثلاث ٍ مكرمات ٍ أصايل
ماقومه الا عوده اللي مربيه = ومعلمه وشلون ضرب الفصايل
ماني على هد الجماعه مضريه = ابغيه في يوم يشيب الهوايل

س : منهم أخوال الأمير سند بن محمد بن حفيظ ؟

ج : أخواله من عيال عمنا آل مبخوت بن برجس .

س : هل شارك سند بن حفيظ في المغازي في حياة والده ؟

ج : خاض سند عدة معارك في حياة والده ، مثل غزوات كثيرة على بعض القبايل ، وفي فتح الدلم شارك مع الملك عبدالعزيز وكان له موقف عظيم وقتها .

س : هل ممكن أن تحكي لنا هذا الموقف ؟

ج : نعم ، بعد فتح الملك عبدالعزيز للرياض ، كان هناك حامية لأبن رشيد في منطقة الدلم وكانت من أقوى الحاميات في المنطقة وفيها من اشرس فرسان بن رشيد ، فقرر الملك عبدالعزيز التخلص من هذه الحامية حتى يسيطر على المنطقة الجنوبية ويمنع تهديد هذه الحامية للرياض ، فجاء الملك عبدالعزيز بجيشه قاصد الدلم ، وضاف في طريقه على الأمير محمد بن فرج بن حفيظ وتعشى عنده وقال له الملك عبدالعزيز بكرة: حنا نبيكم معنا ،
فقال ابن حفيظ : مايحتاج انا معكم ومؤيدنك ومؤيدين أجدادك قبلك فأصبحوا جيش الملك عبدالعزيز والدواسر اللي معه الموجودين في المنطقة هاذي ومعهم الأمير محمد بن فرج بن حفيظ الله يرحمه وكان سند موجود معه ، وكان ابوه كبير في السن لدرجة ان يذكرون انه يركب الخيل وكان عروق يديه واضحه من أثر كبر السن ، وكان سند هو الذي يكفي والده في أمور كثيرة .
وعندما اقبل الجيش الى الدلم ، تفاجأ الجيش بوجود المدفع ، وكان المدفع غريب على أهل نجد في ذلك الوقت ، وكانت الدولة العثمانية تدعم ابن رشيد بهذه المدافع وكان أهل نجد يجهلونها ولا يعرفون لها .
فوقفوا حائرين أمام هذا المدفع فلاهوب رجال يذبحونه؟ ، وان رموه ويش يرمون ؟ ، فقام سند الله يرحمه ونزل من الفرس ودخل في النخل من الجهه الجنوبية حتى يأتي للمدفع من الخلف ، وكانت المنطقة التي نصب عليها المدفع مرتفعه ،فتسلق على نخله حتى أتى بجانب المدفع ثم قفز عليهم وقتل الذي كان يدير المدفع ، وكان يجهل طريقة استخدامه ولو كان يعرف استخدامه كان لفّه على جيش ابن رشيد ، وفي نفس الوفت خاف سند انه يرجع لفرسه ثم يأتي شخص آخر ويستخدم المدفع ضد جيش عبدالعزيز ، لذلك وجد الأمير سند أن الحل الوحيد هو أن يكسر المدفع ، فقام بدفع المدفع من فوق الارض المرتفعه وسقط على الأرض وتحطم على مرأى من جيش الملك عبدالعزيز والدواسر الذين حضروا،

فرجع وركب فرسه وقاموا الرياجيل وركبوا خيلهم وفتحوا الدلم ذاك اليوم ، وكان المدفع الذي على البوابه هو سبب منعهم من دخول الدلم لأن الخيل كان تطيح وتخاف من ضربه وتستنكره ، وصار فتح الدلم من حسن تصرف الأمير سند بن حفيظ رحمه الله .

س : هل جائت قصيده في هذه المناسبة ؟

ج : نعم جاء فيها قصيده للأمير سند لا احفظها كامله منها :

(لعيون ابو تركي) تحديت الأخطار = .......آني
لانيب زرّاع ٍ ولا نيب بقّار = ولانيب حصاد يجر السواني
لامن ركبنا فوق قبّات الأمهار= لو كان لي العمر داني
لامن ركبنا فوق قبّات الأمهار = ياويل من ننقل عليه المحاني

وهي أطول من ذلك .

