قصيدة في الأمير / خلف بن فيحان بن خلف بن قويد

[معلومات العضو متعب المسعري]

السلام عليكم ورحمة الله وبركاته

هذه القصيدة مهداه وردّ ثني للأمير / خلف بن فيحان بن خلف بن قويد ...
***

يا رافع سبع وسبع بسيطات

يا مرسين فوق الوطا الشامخاتي

يا فالق أمواج البحور الغزيرات

يا مدبر الأفلاك والذارياتي

يا عالم أسرار الوجود الخفيات

يا وآمر الأقدار والكايناتي

يا كاسين لحم العظام الرميمات

يا باعث الأرواح عقب المماتي

يا غايث جرد الديار المحيلات

من نو مزن ساق عقب البياتي

ساق وتساقا والمخايل حقيقات

سحبه تعاقب لين شاخ النباتي

يا كافل بالرزق كل البريات

يا فارضٍ للعبد صوم وصلاتي

ارجيك يالمعبود با خلاص نيات

يا عالم الأسرار والخافياتي

عفوك ولطفك يوم كشف الستيرات

بالماقف اللي يذهل المرضعاتي

في ساعة تبين فيها الحسابات

يوم الخلايق مع عراها حافاتي

كل وما قدم خطايا وحسنات

في دفتره يلقا هن مسجلات

يوم البشر قسمين ما به زيادات

أما شقي ولا سعيد الحياتي

يا سامع صوت الدعا والمنجات

يارب تاخذ بي عن المخطياتي

وارفع مقامي عن طريق الملامات

استباح الصدر مكنون ذاتي

وأسباب ما دك الهواجيس بالذات

والشعر جاله يالعوارف طراتي

شيخ الشيوخ اللي علومه رفيعات

ابن قويد مطوع القاسياتي

بالمال ولا بالعلوم الحكيمات

شيخ فعوله ما بها مجادلاتي

خلف بن فيحان راع المروات

ما هو من أهل الهون والهيناتي

ما ينثني إلا للحمول الثقيلات

يا عز من ينصاه بالموزماتي

رجل عزومه طول وقته قويات

وجاه ووجاه ويدرك النايفاتي

راع الكرم والطيب ما به مروات

وعليه من هداج وصف وصفاتي

هداج تيما بالسنين القديمات

ما ينجهل به ي هل الطيباتي

تسعين غرب ورودهن والصديرات

ما غيضن هداج مثل الفراتي

مضرب مثل معروف بين الروايات

من مصدر مصادره واثقاتي

وعليه وصف من الحرار العطيبات

نادر حرار تذبح المجزلاتي

من ماكر معروف ما به غوايات

وطير السعد نوادره نادراتي

شيخ أهل الوادي رجال المهمات

كف الدواسر من جميع الجهاتي

خلف بن فيحان يا هل الفضيلات

اللي عطاني طيب المعطياتي

جزل وعطايا الجزل دايم جزيلات

وخلف خلف ياللي تعرف اللغاتي

عطاني اللي نادر بالعلامات

الأملح اللي ما به مغالطاتي

عضد ونحر ويضا المواطي عريضات

أصهب وصوفه كلها كالفاتي

وصايفه يا هل المعاني عجيبات

وأنا أذكر الله ما به مزوداتي

ذكره تعدى أصحابنا والقرابات

كل دري بهدو راع الطالات

ولا هي على راع الجزايل غريبات

خلف سلايل طيبين النباتي

مروين مصقول السيوف الرهيفات

لأثار عج القرح الصافناتي

كم فارس طشوه بالمهمهيات

أولاد زايد لا نتخو بالبناتي

عوق الخصيم ويلحقون الرديات

يوم المراجل في ذرى المرهفاتي

أرداهم اللي ما يهاب المنيات

فهود الرجال متعبين العداتي

ومزبان من ضاقت عليه الوسيعات

دخيلهم ما يشكي الموحفاتي

باطرافهم يلقا الأمن والمسرات

يرتاح عقب مسامر السرياتي

واخص في معناي راع النفالات

اللي علومه كلها وافياتي

هذاك أبو فيحان ما فيه شكات

بن قويد مروض الكايداتي

شيخ الدواسر والمعني مجيدات

ما شاخ بافلوسه مع التالياتي

شيخ عروقه بالمعامق عريقات

