اللقاء التاريخي مع الأمير علي بن محمد بن وقيّان أمير قبيلة الغياثات

**معلومات** **العضو** · 13-12-2006, 02:02 AM

بسم الله الرحمن الرحيم

والصلاة والسلام على اشرف الأنبياء والمرسلين سيدنا محمد وعلى آله وصحبه أجمعين

الأخوة والأخوات روّاد وزوّار موقع قبيلة الدواسر الرسمي،،،

انطلاقاُ من حرص الموقع على الحفاظ على تراث القبيلة والتعريف بأمجادها في الماضي والحاضر ، وضمن سلسلة اللقاءات التي اجراها الموقع مع الكثير من امراء ورواة قبيلة الدواسر العريقة .

يسرّنا ويشرّفنا جميعا اليوم أن نضع بين أيديكم لقاءً تاريخياً مع أحد أمراء الدواسر الكبار والمشهورين ، أمير ابن أمير وسليل بيت امارة ومشيخة عريقه، نالت بفضل الله ثم بأيمانها المجد والبطوله ، نالت الحب والوفاء من ابناء قبيلتهم والاحترام والتقدير من جميع القبائل في الجزيرة العربية .

قبيلة ٌاشتهرت بالشجاعة والأقدام والحميّة فنالت باقتدار كل عز وسؤدد واشتهرت بالكثير من الألقاب الدالة على ذلك كـ (حماية التالي ) ، و( موسعة الحدود ) ، ( وأهل الثمان ) ، ووغيرها .

قبيلةٌ شهد لها ابن مطـرّف انهم أول من آمن روعه وزبنّه من دولة الأشراف بعد ان تعذرته قبائل كبار .

قبيلةٌ شهد لها أمير الدواسر عامر بن بدران منذ مئات السنين بعظمتها وقوة شكيمتها
عندما قال في عرض قصيدته المشهورة :

يقول ابن بدران مقدي مثايل = مثايلٍ فيها قريع ٍ وعايده

الى أن قال :

كب(( الغييثي )) يالمنيعي وخلهم = ترى حربهم ماينلقى منه فايده
مجاهيل حرب من ( صهيب بن زايد) = حريبهم منهم إكبار غدايده
سواقة المظهور في يمة العدا = لا أشتد مجهول ٍ تلقوا كايده
كم هجمة من ضدهم زوعو بها = وجاء الحول ماجمع بقايا رفايده
فالي يزيد النفس في طردها العلا=ولاطرد هزلات المعايا بزايده

قببيلةٌ اشتهرت بمحبتها الجمّه لأمرائها وتمسكها ببعضها وحبها لجميع ابناء عمومتها من الدواسر بدون تفرقه ، فكان هذا سبب عزها بعد الله وبسواعد أبناءها .

قبيلة مهما قلنا عنها وعن امرائها فلن نوفيها حقها ...

اخواني لا نطيل عليكم لقاءنا اليوم مع الأمير علي بن محمد بن وقيّان آل نصّار (حفظه الله ورعاه ) أمير شمل قبيلة الغييثات المعروفة.

الأمير علي بن محمد بن وقيّان حفظه الله

أعد اللقاء :
العماني ، أحمد ضيف الله الودعاني ( أبوعبدالرحمن الودعاني)

شارك بالاجابه على الاسئلة :
الأمير وقيان بن محمد بن وقيان ، والشاعر محمد بن عبدالله بن فالح الفرضان الغييثي ، الشيخ محمد بن وقيّان بن محمد آل وقيّان والشاعر دغش بن بطي الشياحين الغييثي.

الأمير علي بن محمد بن وقيّان ، تولى امارة القبيلة في اواخر حياة والده الأمير المرحوم محمد بن وقيّان آل نصّار مما ساهم في صقل شخصيته واستفادته الجمه من أبيه ، فسار على نهج آبائه وأسلافه قائدا لقبيلته الغياثات لأكثر من ثلاثين عاما ً أطال الله بعمره فهو الرجل الحكيم المحنك , الذي يفك النزاعات والخلافات ، ويعطي الفقير، ويعين المحتاج ويغيث الملهوف ، مرتكيا ً للصعاب، والجدير بالذكر انه قائد الغييثات في سنة ( ذبحة الساعي) في الثلاثينات ميلادية وعمره مايقارب العشرين ، وكان له وقتها موقف مشرّف لقبيلته ، حفظه الله وامد بعمره على طاعته .

صورة نادرة تنشر حصريا ولأول مره للأمير محمد بن وقيّان أمير قبيلة الغييثات رحمه الله والد الأمير علي حفظه الله

صورة قديمة للأمير علي بن محمد بن وقيّان حفظه الله وأمد في عمره

الحـوار :

س : أبو محمد بداية نريد أن تعطينا اسمك الكامل :

الاسم الكامل طال عمرك ، علي بن محمد بن وقيّان بن رديني بن غفربن مقيت بن مخيزيم بن نصّار .

س : ابومحمد ارتبط اسم الغياثات كثيرا باسم أمرائها وخصوصاً الأمير وقيّان ابن نصّار فمثلا يقول أحدالشعراء :

اركب ودور لي على جماعة(( وقيّان)) = (غييثية ٍ ) تسقي المعادي كدرها

ويقول هجاج بن عيد الغييثي :

كم خايـعٍ قدامـهـا دجتـنـا فـيـه= وقدمتـنـا نـجـعٍ كبـيـره (وقـيـان)

فهل تعطينا نبذة عن جدك الأمير المشهور وقيّان بن نصار؟

ج : جدي هو الأمير وقيّان بن رديني بن مقيت رحمه الله، تولى امارة الغييثات بعد عمه غفر بن مقيت.

وجدي وقيان طال عمرك هزع عليه عبدالعزيز بن عبدالرحمن هنيّا عند القرايب وهو في طريقه للرياض ، وسمو رجمه رجم وقيان الى ذا اليوم .

وكان فيه ناقه نحوس عند الغييثات لها ثلاث سنين ماعطفت( مادرت الحليب) وديدها كبير ، ويوم شافها عبدالعزيز قال : ليش ماتحلبون لنا من ذي الناقة اللي ديدها كبير وقريّب عندنا ؟

فقلنا له : والله ان ذا ثالث نما لها وانها ماعطفت ، فذهب عبدالعزيز يريد حلبها فلما وضع القدح تحتها فدرّت الحليب بقدرة الله، ففرح عبدالعزيز والتفت لأبناء عمه وقال :

ابشروا بالرياض !

اللي الله خلى ذا الناقة تدر الحليب على يده وهي ثلاث سنين نحوس .

وهذا من حظه الطيب .وفعلا وفقه الله وفتح الرياض.

وجدي وقيّان قاد الغييثات في الكثير من المعارك وله مواقف طيبه مع بني عمه الدواسر جميع وسوالفه الطيبه كثيره .

س : هل وقيّان كان أكبر عيال رديني بن نصّار ومنهم اخواله؟

نعم وقياّن اكبر عيال أبوه ، أما خاله فهو ابن رويضان الحباشين المساعره وابناء خالته الفارس المشهور وقيّان بن رويضان المساعره ، ووقياّن بن شبيرم الهوامله والشيخ وقياّن بن هذال الشكره راعي الأحمر .

س : هل كان الأمير محمد بن وقيان أكبر ابناء الأمير وقيان:

ج : لا أكبر أبناءه علي وبعده فرّاج وأصغرهم محمد وأخوال محمد آل جفران شيوخ الأعزة من سبيع .وتولى الامارة بعد وفاة ابوه وقيّان .

س: هل توفى وقيان في عهد الملك عبدالعزيز ؟

ج: نعم ، وعندما وصل العلم لعبدالعزيز قال وقياّن مات ، قالوا نعم ، فقال عبدالعزيز : ياكبر الموته كبراه .

وأضاف قائلاً :
والله لو أن البدو يحكم فيهم أحد يحكم إن يحكم وقيّان .

العماني متوسطا الأمير علي بن وقيّان والحضور

الأمير علي بن وقيان والشيخ أحمد بن ضيف الله الودعاني ( ابوعبدالرحمن الودعاني)

الأمير علي بن وقيّان مع العماني

من اليمين : الشاعر والراوي محمد بن عبدالله بن فالح الفرضان والأمير وقيّان بن محمد بن وقيّان

س : يقال أن أكبر الحدود سابقاً حدود الغياثات في عهد الأمير وقيّان ؟

ج : نعم ، كلام صحيح طال عمرك من أول الخرج كله قابضينه الغييثات حاكمه وقيّان بن نصار حاكم الخرج كله ، والله يوم يوخذ معاويد ٍ لأهل السلمية أو أهل اليمامة أو أهل الدّلم ، إنهم يجـون يشتكون عند وقيّان كنه إبن سعود لين يدي ( يرد ) معاويدهم .ولاأحد ينزل الخرج إلا قصير ٍ للغييثات أو بأمر وقيان .

الشاعر والراوي محمد بن عبدالله الفرضان آل نصّار

يتحدث الشاعر والراوية محمد بن عبدالله الفرضان :

سنة هناك إعتدى عتيبي على أراضيٍ لنا وصرت كل يوم أتدآعا معه في الامارة ،وأواجه لي شايب من آل بريك قال ويش سويت مع العتيبي ، قلت والله لذا الحين
قال البريكي : لعنبوا غيركم ياغييثات حنا بنشهد وبنشهد كلنا يادواسر كلنا من الخرج وكذا ( ويأشر بيده ) انه محد يخاشركم فيه من ماضي الزمان.

قلت كلن بيشهد ، من الخرج اليا ما ورى خريص والخليفية وخدها اللي وراها حامينها بالسيف الأملح .

غير اراضيهم اللي في الوادي من قديم الزمان والخرفة في الافلاج .