ابو تركي : الملك عبدالعزيز

س : ومتى توفي الأمير سند بن حفيظ ؟

توفي الله يرحمه قبل فتح الحجاز .


س : هل للأمير مناحي بن سند قصائد ؟

ج : الأمير مناحي ما كان شاعر وفي وقته انتهت المغازي والحروب .وكان مع الملك عبدالعزيز واشترك في بعض فتوحاته .

س : ماهي سالفة شعب طلحاب؟

ج:الدامر غزى على ابل المساعرة وخذاها وكان اهلها غازين ولاهم موجودين عندها ، وجاء الدامر وضاف على شامري ، وكان محمد بن حفيظ الله يرحمه وجماعته نازلين على طلحاب ، فخذوا الخبر بالموضوع ، ويوم اصبحوا الصبح فعارضوا ابل بني عمهم يبغون يردونها وصارت معركة بينهم وبينهم الدامر قتل فيها ثلاثين من العجمان وذبح فيها بدّاح ولد الأمير محمد بن حفيظ كان صغير مابعد تزوج ، ويقول الشاعر بعد المعركة :

خلي الدامر عليه العمد والبيت طاح = وشعب طلحا من الجنايز حدى نزالها

فبعد المعركة شدوا الناس المقيضين على ذاك المحل من ريح الجنايز من الابل والناس والدماء المجتمعة بالمخضار ، وردوا ابل المساعره ، وهذولاك راحوا مكسورين ،ومابقى الا اميرهم الدامر فدخل وزبت على بيت ابن ملحم الحراجين ، وكان ابن محمد بن ملحم شايب جالس في بيته وزبن عليه الدامر وقاموا وطرحوا عليه البيت ، وقال ابن ملحم لأبن حفيظ : ( تكفى يامحمد شايب ٍ زبن له عند شايب ) ، وانـّا نقدر الزبين لامن زبن عند بن عمنا ، قالوا ارفع البيت منه ، ورفعوا البيت منهم وعشوه ، ووصلوا اربعين فارس لين دياره .


س : هل ممكن ان تذكروا لنا قصة فزعة الشكره لبني عمهم آل عمار في السيح ؟

ج : لمّا علم الأمير فرحان بن حفيظ والشكره انه بصير كون على آل عمار بالسيح استحمى معهم، وكانوا على علم ان حاكم نجد بيحول على ال عمار ومعه جرة ٍ من أهل نجد من ضمنهم العجمان على راس ابن حثلين ،وعندما تأكد ابن حفيظ ان ابن حثلين من ضمن الجرّه والجيش القادم اليهم ، ارسل له هذه الأبيات ، على موجب ان بين ابن حثلين وابن حفيظ صلح محد منهم يغزي على الاخر ويذكره بفعولهم الطيبه معهم :
يقول الأمير فرحان بن حفيظ:

يالله يالمطلوب ياخير مزهوم = يامخرج ٍ نفس الفتى من وحلها
ياراكب اللي ينمه الكور مزموم = مثل السفينه علقوا في دقلها
يلفي لأبن حثلين زبن كل مضيوم = زبن الحدور اللي هفت في دقلها
اما حما لديار ذباحة الكوم = ولا شهر واقفى وعندي بدلها
يذكر منافعنا لهم دايم الدوم = بسيوف هند ٍ تعجب اللي نقلها

وعندما وصلت هذه الأبيات لأبن حثلين ، وعرف ان ابن حفيظ في وجه المنصى ، وبعدها سحب ابن حثلين العجمان من المعركة الى ديرته وكانت ابل اهل الافلاج معقله مايقارب الشهر فقامت ناقه من ابل فراج الغربي الشكري بحذف حوارٍ لم يكتمل نموه
ويسمى عند البدو (صعاد) فاكلته الابل الباقيه من شدة الجوع.
فقالت ام فراج اطلقوا الابل تموت بعيدٍ عنا !!
فاطلقوها وركب معها بداح بن ذيخان ومحمد بن ذيخان وحسين الجرو وفراج الغربي ووقيان بن ريعان وكلهم من الشكره وقالوا للجماعة الباقين لا احد يلحقنا منكم ترى البيرق بيمشي علينا لا شاف الابل مشت وفعلاً انطلقت عليهم سرية ودافعوا دفاعاً قوياً دون ابلهم وحتموها .

