قصيدة ((( توصف لنا احوال الناس عندما يتقدم بهم العمر )))

[معلومات العضو مسفر المصارير]

بسم الله الرحمن الرحيم

ما جاء من المولى فانا راضيٍ به =نمشي على دربٍ به الناس ماشين
من يحسب ان العافية دايمٍ لـــه =لابد ما ينقص إذا تم ستيــــــــــــــن
وان تم سبعينٍ بدا فيه خلـــــــه =يمشي كما الاجنف بتالي البعاريــن
وان كان هو تم الثمانين قلــــــه =ياخذ عصاه وفارقوه المحبيـــــــــــن
وان تم تسعينٍ حياتـــه مذلـــــه =شاف الغبن والذل لا تم تسعيـــــــن
والا الميه لا تمها منتهىً لـــــــه =عقب الميه ما يفهـــم الزين والشين
الموت محدٍ ضايعٍ ما يدلـــــــــــه =يلقاه لو عانق طيور الشياهيـــــــــن
نجم الذراعي ودع الزرع كلـــــه =لو كل يومٍ تسقي الزرع دوريـــــــــن
وتعطا كتابك في يمينك تفلــــه =أو في شمالك والغبن بين الاثنيـــــن
يارب غفرانك إذا قلت زلـــــــــه =آمين يا قابل صلاة المصليـــــــــــــن
يا مالك الاملاك والكون كلــــــه =يا قاضي الحاجات يا موفي الديــــــن
اسألك قلبي لا تزيغه ودلــــــه =إلى طريق الأولياء والنبييــــــــــــــن
وهذا تمام القول وان بان خلـه =ارجوا السموحه يا الرجال الكريميـــن
وصلوا على المعصوم عن كل زله =ما لاح ورقٍ في رياض البساتيــــــــــن

وتقبلوا تحياتي
أخوكـــــم/ أبو منيرة

 

 

 

 

[معلومات العضو أبوفهيد الودعاني]

ابو منيرة

سلمت يمينك طال عمرك على هذه القصيدة الرائعه بالفعل

وياليت لو تقول لنا من قايلها جعلك تسلم

تحياتي لك

ولاتبطي بجديدك ،،،

 

 

 

 

[معلومات العضو دغش البطي انتقل الى رحمة الله مساء الاثنين الموافق 8-1-2007 رحمه الله واسكنه فسيح جناته]

ابو منيرة

سلمت يمينك طال عمرك على هذه القصيدة الرائعه بالفعل

قصيده واقعيه وتتكلم بلسان كل إنسان

من رؤية حقيقيه نسأل الله حسن الختام لنا ولكم ولجميع المسلمين

ولكن لم تذكر لنا من قايلها ؟؟؟؟

تحياتي لك

دغش البطي

 

 

 

 

[معلومات العضو مسفر المصارير]

مشكورين حبايبي:
- أبو فهيــــــــد
- دغش البطي

هذي القصيدة قديمة للشاعر/ إبراهيم المهنا.
أعجبتني واجد وحفظتها لانها من أجمل القصائد التي سمعتها

لا هنتوا حبايبي

ولكم تحياتي
أخوكـــم/ أبو منيرة