قبيله يعربيه والفعايل عالميه

[معلومات العضو حسن بن بطحيه]

بسم الله الرحمن الرحيم.. السلام عليكم ورحمة الله وبركاته. الاخوه اعضاء الاداره الكرام الموقرين ارجو واتمنى اجابة طلبي قولو تــــــم تثبيت هذه القصيده هذا اول طلب مشكورين. ثانيا هذه القصيده لها فتره حبيسة الادراج كنت متردد في تنزيلها لطولها ولكن لحق قبيلتي علي رأيت وجوب نشرها تقبلوها بصدر رحب لاعدمتكم اعضاء وشعار وزوار.. ثالث فيه بيت ضمن القصيده حبيت توضيحه معناه لما قصدت وهو القائل..

ومنهو اللي قد نسى صرخة وسيم العامريه=يوم غنت مرثيتها مانسوها الغانميني

القصدليس بالحرب والانتصار رغم ان هذا حق مشروع لكل القبايل والرجال تاخذ وتوخذ من خلقة الدنيا وكل فيه حقه من الجودفي كافة قبايل الجزيره.. افتخاري بمافعلو الدواسربعد الحرب رغم ماراح منهم في الحرب عندماسمعوقصيدة العامريه المشهوره(والنخل)هذا ماقصدت والمعذره للاطاله