،فقام ابن حفيظ والحق الابايت السابقة بالابيات هذي :

واللي مهيضني حنين ام قعصوم = بين القرايا نوخت في سهلها
طويلت النسنوس ماهيب زرموم = يوم الهداد معربين فحلها
نوختها يوم التقى البيع والسوم = عند ( آل عمّار) يثور نفلها
ونوختها يوم التقى كل شغموم = عند الغروس الداجية هي واهلها
الله على اللي بدل الصلب بالقوم = هو مادرى انها خجلة من خجلها
لاهوب منقول ولاهوب مضيوم = ولا مثله يوم دبر فعلها
فوالله لولا الدين راعيه مرحوم = معاد يرجع من بلاد ٍ نزلها

واما القصيدة الثانيه فهي في الخمسة من الشكره اللي اول من افتعل بالكون وهي للهذيه آل ضويان الودعاني شاعر الدواسر الشهير :

قم ياصبي قام ناعي من شناك = سو فنجال ٍبنٍ باعتجال
في دلال ٍ وصفها مثل النجوم = ماثناهن المقهوي بالحثال
خمسة ٍ نفتهم ذاك النهار = يوم ضرب الفشق مثل الشعال
بينهم (وقيّان بن ريعان) = حربته خجت طوابير الشمال
والمنافق في الخرز دزّه (بداح) = في الشقب وقال ذا بقبر ٍ هيال
ومنهم (فراج) وديع المسمنات= قال جنبوا عن در حلوات الاوشال
ومنهم ( حسين ) الجرو رحمة المولى عليه = لعله في الجنة الخضرا ظلال
الشكري (الزايدي) وافي الشبور = حربته ماجرت الا بالحبال

س : ماهي قصة الأمير فرحان بن حفيظ مع عمّال ابن رشيد ؟

ج : جاء عمال الزكاه من ابن رشيد وفرحان بن حفيظ نازل على مشرب ٍ من مشارب الافلاج ، وقالوا يافرحان عطنا الزكاه .
قال فرحان : خذوا القعود ذاه هاذي زكاتكم .
ويوم اقفوا على القعود فقامت ( بكره) اخت ٍ( للقعود المأخوذ) اكبر منه قامت تخطّم على اخوها القعود تبغي ترده على امهاتها ، فجاؤا الرعيان يردون البكره ، فقالوا لهم عمال الزكاه : لا تحرصون عليها( يقصدون البكره) الحوش قريّب ، لامن جينا الحوش ندز القعود فيه والبكره بترجع عليكم ، ويوم وصلوا حوش الزكاة ، وجت البكره بتعوّد ، طمعوا العمال في البكره ّوتقفاها واحد ٍ من العمال ودزها مع اخوها ( القعود ) في الحوش وقال للرعيان : يالله يالله ارجعوا هاذي البكره تصلح للشيوخ .

عودوا الرعاه وعلموا الأمير فرحان وجاو يبغون يهجمون عليهم قال فرحان لا : ويوم جاء حل المقاد ،قام فرحان وحط السيف بينه وبين بشته ، وراح صوب حوش الزكاه ويوم جاء لين اهنا عبد ٍ على الباب حاط رجل على رجل ، فانسف راسه بالسيف واظهر ام قعصوم (البكره) مع اخوها (القعود ) وخلا ها تعارض لأمهاتها، ويركب الراعي ويجيك يباريه على فرسه، ويقول ابن حفيظ :

ياهجن ياعجلات حل المراحي =لامال من في المقيّظ الأظلّه
ليت الردي لامن بغى الكور طاحي =وجه يبي لعيون زنقين خلّه
ماتنقل الا من طيور الفلاحي =واللي لامن شفا الريق بلّه
للعلم نبوا مبعدين المناحي = ذيدانهم في كل قفر ٍ تحلّه
عقب (ام قعصوم) ترى الحكم باحي = تناكفوا ياهل القلوب المغلّه
يالابتي حطوا عليهم صباحي = حتى يتوب العبد من مسهن له
يازينها قادت عصير النواحي = تملى الصدير وتعمل الليل كلّه
مع صلاة الصبح ليهي ضواحي = ولا ذا حنين اولادها مرزم له

وهي أطول من ذلك .