مثل نشيدة مسفر بن عويّد الله يرحمه اللي يقول فيها :

يالله عسى ربعي جميع المعزّة =كسابة الناموس يوم الوهايل
ربعي هل الطالات في كل هية = ورصاصهم مشرّع على كل عايل
سقم الحريب ومبعدين الهقاوي = ياما قصرنا من شيوخ القبايل
لي ديرة ٍ في الخوف محد ٍ يزورها = فيها الغروس المدجيات الظلايل
غرس ٍ يروده كل وضحا ً ظهيره = وعرب ٍ جهام ٍ مجحفلات الشمايل
قد جا يبيها واحد من الضياغم =هم حذفت به سربة ٍ جت غلايل
لحقت (بابن وقيّان) يتلاه سربة = ولحقوا عليها القحص المهار الاصايل
هم لحقه ثم قل به فحول به = وقال لكم ثنتين هذي زمايل
وقد جاء الشريف مدور ٍ ابن مطرّف = وحصل نهار ٍ فيه كسب النفايل
ومن ضرب الاد( بن غياث) طارت قـلّته = وحصل نهار ٍ فيه قول ٍ وقايل

الضياغم : الفغمة من مطير
.
س : هل ممكن ان تخبرونا ببداية فروسية الأمير وقيّان بن نصّار ؟

ج : ظهرت بداية فروسية الأمير وقياّن منذ صغره وأول فراسته في مغزى حزام ابن حثلين أمير قبيلة العجمان وبني حسين من الظفير على الغييثات وقصتها :

ان حزام بن حثلين قال لمن معه ولبني حسين والظفير :

يابني حسين تبغون إبلٍ ماعندها إلاَ من يحلبها ويصرّها ؟! .

قالوا : أي والله ودنا بها ( نريدها)

قال حزام : موجوده لكن عندها خيال ٍ واحد إسمه (خيال السبلا طامي) إن طرحتوه ولا تراه بيدعج فيكم .

قالوا : بلاّ خيال ٍ واحد بتجيه خيل منا وسربة خيل منا ونطرحه .

قال : ها غزينا .

يوم اصبحوا الصبح ولينهم قريبين من الغياثات فيحولون على ذود آل عيد السمحات سودٍ مسويها الله ، عند أسفل العطش أو بني بهجه ، وتنطحهم العطشان وتنطحهم الابل نادرة مامعها أحدٍ من أهلها .

ويوم شافو الابل إلين هنا فطـير ٍ ( إبل كبيرة في السن ) معشبه ووسومها مفقده ووسموها وحده ( دليل إنها لم تأخذ من أهلها من قبل لأن وسمها واحد لحد الآن ) .

فقالوا القوم : ياحزام ياعم إهنا إبل ٍ فطير ٍ ووسومها وحده الابل ذي مابعد اُخذت .

قال حزام: ذليتوا نعنبا ذا اللحا ، هجوا الابل ترى أهلها بيلحقون ذالحين.

ويدبرون القوم على الابل ، ويفزع جنب الغييثات ( الجنب القوم المكلفين بحراسة الابل ) ، ولين فيه ناقة إسمها (سمحه) تخطّم على الابل وتردها وغاد ٍ راسها أبيضٍ من الزبد وهي مستنكرةٍ الهجيج، وتلحق سربة على راس الأمير وقيان وكان عمره حول 18 سنه أو أقل ومعه 15 رجال ، فقرعوا جيشهم يوم لحقو القوم.

وقال لهم وقيان: ليش قهرتوا جيشكم ؟
قالو : نحتري يغني لنا إبن عيد ولين يجون ربعنا عشان نشيخ في القوم .
فقال وقيّان : اخو فرجة سمحه تعاون الذليل يامال الحبة ! عليهم عليهم !!!،

وعفج فرسه.

فتواجهوا بعضهم مع بعض بالخيل والجيش وليهم على ذاك العجمي يبي يحول خلاف ربعه وليا والله وامرٍ عليه واحدٍ من الغياثات وضربه بالرمح لينه ضاربه على غزال الشداد ويلوح على جنب الذلول وأضربو الثاني لينهو طايح والثالث ومثل الأمثال .

وعقبها صاح الشيخ الكبير حزام ابن حثلين : ياقوم وين عقيدكم يمنعكم؟!

فقال وقيان : حاضر مهوب غايب ، وصفق فرسه وإنطلق صوب حزام

فتناطحوا بالرماح وقال حزام : خياّل العلطا أنا إخي لجعه ، لا أصطفق عج الرمك بعوال !!

فقال وقيان : خيّال البويضا أنا أخو فرجه حر ٍإليا جاء هداده صاد !!!!

ويحلفون إن الفرسين يوم تواجهوا أن روس الفرسين مثل المقص .
فرمى حزام رمحه فأخطى وقيان ورمى وقيان فأصاب الرمح ساعد حزام فإخترقها وأشبكتها مع ذراعه في كتفه .

فدبّر حزام على فرسه وإنجفروا القوم الي معه العجمان وبني حسين وطنّب حزام بالصياح: أخذوا الرمح مني ياهل الخيل .

ماخذوا القوم إلا سربة خيل من الغياثات الثانية على راس صلاّل آل نصّار جايينهم يوم سمعوا صوت الصياح و الرمي وهم كانوا يطردون جملة وضيحي يحسبونهم القوم ومعهم الخيال المشهور راعي السبلا طامي.

فقال القوم : هذا فعل ذولا عاد ماجانا طامي ، فهربوا أهل الخيل وتركوا الرجليه وأغلبهم من الظفير ومنعوهم الغييثات ، ويقولون إنه في ذاك اليوم كان 18 منيع عند وقيّان لحاله ، وكان ذالك اليوم أول فراسته .

ويوم حلوا الظفير والمنعى عند الغييثات وشافوا الخيل والعالم ،وصبوا لهم القهوه فضحك واحدٍ من الظفير قال المقهوي : ويش قومك تضحك وأنت أسير ؟

قال الظفيري : أضحك على عقيدنا حزام اللي يقول إهنا إبلٍ ماعندها إلا خيال ٍ واحد وبتاخذونها وبعضكم يسوق على بعض وهذا اللي حصلنا فهو ظلمكم وجات بوجهه. فيوم سمع كلامه الفارس والشاعر محمد بن عيد الغييثات قال :

كله لعنا هجمةٍ غب الأشراب=تُطرد جراجيبٍ جدادٍ ماها
يذمنا رديّ الجهد عند الأجناب = يالله عساهي به تقطع إعراها
خمسة وتسعين ٍ قطب كل حساب = أقفت مع الجافي تزاعج دماها
والله لو انّه حضر كل معطاب = يموت( حزام )ٍ عقبها ماغزاها

س : هل لك ان تذكر لنا قصة مانع بن جمعه مع الامير وقياّن ، رحمهم الله؟
ج :

تواجه الأمير وقيان مع مانع بن جمعه من العجمان في الاحساء ،

فقال ابن جمعه : وين الابل ياوقيان وينهي فيه ؟!

قال وقيان : ليه ويش تبغي بها !!؟

قال بن جمعه : بنغزيكم ناخذها

قال وقيان : عنها ذيك عند الرجم والله يحييك على ماتواجه.

فغزى ابن جمعه بربعه ومعه بعض آل سفران ويوم جاءوا أرسلوا السبر المشرّف على الرجم وياخذون ثلاثة أيام وهم مقيمين .

لامن جاء في الليل صاح في الليل : ياقوم ترانا غزاينكم الصبح!!!!
ولامن اصبحوا، نـبّا : ترانا مقيمين اليوم !!!

ويوم أصبح الصبح لين ذي وضح الغييثات تقادح تبغي الحمض، فـلّت طال عمرك في الحمض وروحن وهم يعاينون .

يوم جاء نهار رابع ، طعن إبن جمعه قرصه بشلفاه ورفعه ( يبغيه يبرد) وقوّم ذلوله ،
وقال : ياقوم اللي يبي مرته تتزوج غيره يروح للغييثات عنهم ذولاك ، واللي يبغي السلامه فيرجع معي ماتعرفونهم بندقهم الله وامرها على الشيخ.

فرجعوا ولم يعجب هذا الكلام آل سفران اللي معه فشدوا آل سفران وهم يغنون :

ياهل النضا لا لفيتوا خبروا نوره = مكّال قرصه يشوف الابل ولاجاها
بندق (الغييثي) على الشيخان ماموره = والموت مابين ملفظها ومجراها
الشيخ وقف يمالينا على شوره = ويقول جاذوب ياهل الجيش عفناها
دوك الغييثي يوده عند مقهوره=والشيخ منكم يقود القوم ينصاها

نورة: معزبة ابن جمعه

وفيه ابيات لاحد العجمان آل ضاعن لا اعرف تاليها يقول في بيت منها:

(غييثات) في اللقا كنهم عفاريت = الكل يبغي مطياحهم غار ما احتالي

س : هل تعرفون صاحب هذه القصيدة :

الضو شبت يم ((غفر ٍ)) شمالي = ونجر ٍ يصوت للعيال المداغيش
ياجعل يفدونه رديين العيالي = اللي ماغير ينقلون المناقيش

ج : هذه الابيات لسبيعي وللأسف يابومبارك لا أعرف إسمه وباقي القصيدة وهي قيلت على عصر أمير الغييثات غفر بن مقيت وهوشيخ ماهوب بسيط وكان قبل وقيان وعند وفاته إنتقلت الامارة لأبن اخيه وقيّان .ووقياّن السعد .

