ماذا قال الودعاني عندما سالوه عن نسبه

[معلومات العضو مجري الهياب]

اخواني الكرام هذه قصيدة للشاعر الكبير سعد بن مبارك ال شواي الودعاني عندما ساله احد الشعار ليش انت ساكن في الاحساء وانا خابر الدواسر في ديارهم وقال من اي الدواسر انت : فرد عليه الشاعر الفحل سعد الودعاني بهذه الابيات :

1 ياقديم الشعـر جيتـك مـن جـداده =شاعرٍ .. متحمٍس .. طرب .. منقادي
2 عـارفٍ ذا الليـل ورده ومـيـراده =لاهـوِ بكـاذب ولاهـوب متمـادي
3 ياكثـر نـاس(ن) عـن الاسـم نشـاده =ودّهـم حتـى بتـاريـخ مـيـلادي
4 كـان كــلٍ(ن) لازم يـذكـر بــلاده =وكـان كـلٍ لازم إيعـد الأجــدادي
5 ناصريّ طيـب راسـه مـن أجـداده =ربعي أهل الطيب في فرعـة الـوادي
6 لابـةٍ علـى المواجيـب معـتـاده =سلمنا من أطيـب سلـوم الأجـوادي
7 نارنـا علـى الطـويـلات وقــاده =شعقها بيّـن علـى كـل مسنـادي
8 فزعـة الخايـف وملجـاه وسنـاده =مزبنه لامـن حـدا رجلـه الحـادي
9 كـل منـا يقـدح الطيـب بـزنـاده =نــدّرٍ نبـيـع الأرواح ونـفـادي
10 كـل مجـدٍ معتليـنٍ علـى شـداده =وكـل عـزٍ فـي مقـادمـه روادي
11 يشهـد التاريـخ لا ذكـروا أسيـاده =من سلاطيـن المراجـل والأسيـادي
12 صبينـا يرضـع كرامتـه فـمهـاده =طلعتـه تفـرق علـى كـل الأولادي
13 شوق من يزهـاه سلسـال وقـلاده =محزم المضهود لامن عـدا العـادي
14 من قـدم منـا علـى مجمـعٍ قـاده =العسـر ينسـاق معنـا وينـقـادي
15 لابـة الطـيـب المـعرّب ورواده =روسنـا علـى الطـويـلات ورادي
16 بالغيـنٍ فالفـخـر ذروة أمـجـاده =وقعنا بيّـن علـى روس الأشهـادي
17 الكـرم فـي دمنـا والوفـا عــاده =البزر منـا علـى الجـود معتـادي
18 أهل ذمـه وأهـل توحيـد وعبـاده =الصـلاة أنقيمهـا جمـع وأفـرادي
19 رجلنـا نفسـه لـمـولاه منـقـاده =مايزيـد الهـرج والمـذن يـنـادي
20 القصيـدة كنهـا تبـغـي زيــاده =ولو بغيـت ألفيـن جريتهـا عـادي
21 الشعـر غيمـه وبرقـه ورعــاده =في يديني مانـي لاعـوب قصـادي
22 أبرك أيام الشعـر واجمـل أعيـاده =مدحي لربعي مـن أيـام الأعيـادي
23 كـل راسٍ طيـبٍ مـدحـه قـنـاده =ومدحي لربعي طنا الـراس وقنـادي
24 شاعـرٍ(ن) أصـوغ الإبـداع كالـعـاده =ما أرجع ليا رحت قبل أبلـغ مـرادي
25 شاعـر(ن) سليـم قلبـي مـن أحقـاده =ياكثـر ربعـي وياكثـر حـسـادي
26 لاتهنـا بـارد الــراس بـرقـاده =ما أهتنت عينـي ولاجانـي رقـادي
27 الجبو .. لافـاق كبّـر لـه وسـاده =والا أنا لا ضقت طاولنـي سهـادي
28 مـا بهـم القلـب شـربـه ولا زاده =و لا بهـا الدنيـا سبايـب تجـلادي
29 شاعـرٍ(ن) متجاهـلٍ هـرج حـسـاده =و أن نواهم.. طـق كـلٍ مـع وادي
30 الخبـل يقفـا وبــلواه مــزداده =مايعرفني ليه ..مـدري لـي معـادي
31 ما أعترضته ميـر يبغـا التوسـاده =يوم جاني قاطـع السيـد متحـادي
32 عندي كعامـه وفـي ايدينـي قيـاده =محقه أن جا بين صادي ومرصـادي
33 شويعـرٍ الشعـر معتبـره جـهـاده =متـّر الساحـات سـرداد مــردادي
34 ما نفـع شعـره وسـرداد مـرداده =مــا نـفـع ولا تـعـلا ولا زادي
35 يحسب أن الشعر يا ريـم .. ياغـاده =لعنبو ذا الخبل ياويـن هـو غـادي
36 عيفـةٍ أن نقـّص العلـم و أن زاده =لا هو بحولي ولا هـو مـن أنـدادي
37 والردي لو للوفـا زدت حـد حـاده =مـا يعـرف الا طريـق التنـقـادي
38 لو يسقّا العلم مـع فمـه مـا فـاده =ما أستفاد مـن التجـارب ولا فـادي
39 باقيٍ علـى دوا عيونـه .. وعـاده =في عروض النـاس هـذار ودوادي
40 الشعـر همـه وعـدتـه وعـتـاده =أهطـق بقـاط فالشعـر عـصـادي
41 اللغـا والحكـي مانـيـب طــراده =أخذ أحسن ما أسمعه وأتبع القـادي
42 الشعـر وأهلـه وناسـه ونـقـاده =يعرفوني ما بشعـري شعـر عـادي
43 مبـدع مانيـب أحـب التـوجـاده =ما بعـد فالشعـر سمعـوا توجـادي
44 ياكبـر بيـن الضلـوع التحـشـاده =ولانـي بمليـوم سبـة تحـشـادي
45 التشكـوي فالشعـر مــا الله أراده =حـدوةٍ مانيـب والله لهـا حــادي
46 واضـحٍ مكـان شعـري ومقـعـاده =ثابـتٍ فالنجـم ماهـوب متـهـادي
47 البحر لو هـو حبـر تنفـذ أمـداده =ما أنفذت كلمات شعري ولا أمـدادي
48 العدم فـي الشعـر متعـوّد إيجـاده =أخلقـه ولا حـدٍ يشبـه إيـجـادي
49 فالقمم لـي موقـع وعـزم وإيـراده =ياكثـر جمهـور شعـري وشهـادي
50 ذا وأنا مانيب فـي حاجـة إيشـاده = أجملي يفرق عـن النـاس وشـدادي
51 فـالتميّـز بالـغ قلـبـي مــراده =يختلـف غيمـي وبرقـي ورعـادي
52 ولي فـي ليلـي أعتكافـه وسجـاده =أطلـب الله الـهـدا والله الـهـادي
53 ولـي رقـابٍ فـا اللوازيـم سـداده =في لزومي كـم أبـن عـم سـدادي
54 لو يزيـد الوقـت قسوتـه وعنـاده =واردٍ وردي ومـعـروف مـيـرادي
55 وأعرف أنذال الشعر وأعرف أجـواده =بس طبعي صامت وعادتـي هـادي
56 ولي بدرب الطيب والمرجلـه عـاده =بالجمايـل دايـمٍ وجهـي الـبـادي
57 وصيدتي جفـول ماهيـب منصـاده =عسـرةٍ ماهيـب للنـاس تنصـادي
58 ما أعرف إليا مـن قدمـت التـرداده =صاملٍ .. سمحٍ متـى ودي عنـادي
59 وكان لامن رحت مـا جبتنـا فـاده =أستوى مـرواح رجلـي ومقعـادي
60 جمـرةٍ طفّـت وهـي كـان وقـاده =ربهـا عـاد أبـردت كبـد نشـادي
61 وكـان لا هلحيـن هالنـاس نشـاده =أسكن الأحساء وربعي هـل الـوادي

