التتن وعمايله قديماً في أهل الباديه

[معلومات العضو كليوباترا]

هلاوين بالجميع

عندما يرد ذكر قبيلة عنزه المشهوره يتبادر الى الذهن شيخها الشهم الكريم الفارس ابن هذال وعندما يرد ذكر قبيلة الظفير المشهوره يتبادر الى الذهن شيخها الشهم الكريم الفارس ابن سويط
قبل ماتتوحد هالجزيره على يد صقرها عبدالعزيز كانت قبايلها اللهم ياكافي … مغير حرب وضرب بسبب المراعي وموارد الماء ………بذيك الايام الغابره الله لايعيدها .. ولأحد السببين اللي قلنا أو اثنينهم مع بعض قامت حرب بين قبيلة عنزه بقيادة ابن هذال .. وقبيلة الظفير بقيادة ابن سويط … وصار بينهم مناخ .. ( = واحد ضد واحد = يتقابل الفريقين ويطلع من كل فريق واحد ثم يبدون خذها وذقها ومطارد الين الله يفرجها او يموت احدهم او يستسلم وطبعاً ماقد ذكر بين القبايل ان واحد استسلم ) ..المهم ان دخان الحرب ثاير بينهم وفي ذاك المغرب وعقب ماجاء ابن سويط من الطراد وهو يدخل لخيمته خرمان يبي القهوه والسبيل ( سجاير هاك السنين ) ايلا يده والخلا …… نفلو الخيمه مافيه فايده … المشكله انهم بعيدين ولاهم حول حاضره علشان يرسل احد يشتري .... وهويتعكر المزاج وينحاس الرجال ..... مضت ساعه وساعتين ايلا والله الرجال خلاااااااااااص ماهوب قادر يصبر اكثر من كذا وهو يرتسب ذلوله ويتسلل بالظلام بدون مايقول لربعه من شدة ضيق خاطره من قلة الدخان والقهوه .. ويتجه الى خصومه عنزه .. ويدخل معسكرهم وهم مستغربين وش اللي جاب الشيخ ابن سويط بهالحزه وهم وياه بحالة حرب ... وهوسيدا يم خيمة الشيخ ابن هذال وينوخ ذلوله قدام مجلس الشيخ اللي كان عامر بالفرسان وكبار القبيله ..
طارت عيونهم مستغربين يوم شافوه .. وهو يدزبل عليهم ويقومون احتراماَ وتقديراً له ( هذي خصله وحده بس من الخصال الحميده اللي تتميز بها قبائل هالجزيره ) ويتقدم له الشيخ ابن هذال ويهليبه ويرحب فيه ويجلسون بجنب بعض .. قال الشيخ ابن سويط


ياشيخ ياشيخ السلف والجهامــه .......... زيزوم ربعه بالنهار الكبيري
جيتك على عوصى بداجي ظلامه .......... الراس مني دايخ مستديـري
على رفيقٍ مالقينا غرامــــه .......... حاشه جليل الملك مني لغيري


الشيخ ابن هذال عرف قصده وقال :
يامرحبا بك ياموارث سلامه .......... مهوب بغضٍ مير ربي خبيري
شفك على الملله مبني خيامه .......... بيمنا غلامٍ محتفي به بصيري
وشوي في مثل الفهد وايتلامه .......... قد له بقدحان الولع يستديـري
مع عودٍ ازرق تو فكو بلامـه .......... عنك العماس الى دمحته يطيري
مع منسفٍ فوقه سواة العدامه .......... كرامةٍ ماغاب عنها قصيــري

جابو له الدخان وكيف راسه بالقهوه ( وينك يامشخوط ) وهو يسمر عندهم هاك الليله ويعبون عدول ذلوله من الدخان والقهوه ...ويصير الدخان سبب للصلح والهدنه وتوقف القتال وحقن الدماء( يابلاش ) .... ورجع الكل منهم الى منازله وبقيو متجاورين بأمان .. مهنا حليلهم ويقال ان الشيخ ابن سويط شام عن الدخان بعد ماعرف مضاره

وسلاااااااااااااااااااااااااااااااااااااامتكم

 

 

 

 

[معلومات العضو ابو فهد الغييثي]

هههههههههههههههههه
والله الدخان المبروك اللي اسببه انتهت الحرب
الله يعطيك العافيه على القصه الرائعه

 

 

 

 

[معلومات العضو كليوباترا]

رب ضارة نافعه..

الله يعافيك ابوفهد على ردكـ

 

 

 

 

[معلومات العضو نايف الخييلي]

أي والله التتن المبروك

بس لو تأملنا بالقصه انا بمجرد ضيافه ابن هذال لابن سويط شيخ الضفير لن يحدث
بينهم بعد ذلك أي مواجهه , لان من عادات العرب الطيبه , مايجوز تبعاً للاعراف ان تعادي قوم بعد ماتمالحهم أي سواً ضفت عليهم او كانوا بجوارك والشواهد والقصص كثيره منها قصه الفارس حليس الخييلي عندما كان نازل
عن قبيله ال مره فلما أرادوا المغزى ذهب معهم فتفأجا انهم غازين على قبيلته فيوم تواجه الطرفين وحدثت معركه كان موقف الفارس حليس انه أنعزل عنهم وأكتفى
بإثاره ربعه وزهـمهم بالحرب ,, لانه عرفاً غير مقبول ان تعادي وتحارب قوم بينك وبينهم
ممالح - كما يقال -
وكذلك قصه شايع الامسح عند ماكان راحل هو وقومه فمروا بديار قوم - وكانوا هم قله - فخاف انهم يغيرون عليهم ويأخذون ركايبهم ,,فقال : أبي اسبقكم لهم وأضيف عليهم وعقبها نأمنهم ونأمن شرهم وبالفعل ذهب لهم وضاف عليهم ورجع الى ربعه فيوم فلما مروا بالقرب منهم وعلموا انهم ربع الرجال اللى ضاف عليهم تركوهم وشأنهم ,,,,,,,,, ومشكوره على هذا الموضوع اللي يوضح لنا أحد عادات العرب الكريمه

 

 

 

 

[معلومات العضو بدراااان999]

اول فايده للدخان هههههههههههههه
بصراحه قصة عجيبه
سلمت يمينك

 

 

 

 

[معلومات العضو راجــع]

الله يعطيك العافيه على القصه


و الله التتن المبروك ....هههههههههه ...