وبعدها رفض ابن حفيظ يعطيهم الزكاة ورفض يعترف بحكم ابن رشيد .

س : ماهي قصة الأمير فرحان عندما تبنا بنزل المطر على ديارالدواسر ممحله وهو كان في الشمال ؟


ج : كان فرحان نازل في ديار شماليه مهيب ديار الدواسر ، وكانت ممحله ديارهم ، وجلس مدة طويله هناك ولاحظ ان فيه مشاكل جات بين رعيان الدواسر وبين رعيان القبيلة الاخرى ، وكان مايبغي ان المشاكل تنتقل من الرعيان الا اكبر من ذلك وطالت المدة وشاركواهم في مراعهم وماؤهم واشتاقوا لديارهم ، ففي ليلة من الليالي تضايق فرحان ماجاه النوم ، فقام وذبح له ذبيحه وقال ميد المره اطبخيها ، فطبختها وجهزتها وكان المره من قبيلة الهوامله الدواسر ، ويوم جهزت الذبيحه قالت : ماعندك أحد ؟ ، قال : حطيها ، فقدمتها ويا العبد وخذى من ظهر الذبيحه وحطه في سحلة ٍ عنده يسمونها أول الميزان أو المويزين ، وحط اللحم فيه ، ولم يأكل منها ، وقال للعبد دق النجر ، وكان علامة دق النجر ان كبير القوم جاه علم فيجتمعون عنده كبار القبيلة ، فجاؤه كبار الجماعه ويقولون عسى ماشر عسى ماشر يافرحان ؟!.

فقال فرحان : هذا واحد من بني عمكم جاي ٍ من ديار الدواسر وصايرة ٍ له مشكلة ٍ بينه وبين واحد من ربعه ولا نيب معلمكم به ، ويعلمني يقول والله يا دياركم ان جاها شي مابعد جاها في حياتها من السهول والأمطار والخير ، وانا من يوم تطلع الشمس وانا شاد ، اللي معي يامرحبا ومسهلا ، واللي بيقعد مايشوف شر .

طلعت الشمس وشدوا معه كلبوا آل حسن اللي معه من الدواسر ، ويوم اقبلوا على التوضيحه فارسلوا مشبيبين (مشبب : شخص يعس الديار ويشوف مراعيها ) ، عسوها الرياجيل وجو وهو يرمون وفرحانين ، يحلفون بالله ان سيل السهباء انه يحز في عرق التوضيحه ، بفضل من الله وتوفيق ، فقال فرحان بن حفيظ هذه الأبيات :

..........يالله بدرا= بأمره ليا منه نوى الصلف طاحي
واحد يسهج الخلايا يتمدرا = وباقي المدر منها كبار القاحي
تبرى المحجه داريه هو جاه مجرى = وغادي الوعر منها طروق وسماحي

الأمير محمد بن مناحي بن حفيظ ( ابوسالم) .




س : بوسالم ماهي هوايتك وماهي الاشياء المحببه لديك ؟

ج : ان شاء الله كل شي ٍ طيب محبب لي طال عمرك من هواياتي

الابل ، ، المشاريع الزراعية ،و الأعمار الحره .

س : مانوع الابل اللي تملكها وكم يقدرر عددها ؟

ج : عندنا رعيتين من الابل ، رعية من المجاهيم ورعية من المغاتير ، وكل رعية يقدر عددها بفوق المائة، وان شاء الله تزورنا عندها يابومبارك انت والأخوان .

س : عرفت يابوسالم انك تحب القنص ؟

والله القنص كل ٍ يحبه ، والحين ماعاد به قنص ، ولا أول نقنص ولنا هوايه فيه .