وقد ايقن صاحب السؤال ان ا الشاعر سعد الودعاني من قبيلة عريقة وعرف من يكون سعد الودعاني ننقل تحيتنا الحارة للشاعرسعد بن مبارك ال شواي الودعاني ارجو ان اكون وفقة في نقل القصيدة تحياتي ( منقول )

 

 

 

 

[معلومات العضو ولد ودعان]

ناصريٍ طيب راسـه مـن أجـداده=ربعي أهل الطيب فـي فرعـة الـوادي

اخي الكريم مجري الهياب بيض الله وجهك على هذه القصيده والف نعم بالشاعر سعد بن مبارك ال شواي الودعاني االي نومسنا في قصيدته وموضوع مميز يستحق النقل والشكر عليه

تقبل حياتي

اخوك ولد ودعان

 

 

 

 

[معلومات العضو فيصل الشكري]

بيض الله وجهك يامجري الهياب على نقل القصيدة لنا



وكفو ومليون كفووو بالوداعين ولايكفون وصح لسان الشاعر الكبير سعد بن مبارك


وتقبل تحياتي ,,

 

 

 

 

[معلومات العضو المسعري]

بيض الله وجهك ووجهه


شاعر جزل ماعليه كلام


قصيدة يحق لكل دوسري أن يفتخر بها

سلمت وسلم الشاعر

 

 

 

 

[معلومات العضو سلطان محمدسعود]

الاخ مجري الهيايب ياسلام على هذه القصيدة وبي الله وجهك على نقل القصيدة المشرفة لكل دوسري

 

 

 

 

[معلومات العضو نديم القلم]

بيض الله وجهك و وجهه على القصيدة الجزله

اطيب تحية

 

 

 

 

[معلومات العضو مجري الهياب]

ولد ودعان لاهنت وبيض الله وجهك على المرور تحياتي ..

 

 

 

 

[معلومات العضو ابو زيد الغييثي]

بيض الله وجهك يا مجري الهياب

وصح اللسان شاعرها وسلم ناقلها

ولا خلا و لا عدم

 

 

 

 

[معلومات العضو مجري الهياب]

الاخ فيصل الشكري لاهنت وبيض الله وجهك على المرور تحياتي ..

 

 

 

 

[معلومات العضو مطحس الودعاني]

كفووووووووووووووووو
يا ولد عمي

 

 

 

 

[معلومات العضو ريان شمال الودعاني]

بيض الله وجهك يامجري الهياب على نقل القصيدة

وصح اللسان شاعرها

 

 

 

 

[معلومات العضو السيف دايـم]

بيض الله وجهك يامجري الهياب على نقل القصيدة

 

 

 

 

[معلومات العضو مجري الهياب]

الاخ المسعري لاهنت وبيض الله وجهك على المرور تحياتي ..

 

 

 

 

[معلومات العضو محمد الهويشلي]

بيض الله وجهك على هذه النقل المتميز

 

 

 

 

[معلومات العضو مجري الهياب]

الاخ سلطان سعود لاهنت وبيض الله وجهك على المرور تحياتي ..