س : هل لك ان تذكر لنا قصة مغزى العمّاج القحطاني على الغييثات وموقف وقيّان فيها :

ج :هذه الهية حدثت هنيّا في العفجه( منطقة بالقرب من الخرج) ، وكان طرش الغييثات محدّر مع العصير ، وينفهق جازع المفرع المظالمة الغييثي بذوده يبغيها تعشي ولا خذى طال عمرك الا قحطان معه على راس العمّاج ويدبرون عليها وهو لحاله ، ويبرى لهم جازع المفرع على فرسه ويرجدهم ، يعقر منهم خيل وجيش ، فيطقون فرسه وكانت مبطح ( حامل) ليها طايحه ، ويوم طاحت فرسه فيقوم يباريهم برجليه ويصيح ولينه عارفهم ويقول:

يالعمّاج أعقل علي( أعطني) واحدة من ذا الابل كما هي سلوم البوادي !

قال العماج : رح وراك يادوسري ماعاد بهي لك ذي ابل قحطان!!!

قال جازع : عطني ذي الحقة القرعا (الحقه إسمها الغشيّش يعرفها جازع مهيب مع السلفان وبنت فاطره الغاليه ) .

قال جازع : عطني مير ذا الحقة القرعا سلم البوادي!!

قال العمّاج : روح يادوسري مهوب على كيفك هاذي قدها أباعر إتزقحطان ( قحطان)!!

جاك المفرع على رجيلاته ، ولاخذى الا عج خيل الغييثات مثل الدرايب ناطحته والأمير وقيان مع وجـيهم . ونطحهم المفرع وقام يراوز فرس الأمير وقيان بن نصَار حتى مسكها بعنانها.

قال الأمير وقيّان : وين الابل يالمفرّع ؟!!

قال المفرّع : ياوقيّان يوم ٍ ماعاد هوب بلنا غايبة الشمس وعنزوا على الجبل وعمعمني بهذه الذله وعوضها عندي الصبح إن الله أحياني بأغزي على قحطان.

والمفرع عقيدٍ مايهج ركبه.

قال وقيان : القوم ماهم قايلين خذينا إبل الرخمة المفرّع يالذليل،القوم بيقولون خذينا إبل الغياثات واليوم هذي إبلي ماعاد هي بإبلك ، الخلا ياعرفان الخلا الخلا ياعرفان !!!!

وعفج الأمير وقيان فرسه وينطلق لاحق القوم .

والمفرع ماهوب رخمة مير كان الأمير زعلان في وقتها ، وعرفان عيارة جازع.

فقال جازع : خيّال الغشيش انا ابن غياث ياسعد قوم ٍ انا ذليلها !!!
أردفني يافلان أردفني

والمفرع فارس مهوب بسيط
ويردف المفرع احد الغييثات ويكدّون

ويوم جاء مع صلاة المغرب لينهم لاحقينهم ، قولوابهم ، قولوابهم ، لينهم رادين الإبل لينها وقوف ٍ متعاطفة ٍ على حيرانها ومعها منعا والباقين هجوا ،

فيغني جازع المفرع وانا ماعرفتها كلها مير انه يقول :

طلبتك العقلان سلم البوادي= وعييت ياهيف المواحيل وأقفيت
نعم ٍ بربعي في نهاد الطرادي = يوم انت (يالعماج) منها تزازيت
ونادى لنا من عند ربي منادي = وعفت أنت طمعتها ومنها توذيت
عند الغيشيش ما اشحنتني جوادي = وعند ام لحيان من الروح سجيت
فانا أحمدالله ضربنا بالركادي = ومن جدنا الأول وحنا على بيت

ويقول الفارس ضاري بن بداح الحطيم رحمه الله في قصيده له منها :

مداهيلنا يوم النضا والخيول ازراج = ننوس الحفيف ونلطم الشره لاباني
ترا من شهودي عيد هزل النضا (عمّاج)=شكى من طعنا عند حلوات الالباني
وترا من شهودي يوم خيل (الدوّيش) ازراج=حدوهم من البل مرخية حبل الارساني
ذبحنا (العضب) و(شقير) منها عطا المنهاج= وكلامً بدون اثبوت راعيه خسراني

س : هل تعرفون قائل الأبيات التالية :

اعوذ بالله من ركب( ابن نصّار)=وادخل على الله من ركب (اليديـي)
أحدٍ لا تحقق من الشوف مغـوار=وأحدٍ على تالي الركايـب يعيـي

هذي ابيات لشاعره قحطانية تتعوذ من الأمير وقيّان واليديي الشرافا ، وابن نصار كان يدعى به .

س : ماهي عزوة الأمير وقيان وولده الأمير محمد ؟

عزوة الأمير وقيان اخو فرجه ، واما الأمير محمد فعزوته اخو عمشا وكان بعض الاحيان يقول اخو فرجه لكن المشهور عنه والتي يعتزي بها دائما اخو عمشا ، وحنا كلبونا تبعناه على عزوته من ذاك اليوم لذا اليوم.

س : هل صحيح ان الشيخ فيصل المرضف آل مره ذابحه وقيّان ؟

ج: الوكاد انه ذابحينه الغييثات لكن ان ذابحه وقيّان مانيب موكد ٍ منها .

لكن المرضف ذابحينه الغييثات والشاهد قصيدة هجاج بن عيد:

مثل( المرضف) والعضب ردوبه = وإلأ إبن الجبعا في محير الجافي

س : هل ممكن تحدثونا بقصة المرأه السهليّة التي قصدت في الأمير وقيّان بن نصّار ومناسبة القصيده:

ج :غزى الشيخ عسّاف ابو ثنين بالجمالين مع الي معهم من سبيع وتقابل مع واحدٍ من الدوشان غازياً بن معه من مطير ، فقال بعضهم لبعض ماورانا طمع ولاوراكم طمع لكن خلونا ويا الغييثات لأنهم مقفين من الربيع وخلونا ناخذ تاليهم .

وفعلاً لحقوا الغييثات وغاروا عليهم وكان مع الغييثات اهل بيت من السهول جيرانٍ لهم ومعهم ورع رضيع في ميزب معلقٍ على جنب بعير ، (والميزب أداة يوضع فيه الأطفال حديثو الولادة ويعلّق على الراحله) .

وغزى القوم على الغييثات ، ويوم هجت المظاهير من الخيل طاح الميزب وفيه الورع
السهلي وتركته امه ففي هذاك الموقف كل يبغي السلامه ولكن الأم حنون صاحت وقامت تزهم وقيان تكفى ياوقيان ولدي طاح من البعير وفي هاذيك اللحظة كانو القوم قريبين جداً منهم ويرمونهم ولكن وقيان ماإرتهق ورجع للغرير.

المهم رجع الأمير وقيان بن نصّار أمير قبيلة الغييثات بفرسه والقوم يرمونه وفك الله له ودنق وشل الطفل السهلي وتنجده ، وطارد القوم ومعه الغييثات ، وظل الأمير وقيان متنجد الطفل السهلي حتى إنتهت المعركة بانتصار الغييثات وحمايتهم لحلالهم .
وبعد رجوع الغرير لأمه قالت الأم السهلية :

حنا في ذرى الله وفي ذراه مانخاف= ومن راي ((اخو فرجه)) دبشنا يفلّي
جانا الدويش وزفلته قوم عسّاف = حتى الغرير اللي على الديد خلّي
لين اثنى ((شيخ ٍ )) مع الضيق ينشاف= ودنق وشلّه والهوايا تهلّي
فرح عيون أم من الدمع ذرّاف= عسى يمين ٍ شلته ما تشلّي
تنجده (( شيخ )) الجهامه والاسلاف = وطارد وفك الحايره والمتلّي
((وقيان)) له بالعز والطيب ميقاف= وفعله يعمي عيون المغلّي
اللي نطح بساعته سبعة أرداف=ومن سربة (الدوشان) عيا يذلّي

س : هل ممكن ان تحدثنا قصة ابن وقيّان مع مرسول ابن سعود :

ج : نعم ، جاء مرسول لابن وقيّان يخبره ان فيه ناس شقوا في حكم ابن سعود ويجون من عمان وياخذون المديد ورعايا السعودية وهم ابن جارالله المري ومعه ناس ،فقال هذه الأبيات هجاج بن عيد على لسان الأمير وهي عرضه :

راكب اللي رديف الكور مامـلّه = لا تلين مسيره زاد لوجامي
نحره من ولى بالسيف خلق الله = شيخنا اللي بنى مشروع الأسلامي
طبعنا من حربنا ساقـمه علّه = من ضربنا بنزر الصلف ماقامي
مثل طيثاب يوم الضبع يشتلّه = وابن شمعا عشى للذيب مـن العامي
لايهمه (وقير ) و(ابن جار الله) = صابرن على اهل الشرق والشامي

س : هل ممكن ان تحدثنا عن دور المرحوم الأمير محمد بن وقيان في معركة الرغامة الشهيرة ضد قوات الشريف ؟

كان ابوي من اللي ابلوا بلاء حسنا في الرغامة وكان كل يوم تقلع عليهم طائرة ، وكان ابن هديهد السبيعي مع ابوي ودائما يتقهوون ويسولفون جميع ، وبعدين طال عمرك خذى ابن هديهد فتره .

وقال : بروح لربعي هناك ( في الجهـه الأخرى)
، فقال له ابوي انتبه تراهي على الزول لا شافت زولٍ رجمته (يقصد الطائره)
قال ابن هديهد : انا بروح صوب اخوياي وعلى الله وعلى النصيب.
قال ابن وقيان : انا بشير عليك وبصرك
.
قام راح ابن هديهد وراح وتضربه الطايره اليهو ميت من ذاك الحين الى ذا الساع.

الشاعر المعروف دغش بن بطي الغييثي مع أمير قبيلة الغييثات

يتحدث دغش بن بطي الشياحين عن محمد آل وقيان قائلاً:

كان الأمير الله يرحمه في المعارك في راسه سعاطير ٍ تطبخ ، وفي وقعة الصحن مع غزية إبن سعود إفتعل فعلٍ يشرف أكثر القيمان خايفين على خيلهم ولين فيه بوارديه متخبأين ورى صفى ويرمونهم ، وعقبها غمغم الفرس ابن وقيان وساقها اخو عمشا عليهم لين اظهرهم من الصفى وذبحهم وفرَج للقوم اللي حادوا.

