الزلامي يرثي الامير/محمد الاحمد السديري

[معلومات العضو عبدالله الحافر الغييثي]

الشاعر/رشيد الزلامي يرثي السديري رحمه الله

اليوم ياعين الشقـا ليـش تبكيـن=يبكي الحزين وعبرتـه وش تفيـده
والله ما ألومـك لوبقيتـي تهليـن=دمـعً يـداوي الحـزن ولايزيـده
هذا القضاء والقدر مافيـه تظنيـن=يطوي من التاريخ صفحه جديـده
صفحة شرف هزت قلوب الملايين=توجد بها كل الصفـات الحميـده
صفحة شرف حنا لهـا مستحقيـن=تبقـى لنـا والله فعـل مايـريـده
راضين بامر مكون الكون راضين=حيث انـه المالـك وحنـا عبيـده
كم راحلً من بين قومـن مقيميـن=ومع دورة الايـام شـدوا شديـده
هذا الصحيح انا على الدرب ماشين=ولا وكـاد انـا فقـدنـا فقـيـده
شخصية تعرف على العسر واللين=سجل لها الماضي مواقف عديـده
في صالح الدنيا وفي صالح الديـن=ونفس تموت بمثـل هـذا شهيـده
وابوزيد حبه في قلـوب المحبيـن=بقلوب كل الناس ضخـمً رصيـده
مرحوم ياريف الضعاف المساكين=زومان شيـال الحمـول المكيـده
ريف الضيوف اللي من البعد لافين=وعز الصديق وضد منهو ضديـده
العام ياعين الشقـا وش تخبريـن=أبعث له أسراري من أرض بعيده
واشكي له الغربه وبعـد المحبيـن=وظروف عشت ابها حياةً زهيـده
مشاكـلً تكـوي كبـود البعاريـن=يذوب منها القلب لو هـو حديـده
ويرد لي رد الرجـال الحكيميـن=ويحل موضوعي ببيـت القصيـده
وكنا على عهد الوفا منه مرهيـن=وحل القضاء المحتوم دون الوعيده
اليوم ياعين الشقـا ليـش تبكيـن=محمد رحل مع درب خالد عضيده
ندعوا لهم دعـوة حجيـج ملبيـن=بجنة عدن لاهل الصفات الحميـده
واليوم ياشعر النبط عنـك عازيـن=عفناك لـو عشنـا حيـاة مديـده
اختل وزنك مابقـا لـك موازيـن=تراك طيرن طايرن مـن جريـده
يالله ياقابـل صــلاة المصلـيـن=وفي قدرتك تحيا العظـام الهميـده
تجعل لهم عن واهج النـار تاميـن=وتجبر عزانا في النفوس الشديـده

 

 

 

 

[معلومات العضو ابو زابن المسعري]

رحم الله الامير الشاعر محمد الاحمد السديري

قصيده جزله من شاعر جزل في الامير والشاعر الجزل
لاهنت يابو مطر على نقل هذه القصيده بيض الله وجهك
يابو الشوخي

 

 

 

 

[معلومات العضو محمد مطلق آل بريك]

صح الله لسانه شاعر جزل

والله يرحم السديري ويجعل مثواه الجنه

تحياتي وتقديري لابو مطر على مانقل لنا ~~

 

 

 

 

[معلومات العضو ناصر بن فهد]

رحم لله محمد بن الآحمد السديري

ولاهنت يا ابوشيخه على النقل ,

 

 

 

 

[معلومات العضو عبدالله الحافر الغييثي]

لاهنتوا على جمال مروركم الطيب لاعدمتكم. خالص تقدير واحترامي لكم

 

 

 

 

[معلومات العضو عبدالرحمن بن فلاح آل بريك]

رحم الله الامير الشاعر محمد الاحمد السديري
وقصيده جميله جدآ صح الله لسان شاعرها .

ومشكور يا أبو مطر على النقل لا عدمناك .

 

 

 

 

[معلومات العضو عبدالله الحافر الغييثي]

مرحبا بك يابوفلاح ومرورك شرف ووسام على صدري لاهنت على طيب تواجدك العذب

 

 

 

 

[معلومات العضو غازي المسعري]

رحم الله الامير الشاعر محمد الاحمد السديري

قصيده جزله من شاعر جزل في الامير والشاعر الجزل
لاهنت يابو مطر على نقل هذه القصيده بيض الله وجهك
يابو الشوخي

 

 

 

 

[معلومات العضو مبارك بن شافي النتيفات]

صح لسان الزلامي

ورحم الله السديري

وبيض الله وجهك يابو مطر

 

 

 

 

[معلومات العضو عبدالله الحافر الغييثي]

ابوشافي غازي المسعري لاهنتوا على جمال مروركم الطيب لاعدمتكم. خالص تقدير واحترامي لكم