الأمير محمد بن مناحي بن حفيظ والأستاذ هايف العماني



الأمير سند بن شجاع بن حفيظ مع الأستاذ هايف العماني

يتحدث الشيخ سند بن شجاع بن حفيظ :

بعد قل الصيد وكثرة السيارات وحرص الدولة على المحافظة على حمايئة البيئة والحياة الفطريه ، ابتعد والدي الأمير محمد بن مناحي عن القنص واصبح يقضي جل وقته مع الابل وشغف بحبها .

س : ماهي وجهة نظركم تجاه موقع قبيلة الدواسر الرسمي وفكرة انشاءه ؟

ج : تشكرون عليه وهذا شي يسعدنا ، ويعرف روسنا ، والدواسر من اكبر قبائل المملكة ولهم تاريخ يرفع الراس ويبيض الوجه ولهم مواقف ٍ طيبه ، وعلى كل حال تشكرون على ماعملتوا ، وانـّا مستعدين معكم في كل وقت وفي كل اتجاه .

س : في ختام هذا اللقاء الضيّق هل من نصيحة او توصية توجهونها لأعضاء موقع قبيلة الدواسر الرسمي ؟

ج : في الحقيقة يشكرون على جهودهم ، ونوصيهم بتصحيح المعلومات ولا يسجلون الا شي ٍ صحيح وأن الأخطاء يتلاشونها ، وأن الرد الغير صالح على احد القبائل لا يثار ، لأنه لايثبت الا الصحيح وقبيلتنا في غنى عن كل ماهو غير صالح ،وفي الختام يشكرون على ماقاموا به وعملوه .



لقطة جماعية لوفد موقع الدواسر الرسمي مع الأمير محمد بن مناحي بن حفيظ وأبناءه والشيخ سند بن شجاع بن مناحي بن حفيظ .


الأمير محمد بن مناحي بن حفيظ

وهذه قصيدة للشيخ سند بن شجاع بن مناحي بن حفيظ في عمه الأمير محمد بن مناحي بن حفيظ .

يالله يامضفي علينا فضايله = يامنزل بالحق محكم رسايله
ياللي خلقت الناس يامعتني بهم = يافارض الفرضه ومجزي نفايله
انت الاله اللي سجدنا لطاعتك = وانت الاله اللي حمدنا جزايله
يامنور الانسان بالعلم والقلم = نورت بالاسلام ظلمت جهايله
تعلم دبيب النمل في ليل الدجى = تعلم عن الأرحام وماكان شايله
يارب انا طالبك حقق مطالبي = عبدك يبغي عطفك بشتى وسايله
يارب تحفظ شيخنا وتوفقه =تقاه من شر الحسود وحبايله
( محمد بن حفيظ) أبونا وأميرنا = اللي رقى صيته بعالي طوايله
شيخٍ على مناحي وخاله ردده= مابين عم وخال عنز حمايله
جده ( سند) راعي الثلاث المكرمه = مخباط سند ٍ اللي مضت فعايله
يشهد له التاريخ وتشهد له (الدلم) = يوم ٍ يشيب بالرضيع هوايله
وقف مع عبدالعزيز وسانده = حول على جيش ابن رشيد بقبايله
حالوا على منصوب شمّر واعتزوا = والمدفع التركي طوى فتايله
بايع على الحكم السعودي وأيّده = بيعة وفاء دامت ولاهيب زايله
له في (عريق سبيع) فعل ٍ نذكره = يوم انتخاه اللي نصاه بشلايله
ناوخ بما يملك وعقر ركبته = قول على فعل وله دلايله
رجع صخاف الشول من طامع ٍ بها = يوم ادرك (الدامر) على حصايله
في شعب طلحاب فارق النوم ناظره = حتى عطى العجمي جزى عمايله
و(بن سعيدان) انثنى عن مطلبه = من عقب ما ارسله نذير ٍ وحايله
ارسله يعنز عليه ويرتكي = ولا يشد من الوطن نزايله
عاند ( سند ) واقفت ظعونه وانكسر = وشدوا بذل ٍ باقيات فشايله
شيخ له علوم ٍ تنومس لابته = مواقفه في الطيب و الجود هايله
ورثه من ابوه (الأمير محمد) = ورث طبوعه وارتوى زلايله
هو (محمد بن حفيظ) ابونا وريثهم = نفسه على العليا ويمناه طايله
شيخ ٍ ملك بالطيب من كان يعرفه = رجال كامل وافيات ٍ خصايله
هواء الجناب الطيّب المتواضع = بشاشته زادت على جمايله
يتعب على العليا ويتعب ركايبه = لأجل المراجل ماتوني رحايله
عون الضعيف وفزعة الجار والخوي = عون الرفيق اللي شكى ملايله
له هيبة ٍ من شافها يخشع لها = وبشاشته تبري المريض علايله
رايه سداد ٍ وكلمته يحسب لها = رجع حقوق من العدل مايله
من دون ربعه ماتونّى والتها = لامن برك للحمل يطوي ثقايله
يدمح لزلات الرفيق ويمهله = يصبر وياصل بالركاده وصايله