س : إشتهر والدكم الأمير محمد بن وقيان انه كان يغطي عمامته على راس الفرس اثناء المعارك حتى لاتتراجع الفرس وليقتحم الصفوف؟

ج : صحيح وقد غطى راس فرسه في اكثر من معركه ، ومنها في معركة مع آل مره وابلاء بلاء حسنا واقتحم صفوف العدو ، وقال فيه احد شعراء الهوامله :

((ابن نصّار)) دفع راس الحصان = يوم جاله من مراكيضه زوال

يوم طال عمرك دز الحصان فاقبل عليهم فاضربوا حصانه لينه جافش فحوّل عليهم ببندقه وسبّل عليهم .

واذكر ان الملك فيصل بن عبدالعزيز كان اعد وليمة غداء كبيرة حضرها كثير من الناس وامراء القبائل وكان والدي بجانبه فقال الملك فيصل للحضور :

تعرفون الرجال ذا ؟!!
هذا محمد بن وقيان اللي يغمغم الفرس بالمعم ويردّها ( يهجم) على الرجليّه

قالوا ونعم : حميده ونعم ، يقولونه هل المجلس وكان البعض يسميه( حميده ).

وكان الملك فيصل يحبه كثيره ويقدره تقديرا كبيرا .

س : هل ممكن أن تحدثنا عن مغزى (الحديده ) ودور الأمير محمد بن وقيان في فتحها ؟:

ج : في مغزى الحديده كان الجميع بقيادة الأمير فيصل بن عبدالعزيز ( طبعاً قبل يحكم) ، واخذوا مدة ست أشهر وهم محاصرين لمدينة الحديدة الساحلية في اليمن .

وبعد هذه المدة جمع فيصل القوات من الاخوان وغيرهم ، وكانوا يريدون النكوفة( الرجعة) يبغون العافيه ، والامير محمد بن وقيان مستند على سيفه .
فلما رأى فيصل ان الجميع كانوا يفضلون النكوفة والرجعه ، سأل الامير محمد بن وقيان قائلا :

يا محمد بن وقيان وراك ما تحتسي ( تحكي)؟!! .

فرد الأمير محمد بن وقيان :

يا طويل العمر انا بحتسي(بحكي ، بتكلم) لكن ماروّحنا ابوك إلا يبغينا ناصل الحديده مايبغينا نعوّد مير يبغانا نواجه الديره وأهلها .

فقال الامير فيصل : هذا والله العلم!

فقال الاخوان : ياالله جعل كل بندق ٍ فيه الأوله( يدعون على ابن وقيان بالموت لأنه غير راي الأمير) .

فامر فيصل القوات بالهجوم بالصبح وعندما دخلوا الحديده لم يجدوا فيها سوى ثور يقوده راعيه حيث ان اهل الحديده كانوا قد اخلوها بعوائلهم ليلاً عندما علموا بالهجوم صباحا .

س : هل شارك والدكم في غيرها من المغازي مع الملك عبدالعزيز بن عبدالرحمن طيب الله ثراه ؟

ج : الا مغازي كثيره ، مابه مغزى الا هو مع عبدالعزيز حتى يوم جراب و يوم الصحن ويوم ويوم ( وغيرها).

س : اشتهر الغييثات بالكثير من السلوم الطيبه مثل عدم بيع اللحم وان عطيتهم ماترد ( عطية سويقي) وغيرها هل ممكن ان تحدثونا عنها ؟

ج : بنعطيكم قصيدة الشاعر هجاج بن عيد رحمه الله وهي تتحدث عن نفسها:

كل الشروع الطيبه بانينها = واللي يخلي شرع جده هافي
يوم ابن عنّاز ذبح في جاره= والقصير خلاه مكلافي
بيع اللحم عيب ٍ علينا منتظر = مناب من يظفي عليه الفافي
حقتنا منه ثلاث فقاير = قسم الرديف لأدبحن زلاّفي
فترى الغييثي ماترد عطيته = يوم العطى بين الرجال اسلافي
وجدنا زبن المجنّا لاوزى = ومن يزبن فينا وهم متعافي
واللي مكذبني هذا ابن مطرّف = يوم الشريف يدوره بآلافي
حال الفديري والفويضل دونه = يروون حد معكفت الاسيافي
يوم المزين بالحديد مقيّد = ومصقلاتٍ ٍ في اللقاء تنشافي
لين اقضى حكم الشريف ودولته = خطلان الأيدي طوعوا الأشرافي
رصاصنا خطر ٍ على قتل العدو = خطر ٍ على الشيخان منه اتلافي
مثل( المرضف) (والعضب) ردوبه = ولا (ابن الجبعا) في محير الجافي
المرضف : من آل جابر آل مرّه، العضب وابن الجبعا من مطير
وإلا( المهري) اللي يقدي سربه = وإلا( ابن معدّل) مكرم الضيّافي
خزام المهري : شيخ الدغالبة من عتيبه، ابن المعدّل: من شيوخ السهول
يازين فزعتنا لخطوا هجمة = لامن لحقنا خليت عطّافي
مثل (الضياغم )يوم جانا عندها= هم التقينا بالفشق وقّافي

الضياغم : الفغمه من مطير

ماقصروا فينا وفك لنا الله = قمنا نعزّف جيشهم عزّافي
هذا طريح ٍ وهذا مدعثر = من بيننا مثل ارنب الحذافي
يازين فزعتنا( لذود انقاعه) = قدم آل عازب جيشهم الأردافي
ذود انقاعه من العجالين الفرجان
بعنا عليهم بيعة ٍ ينحكيبها = معنا ابن طامي ٍ حاضر ٍ يشتافي

ابن طامي : من الصخابره الدواسر

ماردنا ضرب الكريزي دونها = لين انثنت لحوارها المشعافي
يازين فزعتنا لراعي ليلى = بجمع ضرير ٍ في ايديه اتلافي
جمع ضرير ٍ صاملٍ في بيعته = شيبا جهلهم مامعه عرّافي
يوم جتنا الفنسا تهل دموعها = وتقول وليت دارنا ياكافي
يوم نار ابن سبهان وخلى الديره = ماسرّته عبده وبن حلاّفي
ابن سبهان : قايد قوات بن رشيد ، وعبده من شمر ، بن حلاف من الظفير
لاشك جاته لابة مصطورة = ربع ٍ تورد شذرة الاسيافي
ثم هج من الديره ماعاد يبغيها = صابه من الشر الشرير اخفافي
من ضربنا الواقع وراي شيوخنا= شرب الكزز من عقب شرب الصاف
فحنا حما الدار وحنا عزها = والله مانرضى لها بخلافي

المرضف : من آل جابر آل مره.
العضب : من الدوشان آل شقير من مطير .
ابن الجبعا : من مطير
المهري : خزام المهري شيخ الدغالبة من عتيبه.
ابن المعدّل : من السهول.
الضياغم : الفغمة من مطير
ذود انقاعة : من العجالين.
ابن طامي : من الصخابرة.
الفنسا : بنت حاكم الأفلاج
ابن سبهان : قائد قوات بن رشيد.
عبده : من قبايل شمّر.
ابن حلاف : من الظفير

س : هل ممكن ان تعطونا بعض سوالف الأمير محمد بن وقيّان رحمه الله؟

ج : يوم قسّام الاراضي ذاك الحين ، رقى محمد بن وقيّان على حياة الملك فيصل بن عبدالعزيز / قال محمد:

انتوا حطيتوا اهنا واحد ٍ مع اخوياه عليهم قبابيع (يقصد بريهات العسكر) قاموا يقسمون اراضينا ( يقصد الاراضي الزراعية في السهباء) ويعطونها ناس ٍ مهيب لهم .

قال الملك فيصل : الله يهداك يابوعلي انت عاد معك صك ٍ عليها؟

قال ابن وقيان : أي بالله معي صكوك مهوب صك واحد معي صكوك !!!.

قال الملك فيصل : وينهي ؟

قال ابن وقيان : صكوكي روس الرياجيل في جوانب السهباء من جنوب ومن شمال قبل حكمك وحكم ابوك ويوم حكمتوا فشيختوا فينا عسكركم بقبابيعهم .

فصد الملك فيصل وراه وضحك ، ثم أمر أن توزع الاراضي على ابن وقيان وربعه الا مازاد عليهم .

س : ماسبب تسمية الامير محمد بن وقيان بمطلق السجناء :

سمي بهذا اللقب لكثرة المساجين اللذي اطلقهم وكثرة الرقاب التي اعتقها بعد الله سواء من الغييثات او غيرهم من الدواسر من عهد الملك عبدالعزيز الى وفاته وكان له مكانه وتقدير عند الحكام .

س : هل فنت خيل الغييثات :

راحت مع اهلها اللي راحوا ، الله يعز الاسلام والمسلمين ويحفظ المملكة وحكامها.

س : متى تأسست هجرة الوسيطاء؟ .

ج : مبطي ، يوم الاخوان ، جانا الملك عبدالعزيز وقسم بينا وبين اهل السلميّه ،قال هذا يحدكم شرق وهذا يحدكم قبله يا اهل السلميّه ، وامشوا منيا لاجيتوا وادي حنيفه فوقفوا .

