من أروع قصائد أبن جدلان

[معلومات العضو ابو سعيد الجماني]

من أروع قصائد الشاعر الكبير / سعد بن جدلان الأكلبي .



أتمنى أن تحوز الرضا من الجميع .



***





ياذا الجلال اللي عروشك فوق وأملاكك حدر

ومهما تسامت به عروشه مستحيل يطولها



ياحي ياقيوم .. ياذا الأنافة والكبر

مانافسك في عظمتك مكر العباد وهولها



ومانافسك من عمر بيوته على سطح القمر

واللي ترسي فوق أقاليم المياه سطولها



ماانت بحاجة من عبد ولا بحاجة من كفر

ولا بحاجة ثابت الدنيا ولا منقولها



أنت السميع لمن حمد وانت المزيد لمن شكر

واللي مايشكر نعمة المنعم عليه تزولها



ياذا الجبروت العظيم ويا القدير المقتدر

تفزع لنا في معضلات(ن) مانريس حلولها



تلعب بنا خلان .. فرقتنا كما لعب الكور

إن أقبلت صاحوا لها وان دبرت صاحوا لها



لا هبنا الطايف بعض الأحيان في فية عصر

شهب الليالي من ورانا يسحبن ذيولها



أنت السلام اللي لك الإسلام وانت المشمخر

اللي عجايب قدرتك في المعجبين ذهولها



سلام يامحمد رسول الله راعي الوجه الأغر

وسلام ياروح(ن) ملائكة السما صلوا لها



سلام يابوبكر ياعثمان ياعلي وعمر

وسلام ياسبع الآفاق أطلالها وسفولها



سلام ياصدق النوى سلام ياوسع الصدر

سلام يامفتاح بيبان الفرج وقفولها



وسلام ياشمس الضحى تشرق على بر وبحر

وتشرق على كل الديار جبالها وسهولها



وسلام يا غر السحاب اللي تبجح بالمطر

و شم الجبال اللي تبجح بالسحاب قذولها



وسلام ياهوج الرياح اللي عطاها مستمر

مهما خذوا منها من الحسنات ماردوا لها



ليت الرحاب اللي لنا بوجيهها حق وقدر

ماتضمحل من الزمان ولانشوف سمولها



وياليتنا لاما سرحنا اليوم الأبيض من فجر

تبطي عبات الليل ماتضفي عليه سدولها



والا ليا منها ضفن سدولها يطلع بدر

ياصل ضياه اللي على الكوره تطق طبولها



المعتبر ياخذ على الدنيا دروس من العبر

والناس يكسبها معاملها بقد عقولها



أحيان تصدف لعبة الشاطر مع غلطة عمر

مره .. لكن لاعدت الغلطه ماعاد ينولها



حنا عرفنا كلنا ماطال من شي(ن).. قصر

والأحلام ماتوا قبلنا شرهين ماوصلوا لها



حتى الجمال اللي تحملها الهقاوي بالصبر

يالله بحملتها تقوم وتدرج بحمولها



والحب سيسان العباده والعباده بالجهر

إن ماقدرت تقولها وجه الصحيح يقولها



يسرون عميان المحبه تيه في غدرا الغدر

للي تحد سيوفها واللي تعن خيولها



ولاتفكر في غناة ولاتفكر في فقر

وتشفع لبيضان الصدورحظوظها وفعولها



وأهل التكلف بالمعرفه والتصنع بالبشر

والله ماهي حول الصحيح ولا الصحيح بحولها



اللي يفضل مايقيم بو ميه من بو عشر

حتى الفضوليه عن الفاضل بطل مفعولها



اللي تخبره لحيته ذا .. طولها يصبح بزر

واللي تخبره بزر يصبح لحيته ذا .. طولها

_____________________

 

 

 

 

[معلومات العضو ناصر بن فهد]

صح لسانكً وصح لسان ابن جدلآن
ولآهنت على نقلها يا ذيبان

 

 

 

 

[معلومات العضو راشد محمد المقابله]

صح اللسان الشاعر الكبير

سعد بن جدلان

والله يعطيك العافيه على النقل

 

 

 

 

[معلومات العضو عقاب بن هذال ال بريك]

اللي تخبره لحيته ذا .. طولها يصبح بزر

واللي تخبره بزر يصبح لحيته ذا .. طولها

الله ع الابداع يابن جدلان ماهيب غريبه منه وصح لسانه . . .

أبوسعيد لاعدمناك . . .

 

 

 

 

[معلومات العضو مبارك بن شافي النتيفات]

الله الله

صح لسانك يابوسعيد ولسان الشاعر سعد بن جدلان
اهنيك بهذه الذائقه
تقبل مروري

 

 

 

 

[معلومات العضو عبدالرحمن بن فلاح آل بريك]

صح لسان الشاعر الكبير :

سعـد بن جدلان.

ولا هنت يا أبو سعيد على طرحهآ لنآ .