يابنات الفكريوم الشعرجاله قابليه=ساعديني وستعدي هاتي المعنى السميني
ابتدي بسم الله المعبودعلام الخفيه=وبتدي نظم البيوت الي تسر السامعيني
غيمة سحب المشاعروستهلت ببرديه=وقعهابالطرس فيض وارزمت شوق حنيني
فكرة الموضوع عندي والحون السامريه=والبحروالعجزوالطاروق طاروق حزيني
والقصيده كان عنهامايقال جهنميه= مايخارج قول صح الله لسان القايليني
وزحمة الشعارواللي يدعون الشاعريه=ماتغيب شاعرية شاعر الابداع فيني
شاعريتي دون مال ومركزوسلطه قويه=سلطتي حشمة قصيدي من كلام الناقديني
موهبه والموهبه من عند خلاق البريه=والتجارب والثقافه تصقل العقل الفطيني
ولحيتي ماهيب لحية من يغني بالرديه=حالف اني ماتمثل غيربالجزل الثميني
والمهايط والعلوم السرمديه سرمديه=ماتغطي عقدة النقص المركب لايبيني
اتخيرمن نوادر فكرتي غرفتيه=ياقصيد يبهر الحضار ولاالصمت زيني
شاعرماملك من الدنيا سوى نفس غنيه=والقناعه راس مال الانبياء والمرسليني
يوم غيري حل في وادي المذله والزريه=رافع راسي كفاحي في حياة الكادحيني
ويوم بعض الناس عندالناس يسعى للعطيه=لقمته من فايض الفضلات عند الموسريني
عارف مقدارنفسي بين كل الاغلبيه=وارتفع وشوم عن عثرات ناس هابطيني
والوصيه يوم صاني بها راع الوصيه=باقيه لليوم هذا ماثله قدام عيني
قال دامك رجل متعافي ولك نفس ابيه=حث رجلك في سبيل العزفي دنياوديني
لايغرك من تمخطرفي الحياة المخمليه=الوعد لاجف ينبوع الرخا ياالناعميني
قالها اللي لابته قبل البطاقه والهويه=وسمهم ترثع به الذيدان رغم الطامعيني
الوسوم اللي لهاعند القبايل مقدريه=تحترم ويهاب سطوتهاجموع صارميني
دوسري حيث الدواسرتفتخربالدوسريه=تغلبي وزايدي منزالهم بالفرقديني
والتغالب وان نخاهم طارف من الزايديه=اقبلومثل البحرلاهاج موجه فازعيني
وان نخت باسم ال زايد بنت شيخ تغلبيه=والله انه مابقافي دارهم حي قطيني
سيف ابوليلى مطوع كل روس عنجهيه=وسيف زايدكاسب البيضاونصرالله ظميني
عصبة ماتختلف رغم الرياح الموسميه=ماعليهامن كلام المرجفه والجاهليني
وان رجعناللجزيره والبلاد اليعربيه=فاصدق التاريخ يشهدوالعوارف عارفيني
هيمنوبارض الجزيره يوم وقت الجاهليه=حدهم من الهييه لين الهييه مثبوت ويقيني
باسطين نفوذهم مثل الجبال الحايليه=شامخين وفي ذراهم يأمنون الخايفيني
حكمهم ماهوب بالتصويت ولاالاكثريه=حكمهم بالسيف الارقب يرضي اللي رافضيني
من كسرقوم الشريف وهد حكم الهاشميه=غيرصبيان الدواسر والقبايل خابريني
ومنهواللي قد نسى صرخة وسيم العامريه=يوم غنت مرثيتها مانسوها الغانميني
والله انهاماظهرت شمس ولاغابت عشيه=غير به علم ينومسني ويعمي حاسديني
والله انا مانبي بحث الامور الطايفيه=ميرعميان البصيره زودوها حبتيني
وهي قبيله يعربيه والفعايل عالميه=مثلها وستغفرالله ماذكربالعالميني
من فصايلها ظهرحكام ورجال شليه=عانهم عندالقبايل روس قوم شايخيني
ومنهم اللي حاكمين في البلاد الاجنبيه=والحقايق ثابته وموثقه بالشاهديني
وان نشدتو من العوايد والسلوم الاوليه=اشهدانهم للسلوم الطيبه متوارثيني
شيدومجدالمكارم مثل برج الفيصليه=معجزات العشرتذكرماختلف فيها ثنيني
وان حكيناعن كرمهم قلت ويش الحاتميه=بالعطاماكنها الاالنيل ولاالرافديني
ذكرهم في سيرة ال هلال بمثال نقيه=كرموهم لابتي والناس في شهب السنيني
من كرمهم مابقى بالسوق لاطلي وطليه=ومن كرمهم ماتعرف المغتني والمعسريني
كلمة اقلط دارجه في سلمهم مثل التحيه=بزرهم يلهج بها من كثرها في كل حيني
والوفابسلومهم فرض مثل عيد الظحيه=اغلبو رمزالوفاكعب المسمى مرتيني
والخوي بسلومهم لابد ياخذ في خويه=لومعرفتهم معرفة طرقة من ساعتيني
والشجاعه هم هل العليا ليامن صارهيه=ياردون الموت الاحمرمن طناهم هايميني
روسهم من طيبهاتقدح صعاطير وحميه=للرفيق وللخوي والجارفي عسر ولليني
وهم هل البل كم سرو بظهورها بالخرمسيه=لاتعلو كورها لحقو على صوت الهجيني
قبل ماكل يجي له وايت وذود ورعيه=صاربالتقليد بدو تايوان مهجنيني
وهم متيهة البكار الغفل في نجد العذيه=وهم مدلهة القصيروجارهم قدره مكيني
زايدي والتغلبي عزوة رجال صيرميه=من بياض اعلومهم يسري عليها التايهيني
ذا كلامي وادري ان قدمي رجاجيل ذكيه=ماتسمع كون هرج من رواته واثقيني
شابت القيفان والاالمدح باقي له بقيه=قصرالتعبير لوان بالمعاجم نستعيني
قصرت عن مدحهم كل الحروف الابجديه=الدواسر والله انهم فوق مدح القاصديني
كلن يفسرعلى معناه والنيه مطيه=والمعاني في خفا نيات شاعرها دفيني
والصلاة اختامها بااطيب تحيات زكيه= ياصلاة الله على محمد شفيع المسلميني

 

 

 

 

[معلومات العضو ابوعبدالرحمن الودعاني]

	فحل فحل يابومحمد وصح لسانك على ذي القصيده الجزلة وعزالله هذي عوايدك لاعدمناك

 

 

 

 

[معلومات العضو فراج بن فهد آل تركي]

ياقصيد يبهر الحضـار ولاالصمـت زينـي


والله أنها أبهرتني لين سجلت دخول علشانها

صح لسانك ياابن بطحية

قصيدة مايقولها ألا فحل وسواء ثبتت أو ماثبتت تأكد أن التاريخ سيثبتها لك

 

 

 

 

[معلومات العضو حسن بن بطحيه]

المشاركة الأصلية كتبت بواسطة ابوعبدالرحمن الودعاني

ابوعبدالرحمن..
ارحب ياشيخ عاش من شافك بيض الله وجهك لاعدمناك
الله لايهينك ياشيخ سعدت بمرورك جدا لك اصدق الامنيات..