وهذه قصيدة أخرى للشيخ سند بن شجاع بن حفيظ في قبيلة الشكره :

على النيات ربي يرزق المومن على النيات = وحديث المصطفى كلن يجازى حسب نياته
فمن يعمل ولو مثقال ذره بنية الخيرات = تميّل كفته بالأجر وتجبر كل عثراته
ومن يعمل مثقال ذره بنية السيّات = تميل كفة الميزان ويجزى كثر سياته
امرنا الله بفعل الخير في اغلب محكم الآيات = أمرنا نخلص النيه لوجهه بمحكم آياته
وانا بعنز حجاجي على الله عادل الميلات = اله مايخيّب من رجاه بكثر دعواته
شهود الله على ارضه شهود ٍ تبري الذمّات = تعد الحق لأهل الحق لاكثرت مراواته
وانا لي لابة ٍ يشهد لها التاريخ بالوقفات = تواريخ الفخر برز بها التاريخ صفحاته
تواريخ الشهامة والكرم والطيب والطولات = تواريخ الشجاعه مجدها ياكثر جولاته
انا من (لاد شكر) اللي لهم بين العرب صولات = مدابيس الحروب اذا اخلف ابن الاش هقواته
زحازيح الرجال اللي مطامعهم على الصعبات = مزبنة الزبين اللي خلط صوته بعبراته
حفيد (مناحي) مناحي قوي الباس في الشدّات = ولا (سند) المسمى تشفي المضهود فزعاته
صليب الراس حلال المشاكل جابر العثرات = على ربعه سلامه وعلى العدو ياقو ضرباته
عشير الغانمين اللي تعزوا به على العسرات = زبون الوانيات اللي سعدها صوت عزواته
سعد عين الضعيف اللي زهم ياراعي العادات = لقى الجنه بوقفاته وراحت نار حسراته
ملاذ لليتيم وللضعيف وطالب الحاجات = ملاذ للضعيف اللي نصاه وسد حاجاته
راعي الجهل كبير اللي ترفرف عنده الرايات = اليا من ذكر جاهه ركزت البيضا براياته
بجاهه تنفرج غمّه ورايه يكتب اللذات = تباشير الفرج تظهر على حجاجه علاماته
أمير تفتخر فيه المراجل وتجتمع بالذات = قسم بالله كن الطيب مرهون بخطواته
أمير راح ورث له حرار ويعتبر ما مات = شيوخ كملوا بالطيب والمعروف وقفاته
شيوخ مااخلفوا عاداتهم يوم الجموع اشتات = اشيوخ ترتكي للحمل لاصعبة موالاته
شيوخ قولهم ينسمع لاكبرت القولات = صناديد الرجال اليا قسى في الوقت شداته
ورثنا كل عاده طيبه ونمشي على الخطوات = لنا صيت يشرف كل كاتب في سجلاته
ورثنا حب لابتنا وكسبنا بحبهم شارات = وصية (جدنا مناحي) وكلش عند حزاته
وديعه غالية وأصل الوديعه باقي مافات = وصية( جدنا مناحي) وديعه من أماناته
وعلى النيات ربي يرزق المومن على النيات = وعسى ربي يجازي كل شخص حسب نياته

وفي ختام اللقاء قدّم الأمير محمد بن مناحي بن حفيظ خطاب (تأييد وشكر) لموقع الدواسر الرسمي باسمه وباسم قبيلة الشكره مجددا ً الثقة بالاداره مؤيدا ً للموقع كممثل قبيلة الدواسر الرسمي على شبكة الانترنت ، شاكراً لهم على جهودهم .