س : هناك الكثير من القصائد التي قيلت في الأمير محمد بن وقيّان (اخو عمشا) هل ممكن ان تذكروا لنا بعضها :

ج : والله القصايد واجده اللي قيلت فيه ومن القصايد التي قيلت فيه قصيدة ناصر بن الرديني :

لا واشهدن ان عوص النضا مالهن اثمان = وعزي لمن يخطي من الضمر الشيبي
تسعين ليل ٍ مقفيات ٍ وهن سمان = وعشرين ليل ٍ جن على الخبث والطيبي

الى أن قال :

مير ترى عند( بوعلي) لعوص النضا معطان = لانوخ ٍ يجري ببن ٍ وترحيبي
جري ٍ على ذبح الغنم مالها محيان =وش عاد لاجيناه جاء للغنم ذيبي

وقصيدة الشاعر والفارس حسين بن شلاش آل عيد الغييثات :

يامل قلب للمحادير قام يتوق = تهايق يبي له نية ٍ في طرف نيه
تهايق ورى برك ٍ يخايل وراه ابروق = يقولون طاح من اول الحل وسميه
جعله على خشم الرثم لا عاده السوق = مداهيلنا لاكل حي ٍ ذكر حيّه
مير ياراكب اللي لا ادبحت كنها الدانوق = عليها نجيب ٍ وهي نجيب ٍ عمانيه
ننحر زبون الجاذيه لاغدن معسوق = لامن حدى الظفران ظرب اليمانيه
((ابو علي)) هو عيد اللي حفاها رفوق = لاجيته حط لك الشحم فوق صينيه
وخبر اللي فالج قلبه الجالوق = ترانا طردنا اللي يبون الرويعيه
لعيون وضحا ً حايل ٍ كنها الغرنوق = رعين بها واد الركا بين حربيّه
مع لابة لاجاء اللقا تروي المتفوق = يعفتون خشم اللي براسه صعابيّه

وكثير من القصائد مثل قصايد ابن جاعان فيه وقصايد هجاج :

و((محمد)) اللي يلحق الخيل الأكوان = كم هية ٍ عند التوالي حظرها

ومثل

جعل ((محمد ٍ)) راسه يدوم = هو بل الريق لايبس الشفايا

وقصايد كثيره.

س : هل صحيح ان جسمه كان مليء بضربات الرماح والبنادق ؟

ج: صحيح وهي كثيره في جسمه ، في ساقه فيه ثتين وصدره في وحده وظهره من يسار فيه وقعة بندق .وغادن جسمه خربقه.

سنة من السنين يوم جينا عشيره ،وكنا حاجين قال ابوي ذي الخيام ويشهي ، ونجي صوبها لين ناطحنا فهد بن غشيّان ،
قال فهد : الأمير محمد بن وقيان؟ !
، قال ابوي ايه ،
قال فهد : هذي خيام فيصل بن عبدالعزيز قلطوا هناك
.
ويوم جينا فيصل بن عبدالعزيز قال ابوي نبغي رخصة على سلاحنا ، قال فيصل بسيطه غيرها شي قال ابوي لا .

ويقلطون الغداء ويوم قلطوه ، قال فيصل نادوا الدختور( الدكتور) ، ويجي الدختور ويجلس على صحنا مقابلنا ، قال فيصل لأبوي ذا الصواب ( صواب في صدر الأمير محمد بن وقيّان) عاده حي ولا ميت ، فضحك ابوي يوم ضحك زبد الصواب ، يوم زبد يوم طاح الدكتور على ظهره وهو يقول حي إلى ذا الحين حي إلى ذا الحين ، يوم ضحكنا كلنا
.
يتحدث محمد بن عبدالله الفرضان:

يقول علي بن عطران ، زار حياة فيصل بن عبدالعزيز المصانع في الخرج ، ويوم زارها لين عنده خبر حياة الشايب حياة محمد بن وقيان ، فيدوّر عياله لينهم كلهم صادين ، ولين عندهم فرت جديد موديل 1956م خابره انا ، ومالقاهم ماخذى لين ذا علي بن عطران جاي ، قال ياعلي انت تعرف تسوق ، قال علي : ايه ، قال اركب بي اركب بي .
يقول ونشغل الفرت ونجي ناصيه(فيصل) ، يوم دخلنا مع البوابة على مجلس فيصل لين قد هو فاز والناس فازين ولينه واقف (فيصل ) ومعطينا قفاه ، ولين الامير محمد يمشي على عصاته فصاح :

انت ياللي معطينا قفاك ، وقف خلنا نسلم عليك حنا جايين نسلم عليك مهوب على قفاك!

فالتفت فيصل يوم التفت لينه محمد وقيّان ، يقول والله العظيم انه ناطحنا(فيصل) وبشته مطشّر ويحب خشم الشايب واقبضه فيجلس جلسة ٍ ثانيه .ولاهو كان بيمشي.

س : هل ممكن ان تذكروا لنا احدى مواقف الأمير محمد بن وقيّان مع الملك فيصل رحمه الله ؟

ج : كان الملك فيصل رحمه الله يقدر الشايب تقدير كبير ويحبه يومه مع مغازيه كلها.

الأمير وقيّان بن محمد بن وقيّان آل نصّار

يتحدث الأمير وقيّان بن محمد بن وقيّان:

جينا عند الملك فيصل ، وكان عنده الأمير عبدالله بن محمد بن عبدالرحمن آل سعود ، ومعهم مطلق بن الدفين الهواشله الدوسري كان رفيق للأمير عبدالله ، حضرنا عندهم في المجلس ، ويوم قام الشايب من عند الملك . قال الملك فيصل للحضور :

عرفتوا الرجال هذا اللي قام؟! ، هذا ابن وقيان يوم امور الجهل ماخذ ٍ حقه ، ويوم جاء امور الدين خذى حقه !

فصاح شمري كان احد الحضور : الله بينا وبينه !! ، الله بيني وبينه !!! هذا اللي غمغم الحصان وحولنا من راس الحزم ( حدث هذا في غزوة من الغزوات) .

يعلمنا بعدها مطلق الهويشلي يقول ان الأمير عبدالله بن محمد بن عبدالرحمن قال :
والله اني حسيت ان كرسيي يوم ارتفع بي ، من كلمة الشمري وشهادته في ابن وقيّان.

الشيخ محمد بن وقيّان بن محمد آل وقيّان

س : متى توفى الأمير محمد بن وقيّان رحمه الله ؟

ج : توفى تقريبا رحمه الله حوالي عام 1980 م ، أي قبل 26 سنه رحمه الله واموات المسلمين.

س : الكثير يسأل عن وقعة العريق الشهيرة فما اسبابها :

ج : عقب ذبحة السبيعي اللي في العوشزيات ذابحينه الغييثات، جاء ابن خدعان السبيعي هادف ٍ على نسيبه وقيان بن نصّار ، وخدعان اخو عياله من ام وخوال عيال وقيّان سبيع ويجيهم خدعان ويقوم وقيان على ذاك القعود وينحره له ويعشي اياه .

يوم اصبح الصبح قال خدعان : ياوقيّان خل واحد ٍ من العيال يقطعني الدواسر
قال وقيّان ، اركب يافراج مع اخوك قطعهم الدواسر

وكان هذا في اول حكم عبدالعزيز عاده ماتمكّن من الحكم

فيركب فراج مع خاله واخوه على ذلوله ، ويوم جاء جبة سبيع ، فحول خدعان ، مدري هو حابل له مدري ويش غادي ٍ عليه، وراكز بشته ، ويجي فراج يعرضها وسط سبيع فقالو له انت فراج ، قال : اياه ، فمدوها عليه
قال فراج: مع اخوي مع اخوي ، فيمدها واحد منهم ويذبحونه .

يوم درى وقيان قال : ذبحوا فرّاج والله ان اسوق الضعن لين يحول وسطهم .
ساق الضعن ويرزون البيرق ويسوقون ارواحهم عليهم في الجلالية ويذبح خمسة عشر من سبيع ، واربعة من الغييثات منهم علي بن وقيان .

ولين الزود عند الغييثات خمسة عشر لحية ، يوم يقوله الشاعر دغش بن عريمان الشياحين .

قاموا سبيع وقلدوها الشلايل( الشلايل طلب الفزعه) ، وجابت بفخوذ سبيع ٍ كلبوهم ومعهم بعض من السهول.

يوم شافهم وقيان قلّدها الشلايل فيقلدها ا الشلايل وتجيب الدواسر اللي حاضرين حولهم مهوب كلهم ، الدواسر ذاك الحين صوب الوادي . جابت بالشكره ولاهوب كلهم آل حفيظ ومن معهم ، والحراجين كلهم وآل عمار كلهم وربع ٍ من الفرجان منهم ال عواد ذبح منهم اثنين وحضر بعض الدواسر .

ويتواجهون في العراص ويذبحون من سبيع 80 رجال ويغنمون بيوتهم ، واما ابن شوية فانحاش وخلى ظعنه وذبح بعدها بفترة ذبحوه الحراجين . فكان مجموع قتلاهم خمسة وتسعين وذكروها شعراء الدواسر .