 

 

 

 

[معلومات العضو مديونة]

صح لسانك


وتسلم يمناك على القصيدة

 

 

 

 

[معلومات العضو منذر بن رشود]

صح لسانك يابو وليد

انت تعرف رايي بشخصك قبل شعرك ولو اني ماسمع قصيدك مباشره منك كان رديت على كل قصيده تحياتي لك

 

 

 

 

[معلومات العضو أبن جلوي الشكرة]

نطقت فأبدعت
تغنيت فاطربت

صح لسانك يابن بطحيه على الدرر الثمينه

تحياتي لك

 

 

 

 

[معلومات العضو راشد المسعري]

صح لسانك يابو محمد وبيض الله وجهك على القصيدة الجزلة ولاهيب غريبة الجزالة عليك فأنت من رواد الجزالة ومن شعراء القبيلة الكبار ، وتستاهل قبيلة الدواسر أن يكتب من أجلها الملاحم.
بيض الله وجهك مرة أخرى وتم تثبيت القصيدة والمعذرة على التأخير وتقبل ودي وتقديري ،،،،

 

 

 

 

[معلومات العضو حسن بن بطحيه]

ابوفهد...
الله يبيض وجهك والله يوفقك على الكلام الطيب والطيب مايجي منه الا الطيب
تشرفت بمرورك الكريم وليس غريب هذا الموقف لك اصدق الامنيات..

 

 

 

 

[معلومات العضو حسن بن بطحيه]

مديونه..
صح بدنك الله لايهينك مشكوره جدا على مرورك لك تحياتي

 

 

 

 

[معلومات العضو حسن بن بطحيه]

ابو حمد الساعه المباركه الي جابتك
في ذا الصرح الكبير منتد بني عمك الدواسر
دايم وافي ومجمل الله يطول لي عمرك لك اصدق الامنيات..

 

 

 

 

[معلومات العضو حسن بن بطحيه]

ارحب يابن اجلوي..
حي والله ها الطله ياخوي لاعاد تقطعنا
مجمل يابوبخيت لك تقديري

 

 

 

 

[معلومات العضو حسن بن بطحيه]

المشاركة الأصلية كتبت بواسطة راشد المسعري

صح لسانك يابو محمد وبيض الله وجهك على القصيدة الجزلة ولاهيب غريبة الجزالة عليك فأنت من رواد الجزالة ومن شعراء القبيلة الكبار ، وتستاهل قبيلة الدواسر أن يكتب من أجلها الملاحم.
بيض الله وجهك مرة أخرى وتم تثبيت القصيدة والمعذرة على التأخير وتقبل ودي وتقديري ،،،،

ارحب يابومحــســـــن..
حي والله ذيك العين يابومحسن ماهي غريبه عليك.
انت والاخوان اعضاء ادارتنا الموقره الله عطاكم سعة الصدر علشان تحملون
مغثتنا وطللباتنا وانا انشالله عند ضنكم فينا الله لايخلينا منكم
لاعدمت مرورك ووقفاتك الطيبه مانيب ناسيه يابومحسن وتقديرك في القلب
تقبل شكري وتقديري..

 

 

 

 

[معلومات العضو محمد الولامين]

صح لسانك يابومحمد على ماقدمت من جزاله وبيض الله وجهك

 

 

 

 

[معلومات العضو حسن بن بطحيه]

يامرحبا يامحمد الولامين
كالعادة ياطيب العادة الله لايقطعني منك تشرفت بمرورك لك شكري
وتقديري البالغ..