وفي ختام هذا اللقاء الشيّق لايسعنا الا نتقدم بخالص الشكر والعرفان للأمير محمد بن مناحي بن حفيظ والشيخ سند بن شجاع بن مناحي بن حفيظ وكافة اسرة آل حفيظ الكرام على كرم الضيافه وحسن الاستقبال وسعة صدروهم ، سائلين المولى عز وجل ان يمد باعمارهم على طاعته ويمتعهم بالصحة والعافية ويجعلهم ذخرا ً لابناء عمومتهم ولوطنهم .



موقع قبيلة الدواسر
(صوت الدواسر الرسمي)
www.alduwasser.org/vb

 

 

 

 

[معلومات العضو فراج بن فهد آل تركي]

يامرحبا بمحمد بن مناحي=ساس الأماره والوفا والهيبة
بحر المكارم والسنين اشحاحي=بحر الشجاعة والظروف اصعيبه

أرحب في البداية بالأمير محمد بن مناحي آل حفيظ , وأتقدم بجزيل الشكر

لإدارة المنتدى على هذا اللقاء الذي كنا نتوقعه وننتظره بفارغ الصبر ,

ولي عودة لقراءة اللقاء .

 

 

 

 

[معلومات العضو ابومبارك الدوسري]

نشكر الإداره الموقره

وأخص الأخ الغالي والأستاذ

هايف بن مبارك العماني

على هذه التغطيه و اللتي تسجل له

وأشكر الأمير بن حفيظ علي أستقبال وفد موقع القبيلة

تحيتي وتقديري

خلف الدوسري

 

 

 

 

[معلومات العضو خالد الحقباني]

بيض الله وجيههكم يا ادارة الموقع
والف شكر للامير محمد بن مناحي على هذا الاستقبال لوفد صوت الدواسر الرسمي
والشكر موصول لابنائه
ولاهي غربية عليهم

 

 

 

 

[معلومات العضو بسام اّل خليف]

بيض الله وجهك يا هايف.....وطول الله في عمر الامير بن حفيظ...


بسام ال خليف

 

 

 

 

[معلومات العضو ابوعبدالرحمن الودعاني]

	يامرحبا بمحمد بن مناحي=ساس الأماره والوفا والهيبة بحر المكارم والسنين اشحاحي=بحر الشجاعة والظروف اصعيبه الأمير الكريم الشهم المتواضع ((محمد بن حفيظ حفظه الله ورعاه)) نشهد أنه من الرجال القلائل إلي ينشد الظهر فيهم في هذي الأيام.. جعل ربي يطول عمره على الطاعة. والشكر للأستاذ الكبير (( هايف بن مبارك العماني )) على هذا الجهد الرائع وجعلك على القوة يابومبارك.

 

 

 

 

[معلومات العضو فيصل بن جزاء]

بيض الله وجهك ياهايف العماني الغييثات على هذا اللقاء المميز

مع الامير محمد بن مناحي بن حفيظ امير قبيلة الشكره اطال الله عمره

ونشكر الامير محمد بن حفيظ على هذا اللقاء وسعة صدره هو وابنائه

وكافة ال حفيظ الكرام

لكم مني خالص التقدير والاحترام

 

 

 

 

[معلومات العضو صالح الجعيدي]

نشكر الإداره الموقره

وأخص الأخ الغالي أبو مبارك (هايف بن مبارك العماني) على هذه التغطيه واللقاء الشيق ،،

وأشكر الأمير بن حفيظ على أستقبال وفد موقع القبيلة

مع خالص التحية و الاحترام ،،

 

 

 

 

[معلومات العضو أبوسعود الدوسري]

