مناسبة قصيدة هجاج بن عيد وسالفة نخيعان القحطاني

[معلومات العضو العماني]

بسم الله الرحمن الرحيم

هذي مناسبة قصيدة الشاعر المرحوم هجاج بن عيد الغييثي ،والكثير سألني عنها وحبيت اذكرها حسب ماسمعتها :

وقصتها انها يوم الزمان الماضي وايام الجهل عساه ان شاء الله مايعود ويعز الاسلام ومن يقوم به .

كان الدواسر ينزلون على الجفير ، والجفير احد موارد الدواسر الشهيرة شمال الوادي واصله للغييثات ولما حدروا الغييثات اعطوا الجفير لبني عمهم المساعره وهو من موارد الدواسر المعروفة ، ينزلون عليه الدواسر ولا جاء الصيف اجنبوا الدواسر يقيضون في الوادي وخالفوهم قحطان على الجفير لأن حدهم قريب ينزلون عليه قصرى للدواسر ، ولامن جاء الصفري جو الدواسر للجفير واقفوا القحاطين وراهم لديرتهم وهكذا ..

وفي سنة من السنين نزلوا الجفير قحطان بقيادة نخيعان بن سعيدان آل عاطف عقب مااجنبوا الدواسر وقيظوا في الوادي ، وكان فيه صنّاع عند الجفير يقومون بساسة الخيل ويعملون السلاح ويحرسون الاماييح ويترزقون الله .

وفي يوم من الأيام قال نخيعان القحطاني كلمه مهيب زينه في حق الدواسر وهو على الجفير، وسمعها احد صنّاع الدواسر الموجودين في الجفير ، فقام الصانع وركب ذلوله وسرى للوادي ، ويوم جاء الوادي وراح وعلم ابن قويد في الوادي وقال له : هذا ما قال نخيعان فيكم عقب ماقيّظ على الجفير ..

فلما علم بن قويد لم الدواسر وغزى عليهم ، وجاهم من صوب نجد ماجاهم من جنوب بل جاهم من شمال حتى لايهرب احد منهم وحتى ياخذ حلالهم كلّه .

وفعلاً غزى عليهم وخم حلالهم كله ، وخذى الوارده وخذى المصدره وخذى المغبة وحوّل عليهم في الجفير ، وقد قتل (نخيعان) في المعركة ، ويقال أن قاتله الفارس سمحان من آل عمّار الدواسر حيث تقول زوجة نخيعان في ذلك :

يا اهل الركاب اللي تبون المتاعي =عانوا معزّبكم على العد قطّان
نادوه من تحت اللحد لين ياعي=اللي يرحب بالركايب (نخاعان)
ياوالله اللي راح شيخاً شجاعي=تراه يذكر فاللقا عند (سمحان)

وفي هذه المناسبة يقول الشاعر المعروف هجاج بن عيد الغييثات الدوسري هذه الأبيات :

استانس الشاعر على شبة النار = نار ٍ عليها كاسبين النفيله
جات السوالف مثل وارد وصدّار = مثل الدلي على القليب الطويله
احد ٍ بعد يقول انّا نهمل الجار = واحد ٍ يقول انّا نعز القبيلة
(مساعرة ٍ ) بايمانهم سو الاقدار = كم طلقوا في وردهم من حليله
فلاد (بوسباع) هم شر الاشرار = من علّقوا بالشلف واعزتي له
(مساعرة ٍ) نطاحة الهوش لاصار = كم حلة ٍ حطوا عليها وهيله
لاشالوا الريشه مع الصبح الانظار= كم حلة ٍ حطوا عليها سحيله
مثل (نخيعان) يوم حذفته الاقدار= عند الجفير الله يضيّع دليله
وسوالف( الرجبان) هل قحص الامهار= اهل المزيّن والسيوف الصقيله
كم واحد ٍ حطوا على كبده امرار = مركاضهم يبرى الكبود الغليله
ربع ٍ تغرس الغرس ماعليه احضار = ياكود مرد العميل لعميله
و(لاد حسن) دون حسكات الاوبار= يروون بحد مشرخات صقيله
اليا اعتلوا مثل الوضيحي الا ذار= لاعوّد الصياح يومي شليله
يردون حوض المنايا الا ثار = من طاح بالميدان محد ٍ يشيله
(يالمصطفى) مانرت ياطافي النار = خلّيت ملحا في ولدها شليله
(بالمصطفى) ماطعت ياعمس الابصار= ماطعت ابوك اللي علومه دليله(1)
(يالمصطفى) هذا( العضب) جاك زوّار = تنشّده و(ابن الدفين) الدليله(2)
(يالمصطفى) ذيدانّا مالها جار = نقتل وراها من الجوازي جميله
ان اشملت نرعى بها عشب الاقفار= وان اجنبت (لمشيمخ ٍ) ( والطويله)(3)
وحنا وراها بالكريزي اليا ثار = نقصر بها اللي حياته طويله

(1) : المصطفى من آل نقادان آل عذبه من أمراء ال مره المعروفين ويقال ان ابوه اوصاه ان لايغزي الدواسر فلم يطع وصاة ابوه وغزى الدواسر ولقي حتفه .