قال دغش بن عريمان الشياحين الغياثات :

يالله يالمطلـوب ياعـدل النـظـر=ياللـي علينـا مضفـيٍ جمايـلـه
كله لعنى العرب حسكـات الوبـر=اللي لفتنا من جنوب ٍ حايله
تباشـرت بالـريٍ يـوم الله ومـر= سجـت غديـرٍ ثـوَرت حثايـلـه
أنشى على(( السبعانِ)) عج ٍ لـه كـدر= طاح( العماني) فـي نحا مخايله
(بسَام) و(الذعـذاع) و(الحـرق) إنعثـر=والكـل منهـم وسَـدوه أصايلـه
و(غرير) وإبن غرير في سدر المخر= معهم( العماني) طاح مآأحـدٍ شايلـه
اللي ذبح في الأوله> خمسة عشـر<=مـع <ثمانين> غـدوْ فـي التاليـه
ذيب الجلالية دعى ذيـب الشجـر=ثم إدَعـى بالطيـر مـن فضايلـه
دوك الزنايج روسها مثـل البجـر=أو جذوع نخلٍ في القرايـا عايلـه
ولد الشلف يصيحِ مع برد السحـر=ويلعـن مشيـرٍ عرَفـه قبايـلـه
دوك إبن شويه مع الربع النـير=وجنَب كبير البيـت مـع حلايلـه
فأنا أحمد الله لابتي خـزن الظفـر=سقم الحريب اللـي تغيـر القايلـه
آلآد الغييثي هم هل البوش العفـر = اللي على الموت الحمر متمـايلـه
نعم بربعي في نهار المحتضر = يوم الملاقا ياخذون الطايله
فعيا الله علينا بسبلات النظر = مع كل مدغوش ٍ مضت فعايله
فنعمٍ( بسنـدٍ) فـي حلته إعتـذر= يوم اشهب الملح والباورد هايله
وآلآد الحريجي كلهم خزن الظفـر=ياسعـدِ قـومٍ هـم مـن قبايـلـه
و(آلآدِ عمَارٍ) أهل الجـوخ الحمـر=وجموعهم مثل الجمال الصايلـه
(ويانعم يالفرجان) في يوم القـشـر=أهل المغازي والعـلـوم الطايلـه
فوالله لولا الشيخ حماي المدر=(عبدالعزيز) اللـي مضـت فعايلـه
فوالله ان نحدرهم مع وادي العشر = ثم إن نوريهـم نجوم القـايلـه

سند : سند بن حفيظ
عبدالعزيز : الملك عبدالعزيز بن عبدالرحمن .

ويقول هجاج بن عيد الغييثات والقصيدة بعد العريق :

يالله يالـلـي فوقـنـا رقـيـب=ياواصلٍ فينـا ماهـوب قطـوع
روَح برايـح ليـلـةٍ تنشيبـهـا=يومك لطلبـات العبـاد سمـوع
محيي قنيفٍ كن تكيشاف بارقـه=عليه من سل السيوف رمـوع
جعله على لطـوى ينهـل وبلـه=ومشيمـخٍ قبلـه عليـه رثـوع
نرعاه باللي سيرها متمرجـح= لاقعد ربيب العش معـه تبـوع
وضحـاً نـدللها ونتبـع شفهـا= كنها طموح ٍ مـن البنـي فـروع
ياراكب اللـي ريَـفٍ هذيلـه=توَه على حسب الغرض مصروع
نص النضو محمد ويـلا جيتـه=يآخذ علومك والنضـوْ مقـروع
تراه بيقول ياراعي النضو هيَـد= يويمن وخـل شديَـده مجفـوع
وتسابقـوه الجمـاعـة كلـهـم=قرومٍ لافيهـم خجـلٍ ولادنـوع
ماقصدهم الا ياخذون علومك =وسبقهم إبن غدفان على المطموع
ثم قل لهم وليدٍ يستعي في حربكم=كنه حصانٍ مابعـد جـاء طـوع
وقولوله إن جيتـوه وإلأ جاكـم=وأخير ماجابـه يبـي كرسـوع
وكرسوع حلفله بالله وعياَ يرضى=وعياَ يطيع فريضـة المشـروع
ولاعندنا له إلأ ضـرب المطحن = ومخيرات ٍ ضربهـن يروع
ينشـد غنيـمٍ يـوم ذاق ضربنـا=يمشي معـه ومنكبـه مقطـوع
خـلاَ المزيَـن ماإنثنـا من دونه =فوقه( العماشاء) خشمهـا مقطـوع
((خمسه وتسعين)) وطاهم جمعنا=كنهم الخشب في واديٍ مصـروع
حنا خذينا حقنا بايدينا = يوم التقينا في العريق جموع
يانعم يالسبعان في بيعاتهم =كنهم عيال ٍ يلعبون الشوع
فرحوا بنا يوم انهزعنا ساعه = وانا لهم سو البلا مجموع
فانا غلبناهم بضرب الهنمي = ومشوكات ضربهن شلوع
ثم ٍ خدمناهم بضرب سيوفنـا=لين الصعب من ضربنا جاء طوع
يانعـم والله ياصلايـب جــدي=يوم الموازر ضربهـن يـروع
و(بسّـام )خلـي طايـحٍ متكرسـع=لاهوب فـي سـرقٍ ولاممنـوع
لين هج السهلي يسحـب عباتـه=يدعي معه كلـب الغنـم جـدّوع
ولاخاين إلأ خاين خويّه =خوي ((خدعـانٍ)) يامـال الـروع
أخوه من السر رديـف إشـداده=أخوه لافيه لاطامع ولامطمـوع

س : هل صحيح ان آل وقيان كان يزبن عليهم الكثير من الجلاوية ؟

ج : كان ينزل ويزبن عند الغييثات الكثير من الجلاوية من الدواسر وغيرهم من القبائل يذكر لنا شايب من آل حفيظ الشكره يقول والله ان اربعين جلاوي كانوا مع الغييثات مره من المرات .

س : هل ممكن تعطونا قصيدة ابن مطرّف بعد ان هزموا اللدواسر الاشراف :

ج : القصيده معروفة يقول ابن مطرّف :

جليت وجلاني الشريف بن هاشم = وذا شرع من جلاه الشريف يخاف
وزبنا على رجال عتيبه = وقلوبهم صوب الشريف صخاف
وزبنـت علـى البقـوم والشـلاوى=كنهـم إقــرودٍ تتـقـي بإطـفـاف
وزبنـت علـى قحطـان المسـمـى=كبـار العمايـم والقلـوب إخـفـاف
وزبنا على غلبا سبيع بن عامر = يدوسون الارياء والعزوم ضعاف
وزبنا على لما رجال آل زايد = طوال القنا للحاربين اعساف
عيا علينا عامر ٍ بحياته =وداوا عما من لايشوف وشاف
خصيصتي منهم ارجال آل فادر = غشاهم من البيضا ذرى والحاف

آل فادر : الغييثات

وترى عنزتي منهم الفارس محمـد=عليـه مـن جديـد الجـوخ لحـاف
محمد بن فادر
ويانعم ياولد الفديري مقينع = سيفه من راس الشريف اعساف
ويانعم يا ولـد المبيعيـج ناصـر =صفراه في عج الخيل تغبى وتشـاف
ناصر الودعاني
والنعم يآإبن خطَاب يوم حمي اللقاء=جـواده منهـا السابقـات تـخـاف

ابن خطاب من الرجبان

فرس الفويضل كنها مهجورة = عليها من زين البتات الحاف
الفويضل من الغييثات من اجداد فيصل بن قبلان
إن أقبلت قدم الخيـل ليهـي الأولـة=وإن دبـرن ليهـي تجـر إخــلاف
ومناع ورشيد حديديـنٍ بالثـرى=رجـالٍ تـورَد شــذرة الأسـيـاف

مناع ورشيد من الغييثات

وعسى الله يحي لـي ديـار آل زايـد=وعسى دارهم عقب الربيـع إتصـاف
مازبَـن اللـي مثلنـا كـون مثلهـم=يوم إكسروْ عساكر دولـة الأشـراف
يوم مصافـق القـوم للقـوم إرتكـوْ=إرزان المواقف هم ذرى مـن خـاف

س : ماعلاقة الغييثة من شمّر ، والغياثين من آل مره بالغييثات ؟

ج: الغييثه من شمر ليس لهم علاقة بالغييثات انما هو تشابه اسماء ، اما الغياثين فهم غييثات فآل حرير هم عيال سعيد وراشد الحرير المظالمة ، وال الزقيمة من الجماعين
وعزوتهم عزوة الغييثات .

وفيه غييثي اسمه عبدالرحمن ابن ناهض راح مع عنزة مبطي ومعهم عياله الى ذا الحين ، ويذكرون فيه غييثات في بيشه والله اعلم .

س : هل ممكن ان تحدثنا عن غزوة هايف الفغم على الغييثات ؟

ج:أخذت ابل الفغم من قبل احد الدواسر ، ويوم درى ابن وقيّان عرف ان الفغم ماراح يسكت وبيغزي على الدواسر ،فقال محمد بن وقيّان : صدروا مع الابل ، صدروا الجنب مع الابل ، وصدروا الجنب مع الابل وقضوا لهم أربعة أيام في المضمى مع الابل.
يوم جاء نهار وردهم فغزى الفغم عقب ما اخذت ابله واخذ واحد من سبيع عشان يدله الطريق ،وخذى له سبيعي عشان يدل له الطريق وحول بهم مع المقطوع (طريق المطقوع) لأن العارض ضلع له محاويل ، وقال السبيعي اقضبوا الشعيب هذا وتمركم الابل اما وارده ولا مصدره.

