حفل الوفاء بين الاصدقاء

[معلومات العضو شافي بن راشد النتيفات]

( حفل الوفاء بين الاصدقاء ) قصيدة تشرفت بالقائها في حفل الوفاء الذي اقامه الشيخ مشلح بن عايض ال صهرير النتيفات باسم قبيلة الدواسر على شرف قبيلة سبيع الغلباء تكريما للشاعر الكبير / فراج ابولسان ( لسان الذهب ) في يوم الجمعة الموافق 1435/6/25



باسم الرجال اللي تروم الطاله
اهل الوفا والمجد واهل القالة
ربعي وربعي من قديم وتالي
عون الرفيق وللعدو هياله
قبيلة ن تاريخها معروفي
في نجد حزنا المجد وإنا جباله
ياسعد منا محزمه في الشده
جمع يبشر بالسعد من جاله
ربعي نتيفات الفخر والمنسب
متسلسلين من زحول جماله
دواسر ياسعد منا ربعه
محزم ظفر عز لمنهو شاله
وقفت عنهم موقف يلزمني
موقف شرف واجب علي اسعاله
عن ناصر اللي يفعل الماجوبي
غيث يبشر بالروى هماله
واخوه حشر اللي ينومس ذكره
خصيمه يجفل عليه ظلاله
وعن مشلح اللي فعله ينومسنا
معرب ن من جده ومن خاله
مشلح ولد عايض عريب المجنى
البيض للي مثله تبناله
رد الوفا طبعه وطبع جدوده
ماهو غريب يوم يرخص ماله
الله يبيض وجه مشلح دايم
اللي يشرف لابته بافعاله
كلفني ويامر علي وينهى
يقول هذا الامر لك وانا له
وقفت عنه وحاضر له دايم
واقدم الترحيب من مدهاله
حفل الوفا قوم نهار الجمعه
على شرف منهو كفو لقباله
يامرحبا ياسبيع عند ربوعي
ترحيب طيب ماتثنى احباله
ياسبيع يارجال الفعول الجزله
صغاركم وقت اللقا خياله
ياسبيع ياجموع الظفر في الهية
قبيلة قدم العدو صماله
ياسبيع ياهل العزم والقوة
سميتو الغلباء على العياله
ياسبيع والله ماحدا يجهلكم
حدرى وعلوى للحمل شياله
ياسبيع يامجد يهول صيته
خلدتو اسما معتلي بالحاله
يامكرمين الضيف والجيراني
ويافزعة اللي غبنه يوراله
وياستر منهو يلتجي بحماكم
انتو ذراه وفزعته وظلاله
عوق الخصيم اللي عنا طمعاني
ياهمه وياغمه وسلاله
مهما كتبت من الشعر بالغلباء
ماتوفي حقوق الرجال اقواله
واللي جذبني وانتهضت بفكري
رد الوفا واجب على من طاله
واللي بدابه شاعر سبيعي
فراج يمدح له كفو بجزاله
يمدحك يامشلح ويمدح ربعك
ومدح الرجال يشرف اللي قاله
من قدم المعروف يلقى مثله
عند الرجال يحصله ويناله
يالعامري طيبك وصيتك بين
فعلك نعده للرجال رساله
والله العظيم اللي مانعبد غيره
اللي مانسجد خوف كون الا له
انك كفو ومجمل بعلومك
وانك سناد مايزعزع جاله
ياسعد من حطك سناد ومحزم
عز الخوي كم كايد ترقاله
واخر كلامي للنبي محمد
عليه صلى الله وسلم واله

الشاعر / شافي بن راشد النتيفات

 

 

 

 

[معلومات العضو سعود بطحيه]

الله يصح لسانك يابوشالح ع هاالقصيدة الجزله ولاتستغرب من شاعر كبير مثلك الله يحفظك؟

 

 

 

 

[معلومات العضو نآصر البدراني]

صح لسانك مدد بلا عدد


وافي يبو شالح وقصيدك دوم وافي


بيض الله وجه الشيخ مشلح بن عايض النتيفات على فعله


وفراج السبيعي وربعه يستاهلون

 

 

 

 

[معلومات العضو راشد المسعري]

صح لسانك يابو شالح ملايين على هالأبيات
ويستاهل الشيخ مشلح وخويه ابو لسان هذا الحفل المميز الذي يليق باسمهم وبربعهم
دائمً جزل يابو شالح ولك حضور يميزك في المحافل
تقبل ودي وتقديري ،،،

 

 

 

 

[معلومات العضو موسى ابومشهور]

الله الله يابوشالح دوما مبدع وشاعر جزل لك مكانتك والروعه
في قصايدك الشامخه صح لسانك شاعرشافي النتيفات