بسم الله الرحمن الرحيم

نتقدم بإسم موقع قبيلة الدواسر الرسمي

بالشكر الجزيل للأمير الكريم محمد بن مناحي بن حفيظ

على حسن إستقباله وضيافته وهذا غير مستغرب منه

ونشكره على سعة صدرة وإجاباته ودعمه للموقع

كما نشكر من قاموا بهذا اللقاء التاريخي الهام

والسلام عليكم ورحمة الله وبركاته

 

 

 

 

[معلومات العضو سالم الغريري]

بيض الله وجيههكم يا ادارة الموقع

والف شكر للامير محمد بن مناحي على هذا الاستقبال لوفد صوت الدواسر الرسمي

والشكر موصول لابنائه


ولاهي غربية عليهم جعلهم المعزه

 

 

 

 

[معلومات العضو جزيل العطاوي]

يامرحبا بمحمـد بـن مناحـي = ساس الأماره والوفـا والهيبـة
بحر المكارم والسنين اشحاحـي = بحر الشجاعة والظروف اصعيبه

نشكر الإداره الموقره

وأخص الأخ الغالي أبو مبارك (هايف بن مبارك العماني) على هذه التغطيه واللقاء الشيق ،،

وأشكر الأمير بن حفيظ على أستقبال وفد موقع القبيلة

مع خالص التحية و الاحترام ،،

 

 

 

 

[معلومات العضو ابو زابن المسعري]

اتقدم بالشكر الجزيل للامير محمد بن مناحي ابن حفيظ

على سعة صدره وكرم اخلاقه وإتاحة هذه الفرصه لتعرف عليه اكثر

واشكر الاخ هايف العماني والشكر موصول للأخ تراحيب المسعري ومنير ال راكان

بيض الله وجيهكم وماقصرتوا

 

 

 

 

[معلومات العضو فهد الغريري]

تسلم اياديكم على مجهودها في اللقاء المتميز مع علم كبير من اعلام قبيلة الدواسر


الأمير محمد بن مناحي ابن حفيظ


أمير قبيلة الشكره ونعم القبيلة ونعم ابناء العمومة والرجال اللتي يشهدلها التاريخ


باحتفال وتشريف ماضيا وحاضرا...


والله يطول في عمر الأمير محمد بن مناحي ابن حفيظ ويباركله في ذريته وحياته...


هايف العماني .. بيض الله وجهك على هذا المجهود الجبار الذي تبذله في سبيل الرقي بقبيلتك


والله يجعلك ذخر لقبيلتك وابناء عمومتكم


تقبل منـي ارق التحـايـا....

 

 

 

 

[معلومات العضو ابن محمد الودعاني]

اكرم وانعم بالرجال الوافين

نعم ابناء العمومة قبيلة الشكرة وعلى رأسهم الأمير محمد بن مناحي آل حفيظ

وجزيل الشكر له على سعة صدره ورحابته واجاباته الوافية

والشكر موصول كذلك

لمن قام بطرح الاسئلة الاستاذ هايف العماني



ولمن حضروا وادلى بجهودهم الأستاذ منير بن مبارك آل راكان مستشار الموقع الاعلامي ، الشاعر والمشرف تريحيب المسعري ، عضو المنتدى ناجي بن بن محمد بن كهف الشكري

جزيل الشكر للجميع

وهذا اللقاء نعده وسام شرف لنا طالما انه يرمز لأحد اعلام قبيلة الدواسر

والله الموفق

 

 

 

 

[معلومات العضو يحيى الودعاني]

تسلم اياديكم على مجهودها في اللقاء المتميز مع علم كبير من اعلام قبيلة الدواسر

الأمير محمد بن مناحي ابن حفيظ

أمير قبيلة الشكره ونعم القبيلة ونعم ابناء العمومة والرجال اللتي يشهدلها التاريخ

باحتفال وتشريف ماضيا وحاضرا...

والله يطول في عمر الأمير محمد بن مناحي ابن حفيظ ويباركله في ذريته وحياته...

هايف العماني .. بيض الله وجهك على هذا المجهود الجبار الذي تبذله في سبيل الرقي بقبيلتك

والله يجعلك ذخر لقبيلتك وابناء عمومتكم

تقبل منـي ارق التحـايـا....