وعقبن مرتهم يجي حوالا ثمان ذيدان للدواسر للشكره وللهوامله والدبالين وغيرهم والغييثات مابعد وردوا وخذوها مطير، المهم الغييثات وردوا وارتفعوا من فوق والوخيذ جاء من تحتهم ، وبقى ابن وقيان ومعه عشرة يبغون يلحقون الطرش اللي ورد ، ويوم قدهم شالين بيت الجنب يبغون يلحقونهم لينهم يشوفون الوخيذ ، ويعارضونهم العشرة ويوم انطحوهم لين القوم واجد وذولا ماغير عشر ، وعقبه خطموا عليهم طال عمرك ونوخوا في ذاك السليل وقاموا يضربونهم لين تلاحقت الفزاع ، وجاء صوباء واللي هج واللي منع ، المهم انهم ردوا الابل والفغم طلع مع الابل وراح مع اللي عتق وردوا الابل وخذوا منها ،
وقال الشاعر هجاج بن عيد :

يوم جانا الفغم في شملول قوم = فاحتديناهم كما حدي الضرايا
كثرهم يوم اقبلوا مثل الغيوم = وانا هل( عشر ) ٍ نطحناهم طنايا
ضربنا في راعي السابق لزوم = لين دبّر جيشهم غدى سقايا
جعل(( راس محمد )) عمره يدوم = هو بل الريق لايبس الشفايا
دون حسكات الوبر نرمي الهدوم = دونها ننطح دهاديم السرايا
نشبع السرحان هو واللي يحوم = والعقاير عندكم ياهل القرايا

وفيه غزوة ثانيه للفغم ودليلتهم واحد من الأعزه من سبيع شارطين له ، وانكسروا فيها ومنعوه وربعه وعطوه ثنتين زمايل يروحون بها لاهلهم، ويقول هجاج بن عيد :

يامن يعز النار الله يعزّه = يجذب سناها للي يجيب الجوازي
تعتام عليها معزة = وهرج ٍ نقوله مثل نقد الغوازي
يوم جانا( الفغم) جاذبينه الأعزة = يبغي وضاح شرّفت ٍ في النوازي
جانا وقمنا بالكريزي نكزّه = يحرم عليهن عادها بالمغازي
قومه خذيناهم وجيشه نخزّه = لعيون وضاح ٍ ربّعت بالعزازي
من دونها حوض المنايا نهزّه = لامن غدى خران الفشق له تنازي
و(المصطفى) جاء يبي وضاح ٍ يخزّه = وجانا نذر ذيدان عليها يكازي
و(العضب) هدم الله عزّه = خلي طريح ٍ بين الضرايا يمازي
من ذمنا عسى الولي ما يعزّه = حنا لشيخان القبايل نحازي

المصطفى : ابن نقادان من آل مره.
العضب : مطلق بن شقير من الدوشان مطير .

س : هل ممكن تعطونا قصيدة الفارس المشهور فارس (المخامل) جد الفوراسه من الغييثات؟

والله هي قصيدة طيبه ولايحضرنها منها الا :

ياهل الهجن يامترحلين = اهل ظمرن كنهن ريالي
عوجوهن براس الحزم ساعه = عوجوهن لي واخذوا سؤالي
انا في داير حطاب ليل = احطب باليمنى مع الشمالي
فلا ينفعك جدان قديمه = ان اخلفن نسولها التوالي
ولا ينفعك زاد ٍ كليته امس = يصبح بطنك منه اليوم خالي
ولاينفع الثوب السمر الترقع = ولاينفعك الرفيق السو العذالي
خله لاتقابل به خصيم = خله واقف ٍ مثل الخيالي

س: هل ممكن ان تحدثونا عن قصة البيت القائل :

الخيل عدة من المركي = ضرب الغييثات عداها؟

ج : غزو الدوشان مطير على ثلاثة عقداء الأول مطلق العضب الدويش والثاني شقير بن محمد الدويش والثالث ثويران أبو صفره أمير الرخمان يبغون العجمان ولكنهم طاحوا في الغييثات ، ويوم شافوا الابل المطران روحوا لهم رشيدي ومطيري .

وقال لهم الدويش : اكشفوا على العرب وشوفوا ويش كثرهم؟

ويوم راحوا وذبوا على العرب لين العرب توهم نازلين ويشوفون الخيل والابل والعربان واجد.
قال المطيري لخويّه الرشيدي : انت بتعلم سكت انا ولانيب متقـفيك ، منتب متعلم فانت اسكت وانا اللي بتكلم وبنعلم باللي شفنا.

قال الرشيدي : لا بالله انا بسكت وانت اللي علم .

ويوم جوا الاثنين عند الدويش.

قال الدويش ويش علومكم ؟!!

قال المطيري: علومي يالأمير اهنا عرب ٍ واهنا خيل واهنا ابل واهنا عرب واجد ماظنيت والله وراهم طماعة .

قال الرشيدي : يكذب الا ابشروا بالابل اللي اهلها قليل !!

قال الدويش للمطيري : ذليت العن ابو ذا اللحيه يالذليل .

قال المطيري : يالله كانه فقرني(يقصد الرشيدي) يالله جعل اول مخباط ٍ في راسه.

قال الدويش غرنا ياقوم!!

ويغيرون عند صلاة الظهر وياخذون لهم ثلاث ذيدان ويقفون عليها ويلحقون اهلها ويجي ذبح ، ويذبح فيها العضب مطلق بن شقير ، ومنع ناس منهم أبوعبيد وأبوصفره وغيرهم
وقال أحد المطران ذي الأبيات يحرض مطير انهم ياخذون في العضب :

مخيلة ٍ وبلها يركي = ضرب القريزي هل الماها
الخيل عدة من المركي = ضرب الغييثات عداها
والخيل بيعة على التركي = ياعلّها الزرد وفلاها
ياجادل عندنا تبكي = تبغي العضب ولاجاها

يتكلم الشاعر محمد بن عبدالله الفرضان :

سنة من السنين كنا شمال ويجينا ذاك الشايب الشايب الطويل العريض قال :
ماعينتوا لنا شمايل نوقات أخذت وسبلت ،قلنا ماعيناها ، شمايلن وعند الدواسر ،
قلنا تقهوى فعيا ، ثم قاله حياة ناصر بن حسن : رح دورها عند الدواسر ،عقبن قال الشايب : اقول هقوتي بحول اتهقوى ، يوم جلس وتقهوى قال :

انا شجاع المحرول من قبيلة حرب ،و خوالي مطير ومعهم يوم كنت اليا ذا الحين ، يوم جا هاك السنة فنغزي ، على الدويش ، ونغزي ، وقال والله انا نحصل هاك الابل الوضح الزينه ، فندبر علاها ،هاك الحين مانعرف الدواسر ، يوم دبرنا بها لين هاك الخياّل يوم ظهر علينا يا والله انه ورع يالله والله معليه ثوب اثره الحديبي ابا البرات ، والله ياعيالي ان الابل وقوف(ن) مع بعد جاها طلب ، اقبل الحديبي فضرب الاول وطرح الثاني .

فصاح الدويش : اطرحوا الخيّال لارحم الله ابو من قضبكم اعنتها !!

قال ليني سايق روحي عليه وانا جايني جفال ٍ منه ، ولين اخ الدويش ولد عمه سابقني عليه الله يجزاه خير ، لينه منطح اياها الحديبي فضربه في طرف وجهـه لينه طايح ٍ معنكص ٍ منها .

يقول لين الطلب جاي ،
اثرنا طحنا في الغييثات الله يقطع شجرتهم !!..

والله ماراح منا كون اهل سبع ٍ (سبع من الخيل سبّق) أبوهن واحد ا سبق والباقين حايوا به وحنا يجي ثلاث مية خيال .

الحديبي : الفارس المشهور سعد بن ادريس بن محمد آل عيد الغياثات
.
س : يابومحمد نبغي منك كلمة لشباب الدواسر في التمسك في عاداتهم والدين والعلوم الطيبه وعلوم ابوانهم واجدادهم :

ج: والله ياطويل العمر هاذي عليها طول يدها ، يعنا كلامك ذا في محله ،
وانا انصح شباب القبيلة بالحفاظ على عاداتهم وسلومهم الطيبه فوالله مايخلي شرع ابوه وجده الا اللي مافيه خير .

وانصحهم ان تكون كلمتهم وحده وانصحهم بتقوى الله وطاعة ولي الأمر ، والله يبارك في ذا الموقع اللي خلانا نشوفكم والله يبارك في مسعاكم الطيّب وحنا مستعدين باللي تبونه .

الأمير علي بن وقيّان

هذه أبيات للشاعر محمد بن عبدالله الفرضان في أمير شمل الغييثات الأمير علي بن محمد بن وقيّان ( حفظه الله ورعاه) :

يابومحمد جعل الأنذال تفداك =وياجعل فدن لك ردي العزومي
حيثك لنا ذخر ٍ لامن بغيناك = تطري علي لامن بدالي لزومي
مع طيب راسك تفعل الكيف يمناك=ورجل فهيم ٍ وعارف ٍ السلومي
لامن بدى لي لازمٍ فيك ننصاك = يوم انت قرم ٍ من خيار القرومي
لا صك جال ٍ جال كل تمناك = مثل الحصان اللي يسمى عزومي
من طيب ابوك وطيب جدك ومجناك =ولا جاء مجالك وقفن العلومي

الشاعر الكبير دغش البطي

الشيخ محمد بن وقيّان بن محمد آل وقيّان متوسطا ابناء عمه واخوته

ديوان آل وقيّان العامر

في ختام هذا اللقاء لا يسعنا الا أن نتقدم بخالص الشكر والتقدير والعرفان الى مقام الأمير علي بن محمد بن وقيّان حفظه الله سائلين له طول العمر دوام الصحه والعافيه، كما نتقدم بخالص الشكر للأمير وقيّان بن محمد آل نصّار وابنه محمد بن وقيّان وعموم أسرة آل وقيّان الكريمة على حسن الاستقبال وكرم الضيافه وسعة صدورهم .

والى اللقاء ان شاء الله مع امير من امراء قبيلة الدواسر العريقة .
موقع الدواسر الرسمي

**معلومات** **العضو** · 13-12-2006, 02:06 AM

وقد تفضل الأمير علي بن وقيّان حفظه الله ورعاه ووجه هذا الخطاب لأسرة موقع الدواسر الرسمي، شاكرا ً مجهودهم مجددا ً الثقة بهم كممثل القبيلة الرسمي على شبكة الانترنت .