(2) العضب وابن الدفين من شيوخ مطير وقتلوا على يد الغييثات ، ويطلب الشاعر من المصطفى بعد مالحقوه العضب وابن الدفين ان يسألهم ما حصل بهم .

(3) مشيمخ والطويله من عدود الدواسر المعروفة .

رحمهم الله ونسأل الله ان يتجاوز عّنا وعنهم .

هذا ومن لديه تصحيح او اضافة يجيبها وشاكرين له

واشكر ابوخطاب الحطيم على الاضافه

كتبه : هايف العماني

 

 

 

 

[معلومات العضو تركي ال فنيس]

كفوووووووووووووووووووووو بربعنااااااااا وبيض الله وجهك يابومبارك
علي العلوم الطيبه



وقعة الجفير الاولي لان فيه وقعتين علي الجفير


http://www.aldawasser.net/vb/showthr...?p=717#post717

 

 

 

 

[معلومات العضو عبدالله بن عريمة]

بيض الله وجهك وكفوووووووووو و يابني عمنا
ماتجيب اللي كل علم طيب يابو مبارك عوايدك ياكحيلان
والله يرحم الشاعر الكبير هجاج بن عيد الغييثات

 

 

 

 

[معلومات العضو ابو زابن المسعري]

(مساعرة ٍ ) بايمانهـم سـو الاقـدار=كم طلقـوا فـي وردهـم مـن حليلـه

*****

وسوالف( الرجبان) هل قحص الامهار=اهـل المزيّـن والسيـوف الصقيلـه

*****

و(لاد حسـن) دون حسكـات الاوبـار=يـروون بحـد مشرخـات صقيـلـه

كفوا كفوا
واللي يطلق لسانه بالخطاء اقداه ماجاه
بيض الله وجهك يابو مبارك اعلومك عانمه من اول وتالي
تقبل تحيات اخوك

 

 

 

 

[معلومات العضو ابو زيد الغييثي]

ابووووووووووووومبارك لاهنت ياشوق البنت

وبنشد المصطفي اكثرت فيه القاله


والغياثات يقصدون فيه كثير واللي ذابحينه هم ولا الهوامله


اخوووووووووك ابو زيد

 

 

 

 

[معلومات العضو الرهاوي]

بيض الله وجهك وكفوووووووووو و يابني عمنا

ماتجيب اللي كل علم طيب يابو مبارك عوايدك ياكحيلان

والله يرحم الشاعر الكبير هجاج بن عيد الغييثات

 

 

 

 

[معلومات العضو دغش البطي انتقل الى رحمة الله مساء الاثنين الموافق 8-1-2007 رحمه الله واسكنه فسيح جناته]

بيض الله وجهك يابو مبارك على هذا الشرح الوافي

ماتجيب اللي كل علم طيب يابو مبارك وهذي عوايدك ياكحيلان

والله يرحم الشاعر الكبير هجاج بن عيد آل عيد

وكفو يابني عمنا كلهم وافين

تحياتي القلبية

محب الجميع

 

 

 

 

[معلومات العضو ابوعبدالرحمن الودعاني]

	ماشاء الله تبارك الله موضوع جميل وقصة رائعه وأبيات جزله وسرد بأسلوب رائع ..الله لا يهينك يابومبارك على هذا الجهد الكبير

 

 

 

 

[معلومات العضو ضامي]

بيض الله وجهك اخوي هايف


وعلوم الدواسر كلها غانمه

 

 

 

 

[معلومات العضو همام]

ابو مبارك بيض الله وجهك
على هذه القصيدة و ومناسبتها
وكفو والله ...وتراك جزل وماتجيب الا العلوم الجزلة
وفي إنتظار جديدك..

 

 

 

 

[معلومات العضو سالم الغريري]

بيض الله وجهك وكفوووووووووو و يابني عمنا
ماتجيب اللي كل علم طيب يابو مبارك عوايدك ياكحيلان
والله يرحم الشاعر الكبير هجاج بن عيد الغييثات

 

 

 

 

[معلومات العضو ابن محمد الودعاني]

بيض الله وجهك يابو مبارك

والله لايهينك على اجتهادك الطيب

وكفو ببني عمنا جعلهم المعزة

تحياتي لك

 

 

 

 

[معلومات العضو العماني]

بيض الله وجيهكم ياعصابة راسي ولاهنتوا على الردود المشرفه والكلمات الطيبه اللي افتخر بها .

تقبلوا تحياتي،،

 

 

 

 

[معلومات العضو سالم الغييثي]

صح لسانك يالعماني
وصح لسان الشاعر/ هجاج بن عيد الغييثات الله يرحمه
وبيض الله جهك

تقبلوا خالص إحترامي

 

 

 

 

[معلومات العضو العماني]

حياك الله اخوي سالم ولاهنت على الرد الطيب

تقبل تحياتي،،