غيبتك لو هـي دقيقـه تعتبـر صـدّه

[معلومات العضو الهاج ـري]

غيبتك لو هـي دقيقـه تعتبـر صـدّه
الوقت دونك سجن وغيابـك اسياجـه


لا تعتذر لي ترى ماعـاد فـي شـدّه
اعيد حكي ٍ يكـود الصـدر مخراجـه


دامه يوصـف بجـود ابيـك وبجـدّه
وشلون تبخل على المجروح بعلاجـه؟


ووشلون قـاوااك قلبـك رده وصـدّه
مع انه بيّن عليه الضعـف والحاجـه


ياقـو قلبـك بــرد ايميـنـك وردّه
بخلت بمصافحـه وارهيـت بحراجـه


لو ماسقى غيم عينه جرهـدي خـدّه
تراه يبكـي وقلبـه يلحـق اخلاجـه


ولو شفته يمازحك تـراه مـن جـدّه
الضحك عن درب ضيق الصدر ماعاجه


غير الغلا والوله عليـك وش حـدّه؟
يـادرب ليلـه ويامسـراه وسراجـه


كنّه يعرفـك قبـل يلقـاك مـن مـدّه
مع ان مابينـك ومـا بينـه امواجـه


هواك بـدو ٍ نـووا للقلـب بالشـدّه
ورياض قلبي لشوف البـدو محتاجـه


والوصل..بحر ٍ متى انت بتسمح ابمدّه
السيف صبري وبحرك شح بامواجـه


قصيدي اللـي قريتـه واللـي اعـدّه
قديـم لا يزعلـك معنـاه واخـراجـه


وفراغ قلبي غلاك ارهى علـى سـدّه
ليتك تشوف الغلا وابراجـه وعاجـه


اقوى رياح العـذل مـا تقـدر تهـدّه
والا الجفا لـو تنفـس هـدم ابراجـه


تغانـم الوصـل لـن البعـد لابــدّه
ياتيك في يوم ثـم ياخـذك بادراجـه


اللي لي انـك تليـن وتتـرك الشـدّه
واللي لك اني ما سولف بـك لهراجـه


ولاني بزعلان واللـي نرتجـي مـدّه
يا باب قلبـي ويـا قفلـه ومزلاجـه


زعلة تغلي ومـن تزعلـه مـن قـدّه
ما دام كـل ٍ يبـي دربـك ومنهاجـه


غالي وتبخل علـي وتطّـول الصـدّه
الله يسامـح غـلاك ويلعـن الحاجـه

 

 

 

 

[معلومات العضو غلا نجد]

قصيدة في منتهي الروعـــــــــــــة

وصح لسان شاعرها وسلمت يمناك

يعطيك العافيه طال عمرك

احترامي وتقديري

 

 

 

 

[معلومات العضو عبدالله الحافر الغييثي]

اختيار موفق اخوي الهاجري يدل على علو ذائقتك الشعريه لك مني فائق التقدير والمحبه

 

 

 

 

[معلومات العضو ابو حسين الدوسري]

يعطيك العافيه يالهاجري قصيده جزله

خالص التقدير

 

 

 

 

[معلومات العضو شيهانه بكف صقار]

غيبتك لو هـي دقيقـه تعتبـر صـدّه
الوقت دونك سجن وغيابـك اسياجـه


صح الله لسانك حتى ترضى
قصيدة قمة في الذوق

الف شكر على امتاعنا بها

احترامي وتقديري~

 

 

 

 

[معلومات العضو الهاج ـري]

تسلمون على مروركم الوافي ولاهنتم