**معلومات** **العضو** · 13-12-2006, 02:31 AM

ياهل النضا لا لفيتوا خبروا نـوره=مكّال قرصه يشوف الابل ولاجاهـا
بندق (الغييثي) على الشيخان ماموره=والموت مابين ملفظهـا ومجراهـا
الشيخ وقف يمالينـا علـى شـوره=ويقول جاذوب ياهل الجيش عفناهـا
دوك الغييثي يـوده عنـد مقهـوره=والشيخ منكم يقود القـوم ينصاهـا

(يشوف البل ولا جاها...قومه والله اللي وراها)

لقاء ممتع وجميل وفيه الكثير من الوقعات التاريخيه

المشرفه لقبيلة للغييثات والدواسر عموم

هايف العماني

بيض الله وجهك ووجهك من ساعدك على هذا اللقا الجميل

وبيض الله وجه الأمير علي بن محمد بن وقيّان

أمير قبيلة الغيياثات

على سعة صدره وكرم اخلاقه

وتوني داري ان خوال الامير وقيان هم الحباشين

عزالله ان ابوه عنّزه

وكفو يالغييثات اعلومكم غانمه من اول وتالي

تقبل تحيات اخوك

ابوزابن

**معلومات** **العضو** · 13-12-2006, 03:54 AM

نتقدم بخالص الشكر والتقدير والعرفان الى مقام الأمير علي بن محمد بن وقيّان حفظه الله سائلين له طول العمر دوام الصحه والعافيه، على سعة صدره وكرم اخلاقه

كما اشكر واثني علي ابومبارك وابو عبدالرحمن وابومحمد دغش البطي

بيض الله وجيهكم وعزالله ماقصرتوا

**معلومات** **العضو** · 13-12-2006, 05:20 AM

بيض الله وجيهكم يالنشامى على هذا الجهد ونتطلع الى لقاءات اخرى ان شاء الله

**معلومات** **العضو** · 13-12-2006, 05:50 AM

الأخوة الكرام

هايف العماني

ابو عبدالرحمن الودعاني

جهد تشكرون عليه

فبارك الله فيكم وفي مسعاكم

والغييثات مافيم شك من أول وتالي ففعلهم ينومس بني عمهم

مرة أخرى لكم من الشكر أجزله

**معلومات** **العضو** · 13-12-2006, 06:32 AM

حنا الغييثات لامن ثار دخاني *** رفقين وفقين ماتخطي ضرايبنا

يعجز الكلام والتعبير عن ايفاء الغييثات حقهم

على العموم بحجز مقعد هالحين ولي رجعه

تسلم يابو مبارك

**معلومات** **العضو** · 13-12-2006, 07:39 AM

الأستاذ الغالي هايف العماني

بيض الله وجهك يابو مبارك على تنزيل هذااللقاء التاريخي

وأمد الله في عمر الأمير علي بن محمد بن وقيّان

أمير قبيلة الغيياثات

وطالت حياته على سعة صدره وكرم اخلاقه

التي ليست بغريبة على رجلٍ بمقام الأمير علي

أكرر شكري لك ياابو مبارك ولبوعبدالرحمن الودعاني

**معلومات** **العضو** · 13-12-2006, 08:17 AM

الاستاذ القدير/هايف مبارك العماني
و
الشيخ الجليل/احمد ضيف الله الودعاني
بيض الله وجيهكم على هذا القاء التاريخي
مع الامير/علي بن محمد بن وقيّان
أمير قبيلة الغيياثات
ومع الأمير/ وقيّان بن محمد بن وقيّان
ومع الشاعر والراوي /محمد بن عبدالله بن فالح الفرضان
ومع شاعر المنتدى الشاعر المعروف/دغش بن بطي الشياحين الغييثي
وفي الحقيقه لقاء اكثر من رائع ويعجز البنان عن وصفه وشكر كل من شارك فيه
لقء تاريخي يسجل لهذا المنتدى العريق بما فيه من وقائع تاريخيه ومعلومات نادره وقصائد تنشر لاول مره وسوالف لم نكن نعرفها من قبل
لا يسعني الا الشكر للامير على اتاحه الفرصه والاجابه على اسئله الاخوان بكل صدرً رحب
والشكر كل الشكر لاستاذ القدير /هايف العماني والشيخ الجليل/ابو عبدالرحمن الودعاني
وشاعر المنتدى/دغش البطي
ولكم اجمل وارق تحيه
من اخوكم/ابن وتيد المسعري

**معلومات** **العضو** · 13-12-2006, 12:08 PM

الأخوة الكرام

هايف العماني

ابو عبدالرحمن الودعاني

وأبومحمد (دغش البطي)

لاهنتوا وبيض الله بيض الله وجيهكم يالنشامى على هذا الجهد

وأمد الله في عمر الأمير علي بن محمد بن وقيّان

أمير قبيلة الغيياثات

تقبلوا تحياتي

أخوكم

الصقر الحر

**معلومات** **العضو** · 13-12-2006, 01:11 PM

الاستاذ القدير/هايف مبارك العماني
و
الشيخ الجليل/احمد ضيف الله الودعاني
بيض الله وجيهكم على هذا القاء التاريخي
مع الامير/علي بن محمد بن وقيّان
أمير قبيلة الغيياثات
ومع الأمير/ وقيّان بن محمد بن وقيّان
ومع الشاعر والراوي /محمد بن عبدالله بن فالح الفرضان
ومع شاعر المنتدى الشاعر المعروف/دغش بن بطي الشياحين الغييثي
وفي الحقيقه لقاء اكثر من رائع ويعجز البنان عن وصفه وشكر كل من شارك فيه
لقء تاريخي يسجل لهذا المنتدى العريق بما فيه من وقائع تاريخيه ومعلومات نادره وقصائد تنشر لاول مره وسوالف لم نكن نعرفها من قبل
لا يسعني الا الشكر للامير على اتاحه الفرصه والاجابه على اسئله الاخوان بكل صدرً رحب
والشكر كل الشكر لاستاذ القدير /هايف العماني والشيخ الجليل/ابو عبدالرحمن الودعاني
وشاعر المنتدى/دغش البطي

وعساكم على القوة دايم الدوم

**معلومات** **العضو** · 13-12-2006, 03:21 PM

أمد الله في عمر الأمير علي بن محمد بن وقيّان
أمير قبيلة الغيياثات
والشكر موصل للادراه على هذا اللقاء الشيق الذي يبين التاريخ المشرف والذي يرفع الرأس والذين يتنومس فيه كل دوسري
وكفو والله يالغيياثات

**معلومات** **العضو** · 13-12-2006, 04:34 PM

اولا نشكر الامير الهمام علي بن محمد بن وقيان

على رحابة صدرة وعلى العلوم اللي تنومس كل دوسري

والغييثات قبيلة عريقة ولها امجاد وباس شديد وقد مدحهم الامير عامر بن بدران

ولا اعلم غير الغييثات مدحهم عامر (( مجاهيل حرب )) (( من صهيب بن زايد ))

(( وحريبهم منهم كبار.ن. غدايده )) (( كم هجمة.ن. من ضدهم زوعوبها ))

(( وجا الحول ماجمع بقايا رفايده )) (( سواقة المظهور من يمة العدا ))

انظر الى هذة الجواهر سبك من الذهب للامير عامر وشهادة حق للغييثات

وقد اعجبني لقاء الامير علي بن وقيان من اوله الى اخرة

ولا ادري ماذا اتخير لكن شدني مشيخت ال وقيان في الخرج وعدلهم مع الاخرين

حيث ان اهل الخرج يشتكون عند بن وقيان اذا اخذت معاويدهم واهل الدلم

فهو ياخذ بحق الضعيف من القوي وهذي قيم واخلاق الصحابه

وشهادة الملك عبد العزيز عندما قال (( ياكبر الموته كبراه )) وقد صدق

ولو كان في الباديه حاكم لحكم بن وقيان )) وانا اقول انه فعلا حكم الخرج

حتى اصبح الدواسر يفخرون بالخرج على اساس انه ملكهم وذلك بفضل الله ثم الغييثات

اشكر جميع من ساهم في هذا اللقاء المهم والذي نتشرف به نحن قبائل الدواسر

وننهل منه معلومات وامجاد حافلة تخص القبيلة بل الجزيرة العربية ..

**معلومات** **العضو** · 13-12-2006, 05:44 PM

الشكر كل الشكر للإدارة الكريمة على هذا اللقاء المثمر والأكثر من رائع ونسأل الله التوفيق للجميع

**معلومات** **العضو** · 13-12-2006, 08:15 PM

بيض الله وجه اداره المنتدى

هايف بن مبارك

وابو عبدالرحمن الو دعاني

ودغش بن بطي

بيض الله وجيهكم يالقروم

اخوكم ابو زيد

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
التغطية المصوّرة لحفل (ترقية الشيخ محمد بن مرّان بن قويد)وحصوله على درجة الماجستير برعاية الشيخ مرّان بن متعب بن قويد (حفظه الله تعالى)	الإداره	:: قسم اللقــاءات والفعاليات والتغطيات الخاصة::	51	09-10-2011 10:09 PM
التغطية المصوّرة لـ مراسم الصلح بين بعض من أبناء قبيلتيّ النتيفات والغييثات	الإداره	:: قسم اللقــاءات والفعاليات والتغطيات الخاصة::	17	10-02-2011 06:23 PM
التغطية المصوّرة لحفل إفتتاح مبرة قبيلة الدواسر الخيريّة بدولة الكويت.	الإداره	:: قسم اللقــاءات والفعاليات والتغطيات الخاصة::	16	22-11-2010 09:44 AM
تغطية الموقع الرسمي للقبيلة لحفل قبيلة الحراجين برعاية الشيخ محمد بن فهيّد آل ملحم شيخ قبيلة الحراجين المقام على شرف قبيلة الغفران آل مره .	الإداره	:: قسم اللقــاءات والفعاليات والتغطيات الخاصة::	18	19-07-2010 12:45 AM
التغطية المصوّرة (الحصريّة) لحفل الصلح بين فخذيّ آل سويلم وآل عرفج النتيفات بحضور أمراء ومشائخ قبيلة الدواسر .	الإداره	:: قسم اللقــاءات والفعاليات والتغطيات الخاصة::	28	16-07-2010 04:54 PM

الذين يشاهدون محتوى الموضوع الآن : 57 ( الأعضاء 0 والزوار 57)

		منتديات صحيفة وادي الدواسر الالكترونية