ميراث جد ولا بها مجاملاتي

الشيخه جتهم بالسيوف الصقيلات

ما جت لين فيحان بالواسطاتي

حاضر وماضي والوثايق جويدات

ولا خير بعلم ما يجيله ثباتي

أمجادهم ما تنحصي بالسجلات

بالحاضر الملموس والماضياتي

وختامها يا كاسبين الجمالات

يا فزعت المضيوم بالناتياتي

ما قلتها إلا لجل مقصد وغايات

ومقصادي يا هل الوفا واضحاتي

رد الثنا لهل الثنا بالطويلات

وارجو السموحه كان زلت دواتي

وثني سلامي مع جزيل التحيات

سلام أحلى من نما المثمراتي

ولذ من در البكار الهجيلات

وازكا من الريحان والنافلاتي

لبن قويد إعداد وبل المخيلات

خلف بن فيحان قصد معاناتي

اللي علومه بالمجالس عذيات

شيخ يحل بعرفه المبهماتي

ابن قويد اللي له مقديرات

عند النشاما يا هل الواجباتي

هديته تزود بالمعنويات

الغانم اللي يدرك الغانماتي

لعل أيامه والليالي مديدات

اللي نظوره دايم عالياتي

الله يجبره من صودف المصيبات

ومن لفحت الزمان والافحاتي

وعسى حياته حافلة بالمسرات

ابن قويد مزبن الوانياتي

مدهل رفيعين النفوس العزيزات

صفوت مشاكيل الرجال العواتي

وزود على ذلك نفل بالضافيات

وراع الكرم مكارمه ضافياتي

وما قيل دل وعد ما بالمحيطات

وإعداد ما يذري هوى السافيات

وعد الغصون المورقة والهميدات

صلو صلاه الفرض والنافلاتي

على النبي ختام الرسل والرسلات

شفيع ألامه هادي الغاويات
***

الشاعر / سعد سعود بن مغلي الحزيمي العتيبي

عند النقل الرجاء ذكر المصدر
www.dossre.com/vb

ملـتقـى شـبـاب قبيلـة الـدواسـر الرسـمـي

 

 

 

 

[معلومات العضو (الوليد ابن قويد)]

صح لسانك ياسعد بن سعود الحزيمي العتيبي
ويستاهل الامير خلف بن فيحان ابن قويد المدح و غني التعريف
مشكور يامتعب على طرح القصيدة ونتمناء نشوف جديدك

 

 

 

 

[معلومات العضو محمد بن حمد الشكرة]

صح الله لسان الشاعر/سعد بن سعود الحزيمي العتيبي ويستاهل الشيخ/خلف بن فيحان بن خلف بن قويد الطيب والعلوم الغانمة وهو يحري بها ولاهنت يامتعب على النقل ولاعدمناك ياالقرم تقديري

 

 

 

 

[معلومات العضو راشد المسعري]

ارحب يامتعب والقصيدة سمعتها شخصياً من شاعرها سعد الحزيمي في مقر قناة الصحراء بالرياض وقد واجهته ويوم درى إني دوسري سمعني هذه القصيدة في الشيخ خلف بن فيحان فبيض الله وجهه يوم بيض وجيهنا قدام القبايل ولا غرابة فهو سليل الشيخ فيحان بن خلف بن قويد رحمه الله. وللجميع ودي وتقديري ،،،

 

 

 

 

[معلومات العضو عبدالله الحافر الغييثي]

يستاهل ابوفيحان وهذا قليل في حقه وصح لسان شاعرها ولاهنت يابن مسعر على النقل

 

 

 

 

[معلومات العضو ابومبخوت الدوسري]

عليكم السلام ورحمة الله وبركاته ارررحب يامتعب المسعري صح الله لسان الشاعر/سعد بن سعود الحزيمي العتيبي ويستاهل الشيخ/خلف بن فيحان بن خلف بن قويد ولاهنت يا السنافي على النقل وتسلم يمناك ياالقرم تقبل تحياتي وتقديري ,,

 

 

 

 

[معلومات العضو تاج راسي]

شيخ عروقه بالمعامق عريقات


ميراث جد ولا بها مجاملاتي


الشيخه جتهم بالسيوف الصقيلات


ما جت لين فيحان بالواسطاتي



كفو كفو في ذمتي

صح لسان الشاعر وجعلك سالم ياللي نقلتها لنا